សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងដោយសេចក្តីសង្ឃឹមថា ពិធីបុណ្យចូលឆ្នាំប្រពៃណីជាតិនៅសប្តាហ៍ក្រោយនេះ នឹងប្រពឹត្តិទៅដោយសេចក្តីសុខសប្បាយ ហើយគ្មានគ្រោះថ្នាក់ចរាចរណ៍ ។ ថ្លែងនៅក្នុងអំឡុងពេលបើកការដ្ឋានគម្រោងគ្រប់គ្រងធនធានទឹកចម្រុះហ្វូណនតេជោដំណាក់កាលទី២…
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងដោយសេចក្តីសង្ឃឹមថា ពិធីបុណ្យចូលឆ្នាំប្រពៃណីជាតិនៅសប្តាហ៍ក្រោយនេះ នឹងប្រពឹត្តិទៅដោយសេចក្តីសុខសប្បាយ ហើយគ្មានគ្រោះថ្នាក់ចរាចរណ៍ ។
ថ្លែងនៅក្នុងអំឡុងពេលបើកការដ្ឋានគម្រោងគ្រប់គ្រងធនធានទឹកចម្រុះហ្វូណនតេជោដំណាក់កាលទី២ នៅថ្ងៃទី ១១ ខែមេសា ឆ្នាំ២០២៦ សម្តេចធិបតីបានលើកទឹកចិត្តឲ្យពលរដ្ឋគ្រប់គ្នាយកចិត្តទុកដាក់ហើយប្រុងប្រយ័ត្នរឿងសន្តិសុខ និងសុវត្ថិភាពចរាចរណ៍ ។
សម្តេចធិបតីបានថ្លែងថា ចរាចរណ៍ត្រូវតែប្រយ័ត្ន ទោះបីជាប៉ូលិសអត់ផាកក៏ដោយ តែមិនមែនមានន័យថា សល់លុយយកទៅផឹកស្រវឹង ហើយទៅជិះបុកគេទេ ។ បើបុកគេបែបនេះអត់រួចខ្លួនឡើយ ។
សម្តេចធិបតីបានបញ្ជាក់ថា «រឿងស្រវឹងបុកគេ អត់រួចខ្លួនទេ ។ គ្រប់គ្នាចាំបាច់គឺត្រូវតែទទួលខុសត្រូវ » ។ សម្តេចធិបតីបានបន្ថែមថា ពេលបើកបរសុខៗ វាកើតមានគ្រោះថ្នាក់ចរាចរណ៍ វាគឺជារឿងមួយ ប៉ុន្តែបើសិនជាយើងដឹងថា ស្រវឹងហើយនៅតែបើកបរ ហើយទៅបង្កគ្រោះថ្នាក់ គឺចាំបាច់ត្រូវតែទទួលខុសត្រូវតាមច្បាប់ដាច់ខាត ។
សម្តេចធិបតីបានបញ្ជាក់ថា សម័យឥឡូវឡានវាទំនើប ប្រព័ន្ធ Airbag ពីមុនមានតែ២ទេ ប៉ុន្តែឥឡូវមានដល់ទៅ១២ ដូច្នេះ ពេលគ្រោះថ្នាក់មនុស្សនៅខាងក្នុងអត់អីទេ ប៉ុន្តែកុំភ្លេចថា មនុស្សខាងក្រៅ គឺនៅតែគ្រោះថ្នាក់ដដែលទេ ។
សម្តេចធិបតីសង្កត់ធ្ងន់ថា «កុំអាងខ្លួនឯងជិះឡានទំនើបបុកគេខ្លួនឯងអត់អី តែអ្នកដទៃគ្រោះច្នាក់ដោយសារយើង ។ ឡានទំនើបប៉ុណ្ណាក៏ដោយ ពេលយើងស្រវឹងទៅបុកគេ គេស្លាប់ យើងត្រូវតែទទួលខុសត្រូវ» ។
សម្តេចធិបតីបានបន្ថែមថា «បើមិនស្លាប់ខ្លួនឯង ដោយសារតែឡានវាទំនើប កុំសម្លាប់គេនៅខាងក្រៅ» ។
ចែករំលែកព័តមាននេះ