រាជធានីភ្នំពេញ ៖ ស្ត្រីជាជនដៃដល់ ដែលបានប្រើអំពើហិង្សា ដោយវាយទៅលើស្ត្រីម្នាក់ ហើយបង្ហោះវីដេអូនៅក្នុងបណ្ដាញសង្គមត្រូវបានកម្លាំងនគរបាលខណ្ឌឫស្សីកែវ សហការជាមួយនគរបាលជំនាញ កំពុងតែធ្វើការស្រាវជ្រាវ ដើម្បីតាមឃាត់ខ្លួនមកចាត់ការតាមច្បាប់ បន្ទាប់ពីមានបទបញ្ជាពីលោកឧត្តមសេនីយ៍ឯក ជូន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ។
អំពើហិង្សានេះ ត្រូវបានគេដឹងថា បានកើតឡើងតាំងពីកំឡុងបុណ្យចូលឆ្នាំថ្មីប្រពៃណីខ្មែរ នៅក្នុងសង្កាត់ច្រាំងចំរះទី១ ខណ្ឌឫស្សីកែវ រាជធានីភ្នំពេញ ហើយទើបតែបែកធ្លាយវីដេអូ នៅក្នុងបណ្ដាញសង្គម ។
ជនដៃដល់ ដែលប្រើអំពើហិង្សានេះ ត្រូវបានជនរងគ្រោះឲ្យដឹងថា ឈ្មោះ ដេវ៉ា ឌីណា ភេទស្រី (ជាធីមកាហ្វេកុង) មានលំនៅក្នុងភូមិទី៣ សង្កាត់សង្កាត់ច្រាំងចំរះទី១ ខណ្ឌឫស្សីកែវ ដែលជាកន្លែងកើតហេតុ ។
តាមស្ត្រីរងគ្រោះ បានឲ្យដឹងថា អំពើហិង្សានេះ បានកើតឡើងតាំងពីថ្ងៃទី១៧ ខែមេសា ឆ្នាំ២០២៦ ដោយសារតែជនដៃដល់ ខឹងខ្លួន បានស៊ែរវីដេអូរថយន្តអវតា ដែលត្រូវបានគេគប់នឹងវាបំផ្លាញ និងបានប្រើពាក្យពុំសមរម្យ ។
ស្ត្រីរងគ្រោះ បានឲ្យដឹងទៀតថា ដោយសារតែខ្លួន នៅក្នុងហេតុការណ៍គ្រោះថ្នាក់ចរាចរណ៍ ត្រូវបានរថយន្តអវតា បើកកៀរ ហើយក្រោយមក ត្រូវបានគេដេញវាយ និងគប់រថយន្តបណ្ដាលឲ្យរងការខូចខាត ហើយត្រូវបានគេបង្ហោះនៅក្នុងបណ្ដាញសង្គម ខ្លួនក៏បានស៊ែរវីដេអូ និងបានប្រើពាក្យពុំសមរម្យ។ លុះក្រោយមក ក៏បានដឹងទៅបងប្អូនរបស់ជនដៃដល់ បានទាក់ទងហៅខ្លួន ទៅផ្ទះនៅសង្កាត់ច្រាំងចំរះទី១ ខណ្ឌឫស្សីកែវ។ ដោយសារតែខ្លួន ត្រូវបានគេគំរាមប្ដឹង ក៏បានឯកភាពទៅតាមការណាត់ ។
ស្ត្រីរងគ្រោះ បានឲ្យដឹងទៀតថា នៅពេលទៅដល់ ជនដៃដល់ ក៏បានវាយដុំ ដោយចោទថា ខ្លួនបានជេរ និងគប់ឡានបង និងបានប្ដឹងសមត្ថកិច្ច ហៅនាងទៅសាកសួរទៀត ។
ស្ត្រីរងគ្រោះ ក៏បានបញ្ជាក់ទៀតថា មុនដំបូង ខ្លួនពុំបានដាក់ពាក្យបណ្ដឹងនោះទេ ដោយសារតែពេលថ្មីៗនេះ បានបែកធ្លាយនូវវីដេអូ អំពើហិង្សា ទើបសម្រេចចិត្តទៅដាក់ពាក្យបណ្ដឹងនៅអធិការដ្ឋានខណ្ឌឫស្សីកែវ ។
តាមក្រុមការងារព័ត៌មាន និងប្រតិកម្មរហ័ស នៃស្នងការនគរបាលរាជធានីភ្នំពេញ បានឲ្យដឹងថា ករណីហិ.ង្សានៅសង្កាត់ច្រាំងចំរេះទី១ ខណ្ឌឫស្សីកែវ ដែលបានផ្សព្វផ្សាយតាមបណ្តាញសង្គម ជនរងគ្រោះ បានមកដាក់ពាក្យបណ្តឹងនៅអធិការដ្ឋាននគរបាលខណ្ឌឫស្សីកែវ នៅថ្ងៃទី៣០ ខែមិថុនា ឆ្នាំ២០២៦ រួចហើយ។ បច្ចុប្បន្ន ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យជំនាញស្រាវជ្រាវឃាត់ខ្លួនស្ត្រី ដែលប្រើអំពើហិ.ង្សានោះហើយ ដើម្បីអនុវត្តតាមនីតិវិធី ។
តាមព័ត៌មានឲ្យដឹងទៀតថា រហូតមកដល់វេលា ថ្ងៃត្រង់ថ្ងៃទី១ ខែកក្កដា ឆ្នាំ២០២៦ ជនសង្ស័យបានគេចខ្លួនបាត់ ហើយ សមត្ថកិច្ច កំពុងតែធ្វើការស្រាវជ្រាវ ដើម្បីតាមឃាត់ខ្លួនស្ត្រីជាជន ដែលដល់រូបនោះ មកផ្តន្ទាទោសតាមច្បាប់ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