រាជធានីភ្នំពេញ ៖ ជនសង្ស័យប្រុសស្រី ចំនួន៥នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅកាន់តុលាការ ពាក់ព័ន្ធនឹងសច្ចាកម្ម និង២៣នាក់ទៀត ដែលជាជនរងគ្រោះ បញ្ជូនទៅមន្ទីរសង្គមកិច្ចរាជធានីភ្នំពេញ…
រាជធានីភ្នំពេញ ៖ ជនសង្ស័យប្រុសស្រី ចំនួន៥នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅកាន់តុលាការ ពាក់ព័ន្ធនឹងសច្ចាកម្ម និង២៣នាក់ទៀត ដែលជាជនរងគ្រោះ បញ្ជូនទៅមន្ទីរសង្គមកិច្ចរាជធានីភ្នំពេញ នៅក្នុងការបង្ក្រាបភោជនីយដ្ឋាន និងខារ៉ាអូខេ «មហាមេឃ» ។
បើតាមកងរាជអាវុធហត្ថរាជធានីភ្នំពេញ បានឲ្យដឹងថា កាលពីវេលាម៉ោង០១រំលងអធ្រាត្រឈានចូលថ្ងៃទី០១ ខែឧសភា ឆ្នាំ២០២៦ កម្លាំងជំនាញការិយាល័យប្រឆាំងការជួញដូរមនុស្ស កងរាជអាវុធហត្ថរាជធានីភ្នំពេញ សហការជាមួយកម្លាំងមូលដ្ឋានអាវុធហត្ថខណ្ឌសែនសុខ បានបើកប្រតិបត្តិការចុះបង្ក្រាបទីតាំងភោជនីយដ្ឋាន និងខារ៉ាអូខេ ១កន្លែង យីហោ “មហាមេឃ” ស្ថិតនៅតាមបណ្ដោយផ្លូវលេខ១០១១ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ពាក់ព័ន្ធករណីបង្កប់អំពើសញ្ចាកម្ម (សម្រួលឲ្យមានអំពើពេស្យាចារ ព្រមទាំងទាញយកអត្ថប្រយោជន៍ហិរញ្ញវត្ថុ ពីអំពើពេស្យាចារ) ។
នៅក្នុងប្រតិបត្តិការនោះ បានឃាត់ខ្លួនមនុស្សសរុប ចំនួន៥៥នាក់ (ស្រី ៣៩នាក់ ប្រុស ១៦នាក់) ចាប់យកវត្ថុតាង ស្រោមអនាម័យមួយចំនួន បញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមនីតិវិធី ។
កងរាជអាវុធហត្ថ បានឲ្យដឹងទៀតថា ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញ បានរកឃើញថា ជនសង្ស័យចំនួន០៥នាក់ បញ្ជូនទៅតុលាការ ពាក់ព័ន្ធករណីអូសទាញ បញ្ចុះបញ្ចូលនារីជាបុគ្គលិក ឲ្យប្រព្រឹត្តអំពើពេស្យាចារ ដើម្បីពួកខ្លួនទទួលបានអត្ថប្រយោជន៍ ផ្នែកហិរញ្ញវត្ថុពីអំពើពេស្យាចាររបស់បុគ្គលិកនារីទាំងនោះ និងបានបញ្ជូនបុគ្គលិកនារីចំនួន ២៣នាក់ ដែលទទួលសេវាអង្គុយកំដរភ្ញៀវ ព្រមទាំងប្រព្រឹត្តអំពើពេស្យាចារ ឱ្យទៅមន្ទីរសង្គមកិច្ចរាជធានីភ្នំពេញ ដើម្បីរកសេវាផ្តល់នីតិសម្បទារជាបណ្តោះអាសន្ន។
គួរបញ្ជាក់ថា ភោជនីយដ្ឋាន និងខារ៉ាអូខេ «មហាមេឃ» ត្រូវបានកម្លាំងកងរាជអាវុធហត្ថ រាជធានីភ្នំពេញ សហការជាមួយកងរាជ អាវុធហត្ថខណ្ឌសែនសុខ ចុះបង្ក្រាបដោយសង្ស័យថា លួចលាក់បម្រើសេវាកម្មផ្លូវភេទហើយនាំខ្លួនមេការ និងបុគ្គលិកប្រុសស្រី ចំនួន៥៥នាក់ទៅសាកសួរ ។
ប្រតិបត្តិការនេះធ្វើឡើងនៅវេលាម៉ោង១យប់រំលងអធ្រាត្រចូល ថ្ងៃទី១ ខែឧសភា ឆ្នាំ២០២៦ នៅទីតាំងភោជនីយដ្ឋាន និងខារ៉ាអូខេ« មហាមេឃ » ស្ថិតនៅតាមបណ្ដោយផ្លូវលេខ១០១១ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ការឈានចុះទៅបង្ក្រាបភោជនីយដ្ឋាននេះ ក្រោយពេល ដែលសមត្ថកិច្ចបានធ្វើការស្រាវជ្រាវរកឃើញថា ទីតាំងខាងលើលួចលាក់បម្រើសេវាកម្មផ្លូវ ដោយមាននារីក្មេងជាអនិតិជន។ បន្ទាប់ពីនាំខ្លួនជនសង្ស័យទៅសាកសួរ សមត្ថកិច្ចកងរាជអាវុធហត្ថរាជធានីភ្នំពេញ រកឃើញជនសង្ស័យពាក់ព័ន្ធចំនួន ៥នាក់ បញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ និង២៣នាក់ទៀត បញ្ជូនទៅមន្ទីរសង្គមកិច្ច។ដោយឡែក២៧នាក់ ពុំពាក់ព័ន្ធ បញ្ជូនឲ្យត្រឡប់ទៅផ្ទះវិញ ៕
ចែករំលែកព័តមាននេះ