រាជធានីភ្នំពេញ ៖ បុរសម្នាក់ បានទៅខ្ចីប្រាក់ពីក្រុមហ៊ុនប្រាក់កម្ចីមួយកន្លែង ជាង១ម៉ឺនដុល្លារ យកទៅទិញរថយន្ត ១គ្រឿង ហើយទើបបង់ប្រាក់រំលស់ឲ្យក្រុមហ៊ុន បានតែមួយចំនួនប៉ុណ្ណោះ ក៏គេចវេស លែងបង់បន្តទៀត។ បន្ទាប់មក បានដោះប្រព័ន្ធតាមដានសុវត្ថិភាព GPS បោះចោល រួចយករថយន្តខាងលើ ទៅដាក់បញ្ចាំយកប្រាក់ ហើយគេចខ្លួនបាត់ស្រមោល។ លុះក្រោយមក ក្រុមហ៊ុនខាងលើបានរកឃើញអ្នកទទួលបញ្ចាំ ដែលបង្ហោះលក់រថយន្តនោះ តាមប្រព័ន្ធតេលេក្រាម ក៏បានណាត់ជួប រួចឃាត់ខ្លួនប្រគល់ឲ្យប៉ុស្តិ៍នគរបាលរដ្ឋបាលព្រៃ.ស ចាត់ការតាមច្បាប់តែម្ដង ។
ការឃាត់ខ្លួននោះ បានធ្វើឡើងកាលពីថ្ងៃទី១៨ ខែតុលា ឆ្នាំ២០២៦ នៅចំណុចស្ថានីយ៍ប្រេងឥន្ធនៈ តេលា ស្ថិតនៅតាមបណ្តោយផ្លូវ៣០ម៉ែត្រ ភូមិព្រៃទីទុយ សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យ ដែលជាអ្នកខ្ចីប្រាក់ក្រុមហ៊ុនខាងលើ ទិញរថយន្តបង់រំលស់រួចយកទៅដាក់បញ្ចាំ និងគេចវេសមិនបង់ប្រាក់នោះឈ្មោះ ម៉ឹង រ៉ា ភេទប្រុស អាយុ៣៦ឆ្នាំ ។ រីឯអ្នកទទួលបញ្ចាំរថយន្តពីជនសង្ស័យខាងលើ ហើយត្រូវតំណាងក្រុមហ៊ុនប្រាក់កម្ចីឃាត់ខ្លួនឈ្មោះ សុខ ពៅរិទ្ធតុលា ភេទប្រុស អាយុ២៤ឆ្នាំ ជនជាតិខ្មែរ មុខរបរទិញ-លក់រថយន្ត ស្នាក់នៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ដោយឡែក តំណាងក្រុមហ៊ុន ដែលឃាត់ខ្លួនជនសង្ស័យជាអ្នកទទួលបញ្ចាំរថយន្តប្រគល់ឲ្យនគរបាលឈ្មោះ សេង លីហួត ភេទប្រុស អាយុ៣៣ឆ្នាំ ជនជាតិខ្មែរ មានទីលំនៅក្នុងខណ្ឌដង្កោ រាជធានីភ្នំពេញ ។
នគរបាល បានប្រាប់ថា កាលពីថ្ងៃទី៣០ ខែមីនា ឆ្នាំ២០២៦ កន្លងទៅជនសង្ស័យឈ្មោះ ម៉ឹង រ៉ា បានទាក់ទងទៅក្រុមហ៊ុន ដើម្បីស្នើសុំប្រាក់កម្ចី ចំនួន១៦,៥០០ដុល្លារអាមេរិក (មួយម៉ឺនប្រាំមួយពាន់ប្រាំរយដុល្លារអាមេរិក)។ បន្ទាប់មកបានទិញរថយន្ត១គ្រឿង ម៉ាក TOYOTA PRIUS ផលិតឆ្នាំ២០១០ ពណ៌ខ្មៅ ពាក់ស្លាកលេខភ្នំពេញ 2BF-4008 ដោយបង់រំលស់រយៈពេល៨៤ខែ និងបង់ប្រាក់ប្រចាំខែ ក្នុង១ខែចំនួន៤៣៥ដុល្លារអាមេរិក (បីរយសាមសិបប្រាំដុល្លារអាមេរិក) ពោលគឺរយៈពេល៧ឆ្នាំ សរុបទឹកប្រាក់ ៣៦,៥៤០ដុល្លារអាមេរិក ។
