រាជធានីភ្នំពេញ៖ កម្ពុជា និងថៃ បានឯកភាពគ្នាក្នុងការបង្កើតខ្សែទំនាក់ទំនងផ្ទាល់ (Hotline) រវាងមេបញ្ជាការកងទ័ពជើងទឹកនៃប្រទេសទាំងពីរ ដើម្បីដោះស្រាយបញ្ហាដែលអាចកើតមានឡើងនៅដែនសមុទ្រ នៅក្នុងអំឡុងពេលភាគីទាំងពីរប្រឈម ឬកំពុងដោះស្រាយ នេះបើតាមឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។
ថ្លែងក្នុងកិច្ចសម្ភាសន៍ជាមួយទូរទស្សន៍ជាតិកម្ពុជា (ទទក) នាថ្ងៃទី២០ ខែតុលា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់យ៉ាងដូច្នេះថា៖ «លទ្ធផលនៃកិច្ចប្រជុំលើកទី២ គណៈកម្មការផ្សះផ្សាក្រោម UNCLOS រវាងកម្ពុជា និងថៃ យើងបានឯកភាពគ្នាបង្កើតខ្សែទំនាក់ទំនងផ្ទាល់មួយ (Hotline) រវាងមេបញ្ជាការនៃកងទ័ពជើងទឹកនៃប្រទេសទាំងពីរ ដើម្បីដោះស្រាយបញ្ហានានានៅដែនសមុទ្រ ដែលអាចកើតឡើង ជាពិសេសនោះ នៅក្នុងពេលដែលយើងកំពុងធ្វើការចរចាជាមួយគ្នា»។
ឯកឧត្តមឧបនាយករដ្ឋមន្ត្រី ក៏បានឱ្យដឹងបន្ថែមថា៖ «មួយទៀត យើងក៏បានឈានដល់ការឯកភាពគ្នាក្នុងកម្រិតភាពជាការទូតសមស្រប ដើម្បីអនុញ្ញាតឱ្យប្រទេសទាំងពីរ រក្សានូវប្រព័ន្ធទំនាក់ទំនងជាមួយគ្នាសម្រាប់ដោះស្រាយបញ្ហានានាតាមផ្លូវការទូត មិនមែនតាមផ្លូវយោធានោះទេ»។
ប្រមុខការទូតកម្ពុជា បានឱ្យដឹងទៀតថា វិធានការទាំងឡាយ ក៏ដូចជាវិធានការកសាងទំនុកចិត្តដែលផ្សព្វផ្សាយដោយតុលាការមជ្ឈត្តិការភាគច្រើនជាកិច្ចព្រមព្រៀង ដែលមានស្រាប់រួចហើយ ប៉ុន្តែហេតុអ្វីបានជាយើងយកមកនិយាយ ? ភាពខុសគ្នានោះគឺ យើងធ្វើឡើងនៅក្រោមដំបូលអគារមួយ ដែលជាទីស្នាក់ការរបស់តុលាការយុត្តិធម៌អន្តរជាតិ (ICJ) និងតុលាការអចិន្ត្រៃយ៍មជ្ឈត្តិការ ដែលមានទម្ងន់ទាំងខាងសីលធម៌ និងខាងនយោបាយច្បាប់ ផងដែរ ៕
ចែករំលែកព័តមាននេះ