ប្រទេសស៊ូដង់ ៖ នៅស៊ូដង់ ការវាយប្រហារដោយដ្រូនកាន់តែកើនឡើង បណ្ដាលឲ្យមនុស្សស្លាប់កាន់តែច្រើន ។ បន្ទាប់ពីការវាយប្រហារនៅក្រុងអាល់ឌីបាប បណ្ដាលឲ្យមនុស្សស្លាប់ជាង៨០នាក់ ផ្សារមួយទៀតរងការវាយប្រហារ កាលពីថ្ងៃទី១៩ តុលានៅតំបន់អាប់យ៉ៃ បណ្ដាលឲ្យមនុស្សស្លាប់ដល់យ៉ាងតិច១៥៣នាក់ទៀត ។
តួលេខនោះ ត្រូវបានប្រកាស កាលពីថ្ងៃទី២០ តុលា ដោយរដ្ឋមន្ត្រីព័ត៌មានស្ដីទីប្រចាំតំបន់ ។ រដ្ឋមន្ត្រីរូបនោះ បានចោទប្រកាន់កងទ័ពស៊ូដង់ថា បើកការវាយប្រហារលើតំបន់សម្បូរដោយប្រេងកាតនោះ ស្ថិតនៅជាប់ព្រំដែនរវាងស៊ូដង់ខាងត្បូងនិងស៊ូដង់។ នាគ្រាដំបូងអ្នកទទួលខុសត្រូវតំបន់រូបនេះ រៀបរាប់ពីមនុស្សស្លាប់៧៣នាក់ និងរបួស១៩នាក់ ។
រដ្ឋបាលតំបន់អាប់យ៉ៃបានចោទប្រកាន់ថា ការវាយប្រហារដ៏បង្ហូរឈាមនោះដោយប្រើដ្រូន ត្រូវបានធ្វើកាលពីថ្ងៃទី១៩ តុលាដោយកងទ័ពស៊ូដង់ប្រឆាំងផ្សារនេះ ។ ចំណែកព័ត៌មានមួយទៀត រៀបរាប់ពីយន្តហោះ១គ្រឿង ទម្លាក់គ្រាប់ប្រមាណជា២២គ្រាប់ចំកណ្ដាលតំបន់ពាណិជ្ជកម្មដែលមានមនុស្សច្រើនកុះករ ។ បណ្ដាអ្នកទទួលខុសត្រូវស៊ូដង់ខាងត្បូងបានចោទប្រកាន់កងទ័ពស៊ូ័ដង់ថា ជាអ្នកទទួលខុសត្រូវលើការវាយប្រហារនេះ ។
សម្រាប់ប្រជាជនស៊ីវិលស៊ូដង់រស់នៅជិតខ្សែរណសិរ្ស ការគំរាមកំហែងធំបំផុតមក ជាពិសេសការវាយប្រហារតាមអាកាសពីសំណាក់ដ្រូន ។ នៅតំបន់គ័រដូហ្វានក្នុងទីក្រុងអាល់ឌីបាប មនុស្ស៨០នាក់ដែលរង់ចាំវិលត្រឡប់មកកាន់ផ្ទះសម្បែងពួកគេវិញនៅស្ថានីយរថយន្តមួយកន្លែង បានត្រូវស្លាប់ដោយសារការវាយប្រហារពីសំណាក់ដ្រូន កាលពីយប់ថ្ងៃទី១៨តុលា ។ នេះបើតាមសាក្សីទាំងឡាយ ហើយក្នុងចំណោមជនរងគ្រោះទាំងនេះ៥០នាក់ស្លាប់នៅនឹងកន្លែង ៤៧នាក់ដឹកទៅកាន់មូលដ្ឋានជិតខាងមួយកន្លែងដែលមនុស្ស៣០នាក់ទៀតស្លាប់ដោយសាររបួសធ្ងន់ពេក ។
កាលពីថ្ងៃទី១៦ តុលា មនុស្ស៣០នាក់ស្លាប់ ក្រោយការវាយប្រហារលើផ្សារមានមនុស្សច្រើនកុះករមួយ នៅតំបន់ដាហ្វួរ ក្នុងទីក្រុងនីយ៉ាឡាត្រួតត្រាដោយកងកម្លាំងប៉ារ៉ា ។ តាមប្រភពជាច្រើនមកពីកងទ័ពស៊ូដង់ថា ការវាយប្រហារទាំង២នោះធ្វើឡើងដោយកងទ័ពរដ្ឋាភិបាលសំដៅលើពួកទាហានថ្មីដែល ទើបជ្រើសរើសដោយកងកម្លាំងប៉ារ៉ា ។
ចំណែករដ្ឋធានីស៊ូដង់ ក្រុងខាទុម ទោះបីស្ថិតក្នុងការត្រួតត្រារបស់កងទ័ពស៊ូដង់ពីខែមីនា ឆ្នាំ២០២៥មកក្ដី ក៏នៅរងការវាយប្រហារដោយដ្រូនរបស់កងកម្លាំងប៉ារ៉ា។ កាលពីថ្ងៃទី១៩ តុលា ការបាញ់លើផ្ទះមួយបណ្ដាលឲ្យមនុស្សស្លាប់៤នាក់ នៅជិត
ព្រលានយន្តហោះក្រុងខាទុម ។
ការវាយប្រហារដោយដ្រូនក្លាយជាមូលហេតុដំបូងនៃការស្លាប់បណ្ដាជនស៊ីវិលនៅស៊ូដង់់ ហើយអ.ស.បកំណត់ឃើញ ជន
ស៊ីវិលស្លាប់ដល់១១២០នាក់ ដោយសារការវាយប្រហាររបស់ដ្រូន ក្នុងឆមាសទី១នៃឆ្នាំ២០២៦នេះ ។ ចំនួននេះ នៅបន្ថែមជនស៊ីវិលច្រើននាក់ស្លាប់ក្នុងសប្ដាហ៍នេះទៀត ៕
ចែករំលែកព័តមាននេះ