នគរបាល បានប្រាប់ឲ្យដឹងបន្តថា ក្រោយមកឈ្មោះ ម៉ឹង រ៉ា នេះមិនបានបំពេញកាតព្វកិច្ចបង់ប្រាក់តាមកិច្ចសន្យានោះទេ ដោយបង់បានមួយចំនួនប៉ុណ្ណោះ ក៏ឈប់បង់។ នៅសល់ប្រាក់កម្ចីដើមចំនួន១៦.២២៩ដុល្លារអាមេរិក (មួយម៉ឺនប្រាំមួយពាន់ពីរយម្ភៃប្រាំបួនដុល្លារអាមេរិក)ទៀត មិនព្រមបង់បន្តឡើយ។ ជនសង្ស័យរូបនេះ បានគេចវេសពីការទទួលខុសត្រូវ និងកាត់ផ្តាច់ប្រព័ន្ធ GPS ដែលក្រុមហ៊ុនបានបំពាក់នៅលើរថយន្តខាងលើ ធ្វើឲ្យក្រុមហ៊ុនពិបាកតាមដានរកទីតាំងរថយន្ត ។
នគរបាល បានប្រាប់ឲ្យដឹងបន្តថា បន្ទាប់មកជនសង្ស័យឈ្មោះ ម៉ឹង រ៉ា បានយករថយន្តខាងលើទៅដាក់បញ្ចាំឲ្យជនសង្ស័យឈ្មោះ សុខ ពៅរិទ្ធតុលា ដែលជាអ្នកទិញ-លក់រថយន្ត ប៉ុន្តែក្រុមហ៊ុន ដែលជាម្ចាស់ប្រាក់កម្ចីមិនបានដឹងនោះឡើយ។ ចំណែកជនសង្ស័យឈ្មោះ ម៉ឹង រ៉ា ក្រោយពីយករថយន្តខាងលើទៅដាក់បញ្ចាំច្រើនខែ មិនបានទៅលស់យកវិញនោះទេ ទើបជនសង្ស័យឈ្មោះ សុខ ពៅរិទ្ធតុលា ដែលជាអ្នកទទួលបញ្ចាំនោះ បានបង្ហោះលក់រថយន្តម៉ាក TOYOTA PRIUS ខាងលើតាមគណនីតេឡេក្រាមរបស់ខ្លួនឈ្មោះ «តុលា» ។
នគរបាល បានប្រាប់ឲ្យដឹងបន្ថែមថា រហូតដល់ថ្ងៃទី១៨ ខែតុលា ឆ្នាំ២០២៦ តំណាងក្រុមហ៊ុន បានប្រទះឃើញការបង្ហោះនោះ
ក៏បានទាក់ទងទៅជនសង្ស័យឈ្មោះ សុខ ពៅរិទ្ធតុលា ដើម្បីសុំមើលរថយន្ត និងបានណាត់ជួបគ្នា នៅស្ថានីយប្រេងឥន្ធនៈតេលា ស្ថិតនៅតាមបណ្តោយផ្លូវ៣០ម៉ែត្រ ក្នុងភូមិព្រៃទីទុយ សង្កាត់ព្រៃស ខណ្ឌដង្កោ។ ជនសង្ស័យ ក៏បានបើករថយន្តម៉ាក TOYOTA PRIUS ដែលទទួលបញ្ចាំទៅតាមការណាត់ជួបនៅទីតាំងខាងលើ ហើយក៏ត្រូវបានតំណាងក្រុមហ៊ុនឃាត់ខ្លួនរួមជាមួយរថយន្ត រួចរាយការណ៍ទៅនគរបាល ឲ្យចុះអន្តរាគមន៍ នាំយកទៅសាកសួរតែម្ដង ។
នគរបាល បានដកហូតរថយន្តម៉ាក TOYOTA PRIUS ខាងលើ និងស្លាកលេខភ្នំពេញ 2BF-4008 ចំនួន២បន្ទះ ដែលជនសង្ស័យ សុខ ពៅរិទ្ធតុលា ដោះចេញពីរថយន្តនោះ, ទូរសព្ទដៃម៉ាក iPhone16 ពណ៌ខៀវ១គ្រឿង, នាឡិកាដៃ ម៉ាក ZINVO ១គ្រឿង ។ ក្រោយមកតំណាងក្រុមហ៊ុន បានដាក់ពាក្យបណ្តឹងលើឈ្មោះ សុខ ពៅរិទ្ធតុលា និងឈ្មោះ ម៉ឹង រ៉ា ដើម្បីឲ្យនគរបាល ចាត់ការតាមនីតិវិធីច្បាប់ ។
ពេលនគរបាលសាកសួរជនសង្ស័យឈ្មោះ សុខ ពៅរិទ្ធតុលា បានឆ្លើយសារភាពថា ខ្លួនពិតជាបានទទួលបញ្ចាំរថយន្តខាងលើពីឈ្មោះ ម៉ឹង រ៉ា ក្នុងតម្លៃ ៥.០០០ដុល្លារអាមេរិក (ប្រាំពាន់ដុល្លារអាមេរិក) ហើយបានយករថយន្តនោះ ទៅដាក់លក់ប្រាកដមែន ។ បន្ទាប់ពីការសួរនាំ និងកសាងសំណុំរឿងរួចរាល់ នៅព្រឹកថ្ងៃទី២០ ខែតុលា ឆ្នាំ២០២៦ នគរបាលបានបញ្ជូនជនសង្ស័យម្នាក់នេះទៅកាន់សាលាដំបូងរាជធានីភ្នំពេញហើយ ៕
ចែករំលែកព័តមាននេះ