ខេត្តកោះកុង ៖ វិហារអ៊ិស្លាម AL KAWTHAR ស្ថិតនៅភូមិអណ្តូងទឹក ឃុំអណ្តូងទឹក ស្រុកបទុមសាគរ ខេត្តកោះកុង ជាអំណោយរបស់សប្បុរសជនប្រទេសម៉ាឡេស៊ី ត្រូវបានធ្វើពិធីប្រគល់ជូនដល់សាសនិកអ៊ិស្លាមគោរពប្រតិបត្តិ តាមសាសនាកាលពីរសៀលថ្ងៃទី៣១ កក្កដា ក្រោមអធិបតីភាពលោក
ខេត្តកោះកុង ៖ វិហារអ៊ិស្លាម AL KAWTHAR ស្ថិតនៅភូមិអណ្តូងទឹក ឃុំអណ្តូងទឹក ស្រុកបទុមសាគរ ខេត្តកោះកុង ជាអំណោយរបស់សប្បុរសជនប្រទេសម៉ាឡេស៊ី ត្រូវបានធ្វើពិធីប្រគល់ជូនដល់សាសនិកអ៊ិស្លាមគោរពប្រតិបត្តិតាមសាសនាកាលពីរសៀលថ្ងៃទី៣១ កក្កដា ក្រោមអធិបតីភាពលោកវេជ្ជបណ្ឌិតសុះ មុះសិន រដ្ឋលេខាធិការក្រសួងធម្មការ និងសាសនា អនុប្រធានអង្គការមូលនិធិអភិវឌ្ឍន៍មូស្លីមកម្ពុជា និងជាប្រធានសមាគមគ្រូពេទ្យអ៊ិស្លាមកម្ពុជា និងលោកជំទាវ ។
នៅក្នុងឱកាសនោះដែរ ក៏មានការចូលរួមពីដោយលោកសាន់ សាប់អីុ អនុរដ្ឋលេខាធិការក្រសួងសុខាភិបាល លោកមា៉ន សុគ្រី អនុរដ្ឋលេខាធិការក្រសួងកសិកម្ម លោកពាស់ មុស្លីម អនុប្រធានសមាគមគ្រូពេទ្យអ៊ិស្លាមកម្ពុជា លោកម៉រ គ្រីយា៉ ជំនួយការលោកមិន ឃិន រដ្ឋមន្ត្រីក្រសួងធម្មការ និងសាសនា ព្រមទាំងមានការចូលរួមពីមន្ត្រីរាជការ អាជ្ញាធរ ថ្នាក់ដឹកនាំអ៊ិស្លាម អីុមាំុតួន និងសាសនិកអ៊ិស្លាមយ៉ាងច្រើនកុះករ ។
លោកយូសុះ សាឡេះ គណៈអ៊ីម៉ាំខេត្តកោះកុង បានឡើងអានរបាយការណ៍ឱ្យដឹងថា វិហារអ៊ិស្លាមដែលត្រូវធ្វើពិធីប្រគល់ជូនដល់សាសនិកអ៊ិស្លាមនៅពេលនេះមានទំហំ១០ម៉ែត្រគុណ១២ម៉ែត្រ មានប៉ម១, ម៉ាណារ៉ា១, បន្ទប់ទឹក២ កន្លែងយកទឹកថ្វាយបង្គំ១ ។ វិហារនេះចាប់ដំណើរការសាងសង់ពីខែមេសា ឆ្នាំ២០១១ និងរួចរាល់ជាស្ថាពរនៅថ្ងៃទី១៥ កក្កដា ឆ្នាំ២០១១ អស់ថវិកាចំនួន២៧.០០០ដុល្លារ ។
លោកវេជ្ជបណ្ឌិត សុះ មុះសិន បានឱ្យដឹងថា វិហារនេះជាសមិទ្ធផលថ្មីមួយទៀតនៅក្នុងចំណោមសមិទ្ធផលជាច្រើន ដែលជាអំណោយសប្បុរសជនប្រទេសម៉ាឡេស៊ី ផ្តល់តាមរយៈសមាគមគ្រូពេទ្យអ៊ិស្លាមកម្ពុជា ។ លោកបានឱ្យដឹងទៀតថា រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានដឹកនាំប្រទេសជាតិឱ្យមានការរីកចម្រើនលើគ្រប់វិស័យទាំងអាណាចក្រ ពុទ្ធចក្រ និងសាសនាអ៊ិស្លាមកម្ពុជាដូចជា ផ្លូវថ្នល់ សាលារៀន វត្តអារាម វិហារអ៊ិស្លាម មន្ទីរពេទ្យ បានរីកដុះដាលតាំងពីទីប្រជុំជនរហូតដល់តំបន់ជនបទដាច់ស្រយាល ។ នៅក្នុងយុទ្ធសាស្ត្រចតុកោណរបស់រាជរដ្ឋាភិបាល បានបើកសិទ្ធិទូលាយខាងជំនឿសាសនា ដែលជាហេតុធ្វើឱ្យគ្រប់សាសនាទាំងអស់មានសុខដុមនីយកម្មនឹងគ្នា។ គ្រប់សាសនាទាំងអស់បានដើរតួនាទីសំខាន់សម្រាប់អប់រំឱ្យុមនុស្សដើរផ្លូវល្អ ទាំងការអប់រំសីលធម៌ និងការងារសង្គមកិច្ច។
លោកវេជ្ជបណ្ឌិត សុះ មុះសិន បានផ្តាំផ្ញើដល់សាសនិកអ៊ិស្លាមទាំងអស់ ត្រូវចេះសាមគ្គី ចេះអធ្យាស្រ័យគ្នាទៅវិញទៅមក កុំប្រកាន់បក្សពួក និងប្រកាន់យកតែធម៌វិន័យតាមជំនឿសាសនាដែលធ្វើឱ្យយើងគ្រប់ៗគ្នាធ្វើតែអំពើល្អ។ នៅពេលដែលទទួលបានវិហារនេះ បងប្អូនត្រូវចេះថែរក្សាឱ្យបានល្អ ទុកគោរពប្រតិបត្តិទៅតាមជំនឿសាសនាឱ្យបានយូរអង្វែង ។ លោកបានថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ដែលតែងតែផ្តល់អំណោយតាមរយៈសមាគមគ្រូពេទ្យអ៊ិស្លាមកម្ពុជា ក៏ដូចតាមរយៈអង្គការមូលនិធិអភិវឌ្ឍន៍មូស្លីមកម្ពុជា ។
នៅក្នុងឱកាសនោះ លោកវេជ្ជបណ្ឌិត សុះ មុះសិន ក៏បាននាំអំណោយចំនួន២ពាន់ដុល្លារ សម្រាប់ចាក់ដីជុំវិញវិហារ AL KAWTHAR និងផ្តល់ម៉ាស៊ីនភ្លើង១គ្រឿ់ង ដែលជាអំណោយសប្បុរសជនម៉ាឡេស៊ី។ ឧបត្ថម្ភវិហារអ៊ិស្លាមក្នុងខែបួសនៅភូមិទួលទទឹង៣ ស្រុកព្រៃនប់ ចំនួន១.០០០ដុល្លារ, វិហារភូមិកំពង់សិលា ស្រុកកំពង់សិលា ចំនួន៥០០ដុល្លារ, វិហារភូមិស្រែអំបិល ស្រុកស្រែអំបិល ចំនួន៥០០ដុល្លារ និងវិហារឃុំជីខលើ ស្រុកស្រែអំបិល ចំនួន៥០០ដុល្លារ ដែល អំណោយទាំងនេះទទួលបានពីសមាគមសប្បុរសជនឌូបៃ ប្រទសអារ៉ាប់រួមអេមីរ៉ាត ។ ក្រៅពីនោះ លោកវេជ្ជបណ្ឌិត ក៏បាននាំគម្ពីរកូរអានចំនួន២៥០ក្បាល ជាអំណោយរបស់អង្គការមូលនិធិអភិវឌ្ឍន៍មូស្លីមកម្ពុជា ចែកជូនដល់សាសនិកអ៊ិស្លាមមកពី១១ភូមិក្នុងខេត្តព្រះសីហនុ និងខេត្តកោះកុងផងដែរ៕
ចែករំលែកព័តមាននេះ