បើកកង់បីទៅទារលុយមិត្តភក្តិដែលខ្ចីម៉ូតូទៅបញ្ចាំ បែរជាត្រូវមិត្តនិងបក្ខពួកដេញវា.យ និងវា.យកង់បី ផ្អើលភូមិព្រែកទាល់ ក្នុងសង្កាត់ស្ទឹងមានជ័យ២
- ភ្នំពេញ
រាជធានីភ្នំពេញ ៖ បុរសម្នាក់បើកកង់បីទៅទារលុយពីមិត្តភក្តិ ត្រូវមិត្តរបស់ខ្លួនដេញវាយមិនបាន ក៏នាំគ្នាកាប់បំផ្លាញកង់បីឥណ្ឌាគាត់ថែមទៀត កាលពីវេលាម៉ោង១០និង២០នាទីយប់ ថ្ងៃទី១៤ ខែកក្កដា ឆ្នាំ២០២៦ ស្ថិតនៅផ្លូវលំ ភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
ប្រភពព័ត៌មានពីបុរសម្ចាស់កង់បីឥណ្ឌាបានឲ្យដឹងថា មុនពេលកើតហេតុ គាត់បានបើកកង់បីឥណ្ឌាទៅរកមិត្តរបស់គាត់ដែលធ្លាប់បានខ្ចីម៉ូតូរបស់គាត់យកទៅបញ្ចាំរយៈពេលជាង៥ខែមកហើយ ក្នុងគោលបំណងទារលុយត្រឡប់មកវិញ ព្រោះមិត្តរបស់គាត់ បានសន្យាថានឹងសងលុយវិញ ជាថ្នូរការមិនដាក់ពាក្យបណ្តឹង ។ លុះមកដល់ចំណុចកើតហេតុ មិនច្បាស់ថាមកពីមានទំនាស់អ្វីនោះទេ មិត្តរបស់គាត់និងគ្នីគ្នា បាននាំគ្នាទាញដំបងនិងកាំបិតព្រួតវាយគាត់ បណ្តាលឲ្យគាត់ភ័យរត់គេចខ្លួន ហើយពួកគេដេញតាមវាយគាត់មិនទាន់ ក្រុមជនបង្កបាននាំគ្នាត្រឡប់មកវិញ វាយបំផ្លាញកង់បីឥណ្ឌាគាត់បន្ថែមទៀត រួចរត់គេចខ្លួនបាត់អស់។
សូមរម្លឹកថា បុរសរងគ្រោះទើបតែស្គាល់គ្នាជាមួយជនបង្កមួយរយៈនោះទេ ហើយត្រូវបានជនបង្កជាមិត្ត ខ្ចីម៉ូតូម៉ាក NEX របស់គាត់យកទៅបញ្ចាំ ហើយសន្យាអោយលុយវិញ កុំប្តឹងប៉ូលីស តែមិននឹកស្មានថាពេលមកទារលុយ បែជាជួបរឿងបែបនេះ ។
ក្រោយកើតហេតុ បុរសរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្ទឹងមានជ័យ២ ដើម្បីសុំការអន្តរាគមន៍ពីសមត្ថកិច្ច ដើម្បីស្វែងរកជនសង្ស័យ អនុវត្តបន្តតាមនីតិវិធី ៕
ចែករំលែកព័តមាននេះ