ទីក្រុងយេរូសាឡឹម៖ អ៊ីស្រាអែលរិះគន់ប្រធានាធិបតីកូរ៉េខាងត្បូងពីបទចែករំលែកវីឌីអូស្ដីពីការប្រព្រឹត្តអំពើហិង្សាពីសំណាក់យោធាអ៊ីស្រាអែលទៅលើជនជាតិប៉ាឡេស្ទីន។ បញ្ហានេះកើតឡើងបន្ទាប់ពីប្រធានាធិបតីកូរ៉េខាងត្បូង លោកលីជេម្យុង លើកឡើងអំពីកង្វល់ដែលថាយោធាអ៊ីស្រាអែលប្រព្រឹត្តអំពើបៀតបៀនជាច្រើនករណីដែលមានឯកសារបញ្ជាក់ត្រឹមត្រូវ។ លោកលីបានបង្ហោះវីឌីអូមួយឈុតបង្ហាញរូបទាហានអ៊ីស្រាអែលធ្វើបាបជនជាតិប៉ាឡេស្ទីន។ ក្រោយការបង្ហោះវីឌីអូនោះ អ៊ីស្រាអែលមានកំហឹងយ៉ាងខ្លាំង។
លោកលីជេម្យុងបង្ហោះសារនៅលើបណ្ដាញអ៊ិចថាលោកចង់ដឹងថាតើនេះជាការពិតដែរឬទេ។ ប្រសិនបើវាជាការពិតមែន តើវិធានការអ្វីដែលគេប្រើប្រាស់។ វីឌីអូនោះផ្ទៀងផ្ទាត់ដោយទូរទស្សន៍អាល់ចាស៊ីរ៉ាថាពិតជាត្រឹមត្រូវ។ វីឌីអូនោះបង្ហាញទាហានអ៊ីស្រាអែលរុញសាកសពជនជាតិប៉ាឡេស្ទីនម្នាក់ពីលើដំបូលផ្ទះនៅតំបន់វេសស្បេងកាលពីខែកញ្ញា ឆ្នាំ២០២៤។ ទាហានអ៊ីស្រាអែលម្នាក់យកជើងទាត់សាកសពនោះមុនពេលធ្លាក់ពីលើដំបូល។
នៅថ្ងៃនោះ ជនជាតិប៉ាឡេស្ទីនបីនាក់ត្រូវទាហានអីស្រាអែលទម្លាក់ពីលើដំបូល ហើយធ្វើឱ្យមហាជនមានកំហឹងជាខ្លាំង។ រដ្ឋមន្ត្រីក្រសួងការបរទេសប៉ាឡេស្ទីនថ្លែងថានោះជាឧក្រិដ្ឋកម្ម និងជាការបញ្ជាក់ថាទាហានអ៊ីស្រាអែលបានប្រព្រឹត្តអំពើឃោរឃៅ។ ក្រោមច្បាប់អន្តរជាតិ យោធាត្រូវតែប្រព្រឹត្តចំពោះសាកសពដោយសេចក្ដីគោព។ ក្រសួងការបរទេសអ៊ីស្រាអែលឆ្លើយតបថាសំណុំរឿងនេះត្រូវបានស៊ើបអង្កេត និងដោះស្រាយរួចហើយ។
ទិន្នន័យពីក្រុមអ្នកតាមដានបានរកឃើញថាអ៊ីស្រាអែលបិទសំណុំរឿងពាក់ព័ន្ធនឹងការបៀតបៀនសាកសពពីសំណាក់យោធារបស់ខ្លួនដោយគ្មានការចាប់ជនដៃដល់យកទៅផ្ដន្ទាទោសអ្វីទេ។ បន្ទាប់ពីលោកលីជេម្យុងបង្ហោះវីឌីអូនោះ ក្រសួងការបរទេសអ៊ីស្រាអែលរិះគន់លោកត្រង់ៗតែម្ដង។ ក្រសួងរិះគន់ថាលោកប្រធានាធិបតីលីនៅសុខៗឆ្កឹះកកាយរឿងតាំងពីកាលកាលណីដែលកើតឡើងតាំងពីឆ្នាំ២០២៤។ អ៊ីស្រាអែលចាត់ទុកថាអ្នកដែលចែកចាយបន្តនូវវីឌីអូនោះមានចេតនាប្រឆាំងអ៊ីស្រាអែល៕ ប្រភព៖ អាល់ចាស៊ីរ៉ា និងប្រភពដទៃទៀត
ចែករំលែកព័តមាននេះ