ទីក្រុងឥស្លាមម៉ាបាត៖ អនុប្រធានាធិបតីអាមេរិក លោកជេឌីវេន និងគណៈប្រតិភូអ៊ីរ៉ង់បានធ្វើដំណើរទៅដល់ប្រទេសប៉ាគីស្ថានហើយដើម្បីត្រៀមចរចាគ្នាដោយប្រយោល។ ភាគីទាំង២ជួបជាមួយនាយករដ្ឋមន្ត្រីប៉ាគីស្ថានដាច់ដោយឡែកពីគ្នា។ គេរំពឹងថាការចរចាគ្នានឹងចាប់ផ្ដើមនៅល្ងាចនេះ។ ដោយឡែក ពាក់ព័ន្ធនឹងបញ្ហាលីបង់ ក្រុមអ្នកការទូតលីបង់ និងអ៊ីស្រាអែលក៏ត្រៀមចរចាគ្នាឱ្យមានបទឈប់បាញ់ផងដែរនៅទីក្រុងវ៉ាស៊ីនតោននាសប្ដាហ៍ក្រោយ។
ការអនុវត្តបទឈប់បាញ់រវាងអាមេរិក និងអ៊ីរ៉ង់នៅថ្ងៃទី១ក៏ជាថ្ងៃសោកសៅរ៍សម្រាប់លីបង់ផងដែរនៅពេលអ៊ីស្រាអែលវាយប្រហារយ៉ាងខ្លាំងក្លាបំផុតទៅលើទីតាំងជាង១រយកន្លែងរបស់ក្រុមហេសបូឡាស្លាប់មនុស្ស២៥៤នាក់ និងរបួសជាង១ពាន់នាក់។ អនុប្រធានាធិបតីអាមេរិក និងនាយករដ្ឋន្ត្រីប៉ាគីស្ថានជួបគ្នានៅល្ងាចនេះ បន្ទាប់ពីអ៊ីរ៉ង់ និងនាយករដ្ឋរដ្ឋមន្ត្រីប៉ាគីស្ថានជួបគ្នាកាលពីព្រឹកមិញ។
នៅក្នុងចំណោមគណៈប្រតិភូដែលអមដំណើរលោកវេនក៏មានប្រេសិតពិសេសរបស់លោកត្រាំ និងកូនប្រសារបស់លោកត្រាំផងដែរ។ ចំណែកនាយករដ្ឋមន្ត្រីប៉ាគីស្ថានទទួលគណៈប្រតិភូទាំងនោះដោយមានឧបនាយករដ្ឋមន្ត្រីប៉ាគីស្ថាន, រដ្ឋមន្ត្រីការបរទេស និងរដ្ឋមន្ត្រីក្រសួងមហាផ្ទៃចូលរួមជាមួយលោកផងដែរ។ នេះបើយោងតាមសេចក្ដីប្រកាសព័ត៌មានចេញពីខុទ្ទកាល័យនាយករដ្ឋមន្ត្រី។ នៅក្នុងជំនួបនោះគ្មានការធ្វើសន្និសីទសារព័ត៌មានទេ។
នាយករដ្ឋមន្ត្រីប៉ាគីស្ថានអះអាងថាភាគីទាំង២មានឆន្ទៈក្នុងការចរចាគ្នាប្រកបដោយការស្ថាបនា និងសង្ឃឹមថាការចរចាគ្នាលើកនេះជាច្រកផ្លូវឆ្ពោះទៅរកការកសាងសន្តិភាពដ៏យូរអង្វែងនៅក្នុងតំបន់។ នេះបើយោងតាមសេចក្ដីប្រកាសចេញពីខុទ្ទកាល័យរបស់លោក។ ដោយឡែក នៅក្នុងឱកាសជួបគ្នារវាងនាយករដ្ឋមន្ត្រីប៉ាគីស្ថាន និងគណៈប្រតិភូអ៊ីរ៉ង់កាលពីព្រឹកមិញ ប៉ាគីស្ថានអះអាងថាខ្លួនកំពុងសិក្សាអំពីគោលជំហររបស់អាមេរិក៕ ប្រភព៖ ស៊ីអឹនអឹន (CNN) និងប្រភពដទៃទៀត
ចែករំលែកព័តមាននេះ