រាជធានីភ្នំពេញ ៖ យោងតាមព្រះរាជក្រឹត្យចុះថ្ងៃទី០៩ ខែមេសា ឆ្នាំ២០២៦ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានប្រោសព្រះរាជទានដំឡើងគោរម្យងារកែវ…
រាជធានីភ្នំពេញ ៖ យោងតាមព្រះរាជក្រឹត្យចុះថ្ងៃទី០៩ ខែមេសា ឆ្នាំ២០២៦ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានប្រោសព្រះរាជទានដំឡើងគោរម្យងារកែវ នរោត្តម ចេណ្ណា ជាអ្នកអង្គម្ចាស់ក្សត្រីយ៍ នរោត្តម ចេណ្ណា ។
ព្រះរាជ្យក្រិតតែងតាំងនេះ ត្រូវបានប្រជារាស្ត្រនៅទូទាំងព្រះនគរសម្តែងនូវសេចក្តីអបអរសាទរជាមួយនឹងសេចក្តីរំភើបរីករាយចំពោះដំណឹងដ៏វិសេសវិសាលមួយនេះ។
បើយោងតាមការចុះផ្សាយក្រុមដំណើរខ្មែរបានអោយដឹងថា អ្នកអង្គម្ចាស់ក្សត្រីយ៍ ចេណ្ណា បានកសាងគុណសម្បត្តិជាច្រើនលើវិស័យសិល្បៈវប្បធម៌ និងមនុស្សធម៌ ព្រមទាំងដើរតួនាទីយ៉ាងសំខាន់ក្នុងការចូលរួមចំណែកលើកស្ទួយព្រះកេរ្តិ៍នាមនៃព្រះរាជវង្សានុវង្សខ្មែរទៀតផង ។
តាំងពីកុមារភាព អ្នកអង្គម្ចាស់ក្សត្រីយ៍ នរោត្តម ចេណ្ណា គឺជាកុមារីលុះដោយគន្លងធម៌ ស្តាប់ការអប់រំទូន្មានចរិយា សីលធម៌ សុជីវធម៌ តាមព្រះដំបូន្មានដ៏ថ្លៃថ្លានៃសម្តេចក្រុមព្រះ នរោត្តម ច័ក្រពង្ស់ ជាព្រះឯយ្យកា និងព្រះអង្គម្ចាស់ក្សត្រី នរោត្តម បុប្ផារី ជាព្រះមាតា ព្រមទាំងការប្រៀនប្រដៅពីអ្នកម្នាង ឌួង ឌីយ៉ាត ជាជីដូនបង្កើត ។
ចំពោះការសិក្សារៀនសូត្រវិញ អ្នកអង្គម្ចាស់ក្សត្រីយ៍ ជាសិស្សពូកែឆ្លាត វៀងវៃ រៀនឆាប់ចេះចាំចំណាំលឿនរហ័សស្ទើរតែគ្រប់មុខវិជ្ជា រហូតអាចអានសរសេរ និងសន្ទនាទាំងទម្រង់ធម្មតា និងទម្រង់ការទូតបានដល់ទៅ៥ភាសា រួមមាន ភាសាខ្មែរ ភាសាអង់គ្លេស ភាសាបារាំង ភាសាចិន និងភាសាថៃ ។
តាំងពីមានព្រះជន្ម៥វស្សាមក រាល់ពេលទំនេរពីការសិក្សាចំណេះដឹងទូទៅ អ្នកអង្គម្ចាស់ក្សត្រីយ៍ ក៏បានឆ្លៀតរៀនច្រៀងចម្រៀងសម័យ និងបុរាណ ព្រមទាំងរៀនរាំរបាំព្រះរាជទ្រព្យផងដែរ ។
ដោយមានទេពកោលស្យខ្ពស់លើវិស័យសិល្បៈ អ្នកអង្គម្ចាស់ក្សត្រីយ៍ ទទួលបានការរីកចម្រើនពីមួយឆ្នាំទៅមួយឆ្នាំ រហូតអភិវឌ្ឈន៍ខ្លួនក្លាយជាតារាលំដាប់កំពូលប្រចាំប្រទេសកម្ពុជា ហើយបានចូលរួមចំណែកយ៉ាងធំធេងក្នុងការលើកស្ទួយផ្សព្វផ្សាយសិល្បៈវប្បធម៌ប្រពៃណីទំនៀមទម្លាប់ខ្មែរដ៏ល្អផូរផង់ ទៅកាន់ឆាកអន្តរជាតិទៀតផង ។
ក្រៅពីបម្រើនៅក្នុងវិស័យសិល្បៈខ្មែរ អ្នកអង្គម្ចាស់ក្សត្រីយ៍ ក៏បានចូលរួមចំណែកក្នុងការចែករំលែកក្តីស្រឡាញ់ និងធនធានថវិកាតាមរយៈការរៀបចំកម្មវិធីសប្បុរសធម៌នានា តួយ៉ាងដូចជានៅក្នុងពេលដែលកម្ពុជារងទុក្ខពីការឈ្លានពានរបស់ប្រទេសថៃ អ្នកអង្គម្ចាស់ក្សត្រីយ៍ បានបង្ហាញខ្លួននៅជំរំជនភៀសសឹកជាច្រើនលើក ដែលជាការផ្តល់កម្លាំងចិត្ត និងផ្តល់ស្នាមញញឹមក្នុងនាមជាខ្មែរឈាមតែមួយ ។ នៅក្នុងអំឡុងពេលនោះផងដែរ អ្នកអង្គម្ចាស់ក្សត្រីយ៍ ក៏បានបញ្ចេញវីដេអូជាភាសាខ្មែរ ភាសាអង់គ្លេស ភាសាចិន ទៅកាន់ពិភពលោកអោយដឹងអំពីអំពើឈ្លានពានដ៏គគ្លើនរបស់ប្រទេសសៀមមកលើកម្ពុជា។
ទន្ទឹមនឹងនេះ អ្នកអង្គម្ចាស់ក្សត្រីយ៍ នរោត្តម ចេណ្ណា ជានិមិត្តរូបដ៏ល្អថ្លៃថ្នូរសម្រាប់កុមារ និងយុវជនខ្មែរក្នុងគំរូការរៀនសូត្រ សីលធម៌ និងចរិយាសម្បត្តិ។ អ្នកអង្គម្ចាស់ក្សត្រិយ៍ ក៏ជាពុទ្ធសាសនូបត្ថម្ភដ៏ឆ្នើមមួយអង្គ ដែលបានទ្រទ្រង់គាំពារព្រះពុទ្ធសាសនាយ៉ាងសកម្មផងដែរ ។
អ្នកអង្គម្ចាស់ក្សត្រីយ៍ នរោត្តម ចេណ្ណា ប្រសូត្រនៅថ្ងៃអាទិត្យ ៤រោច ខែផល្គុន ឆ្នាំថោះ ត្រីស័ក ពុទ្ធសករាជ ២៥៥៥ ត្រូវនឹងថ្ងៃទី១១ ខែមីនា ឆ្នាំ២០១២ នាសាធារណរដ្ឋបារាំង ជាព្រះបុត្រីទី២នៃព្រះអង្គម្ចាស់ក្សត្រិយ៍ នរោត្តម បុប្ផារី និងជាព្រះនត្តានៃសម្ដេចក្រុមព្រះ នរោត្តម ច័ក្រពង្ស់ ហើយក៏ត្រូវជាព្រះនត្តានៃព្រះករុណាព្រះបាទសម្ដេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាផងដែរ ៕
ចែករំលែកព័តមាននេះ