រាជធានី​ភ្នំពេញ ៖ ក្រសួងសុខាភិបាល បាន​ប្រកាស​ឲ្យ​មានការ​ការពារ​ខ្លួន​ពី​ការ​ឆ្លង​ជំងឺ
កូ​វី​ដ​-​១៩ ប​ម្លែ​ង​ថ្មី NB.1.8.1 ។

យោង​តាម​សេចក្តី​ប្រកាស​ព័ត៌មាន​របស់​ក្រសួងសុខាភិបាល​នៃ​ព្រះរាជាណាចក្រ​កម្ពុជានៅ​ថ្ងៃ​ទី​២៤ ខែឧសភា ឆ្នាំ​២០២៦ បាន​លើក​ឡើង​ថា ក្នុង​ពេល​ថ្មី​ៗ​នេះ ប្រទេស​មួយ​ចំនួន​នៅ​លើ​សកលលោក មានការ​កើនឡើង​នៃ​ការ​ចម្លងជំងឺ​កូ​វី​ដ​-១៩ ប​ម្លែ​ង​ថ្មី NB.1.8.1 ជា​ពិសេស នៅ​ក្នុង​តំបន់​ប៉ា​ស៊ី​ហ្វិ​ក​ខាងលិច រួម​មាន​សាធារណរដ្ឋ​ប្រជាមានិត​ចិន សិង្ហ​បុរី និង​ហុងកុង ដែល​កំពុង​មានការ​ចរាចរ និង​ការ​ឆ្លង​រាលដាល​នៃ​វីរុស​នេះ ។ វីរុស​ប​ម្លែ​ង​ថ្មី NB.1.8.1 គឺជា​ពូជ​កូនចៅ​ដែល​វិ​វត្ត​ចេញពី​ពូជ​អូ​មី​ក្រុង (Omicron) ខ្សែស្រឡាយ JN.1​។

នៅ​ថ្ងៃ​ទី​២៣ ឧសភា ឆ្នាំ​២០២៥ អង្គការ​សុខភាព ពិភពលោក (WHO) បាន​ចាត់​ថ្នាក់​វីរុស​នេះ ជា «​វីរុស​ប​ម្លែ​ង​ខ្លួន​ដែល​ស្ថិត​ក្រោម​ការ​តាមដាន​» បន្ទាប់​ពី​សង្កេត​ឃើញ​ការ​កើនឡើង​យ៉ាង​ឆាប់​ពី​ទិន្នន័យ​វិភាគ​លម្អិត​ហ្សែ​ន (Virus Sequencing) នៅ​លើ​សាកលលោក ជា​ពិសេស នៅ​អាស៊ី​អាគ្នេយ៍ និង​ប៉ា​ស៊ី​ហ្វិ​ក​ខាងលិច ។

បច្ចុប្បន្ន​នេះ មិន​ទាន់​មាន​ភស្តុ​តាង​វិទ្យាសាស្ត្រ​ណាមួយ​បញ្ជាក់​ថា វីរុស NB.1.8.1 បង្ក​ឱ្យ​មាន​ស្ថានភាព​ជំងឺ​ធ្ងន់ធ្ងរ ការ​សម្រាក​ពេទ្យ​កើនឡើង ឬ​អត្រា​ស្លាប់​ខ្ពស់​ជាង​ពូជអូ​មី​ក្រុង ដែល​បាន​ចរាចរ​ពី​មុន​នោះ​ទេ​។ ប្រទេស​កម្ពុជា កន្លង​មក​ធ្លាប់​បាន​រក​ឃើញ វីរុស NB.1.8.1 នៅ​ចន្លោះ ខែឧសភា ដល់​ខែធ្នូ ឆ្នាំ​២០២៥ ។

ក្រសួង​បាន​បន្ត​ថា ចាប់តាំងពី​ដើមឆ្នាំ​២០២៦​មក ប្រព័ន្ធ​តាមដាន​ជំងឺឆ្លង​របស់​នាយកដ្ឋាន​ប្រយុទ្ធ​នឹង​ជំងឺឆ្លង​របស់​ក្រសួងសុខាភិបាល បាន​រក​ឃើញ​ករណី​វិជ្ជមាន​ចំនួន​១​ករណី កាលពី​ថ្ងៃ​ទី​១៨ ខែឧសភា នៅ​ក្នុង​ចំណោម អ្នកជំងឺ​ដែល​កមក​ទទួល​សេវា​សុខាភិបាល​នៅ​តាម​មន្ទីរពេទ្យ ដូចដែល​បាន​ផ្សាយ​ជូន​ក្នុង​ប្រព័ន្ធ​រាយការណ៍​ផ្លូវការ​របស់​ក្រសួង​សុខា​ភិបាល​។

អាស្រ័យ​ហេតុនេះ ក្រសួងសុខាភិបាល សូម​អំពាវនាវ​ក្រើនរំលឹក​ដល់​បងប្អូន​ប្រជាពលរដ្ឋ​ទាំងអស់ សូម​យកចិត្តទុកដាក់​ប្រុង​ប្រយ័ត្ន ដើម្បី​បង្ការ​នូវ​ការ​ចម្លងជំងឺ​ផ្តាសាយ និង​ជំងឺ
កូ​វី​ដ​-១៩​គ្រប់​ទម្រង់​ជាយថាហេតុ ដោយ​ត្រូវ​អនុវត្ត​នូវ​វិធានការ​បង្ការ​នានា ដូច​ខាងក្រោម​៖
អនុវត្ត​ឱ្យ​បាន​ខ្ជាប់ខ្ជួន​នូវ វិធានការ​បង្ការ​ការ​ចម្លង​គឺ ពាក់​ម៉ាស លាងដៃ​ឱ្យ​ញឹកញាប់​ជាមួយ​សាប៊ូ ឬ​អាល់កុល ឬ​ដែល​លាងដៃ​។

ត្រូវ​ខ្ទប់មាត់ និង​ច្រមុះ​ពេល​ក្អក កណ្តាស់ ដោយ​ប្រើ​ផ្នត់​កែងដៃ ម៉ាស ក្រ​ម៉ា កន្សែង ឬ​ក្រដាសអនាម័យ រួច​ខ្ចប់​បោះចោល​ក្នុង​ធុង​សម្រាប​បិទ​ជិត​។ប្រសិនបើ​មាន​រោគ​សញ្ញា​គ្រុនក្តៅ ក្អក ឈឺក្បាល ហៀរ​សំបោរ ឬ​ពិបាក​ដកដង្ហើម សូម​ស្វែងរក​ការពិគ្រោះ​យោបល់​នៅ​មណ្ឌល​សុខភាព ឬ​មន្ទីរពេទ្យ​ឱ្យ​បាន​ទាន់​ពេលវេលា​។

សូម​បងប្អូន​ប្រជាពលរដ្ឋ​បន្ត​ទៅ​ទទួល​វ៉ាក់សាំង​កូ​វី​ដ​-១៩ ឱ្យ​បាន​គ្រប់​ដូ​សទាំង​ដូ​ស​មូលដ្ឋាន និង​ដូ​ស​ជម្រុញ នៅ​តាម​មន្ទីរពេទ្យ ឬ​មណ្ឌល​សុខភាព ដើម្បី​ពង្រឹង​ប្រព័ន្ធ​ភាពស៊ាំ​រៀង​ៗ​ខ្លួន ឱ្យ​បាន​សម​​ស្រប​ដើម្បី បង្ការ​ការ​ឆ្លង​កូ​វី​ដ​-១៩ គ្រប់​ទម្រង់ ៕