សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានរាយការណ៍ពីប្រាក់ចំណូលជាង ១,៤ ពាន់លានដុល្លារអាមេរិកពីអាជីវកម្មរូបិយប័ណ្ណឌីជីថលគ្រីបតូ (Crypto) របស់គ្រួសារលោក កាលពីឆ្នាំមុន។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ដោយផ្អែកទៅតាមការពិនិត្យឡើងវិញលើរបាយការណ៍ហិរញ្ញវត្ថុចុងក្រោយបង្អស់របស់លោក កាលពីថ្ងៃទី៣០ ខែមិថុនា ឆ្នាំ២០២៦ (ម៉ោងនៅសហរដ្ឋអាមេរិក) ដែលបង្ហាញថា បច្ចុប្បន្នលោកប្រធានាធិបតី ត្រាំ ទទួលបានប្រាក់ចំណូលភាគច្រើនពីទ្រព្យសកម្មឌីជីថល ដែលទទួលបានផលចំណេញពីគោលនយោបាយរបស់លោក។
ឯកសារប្រកាសទ្រព្យសម្បត្តិប្រចាំឆ្នាំ ២០២៥ របស់លោក ដែលដាក់ជូនការិយាល័យសីលធម៌រដ្ឋាភិបាលសហរដ្ឋអាមេរិកបានបង្ហាញថា ក្រុមហ៊ុនលោកទទួលបានប្រាក់ជិត ៨០០ លានដុល្លារពី World Liberty Financial ដែលជាអាជីវកម្មគ្រីបតូបង្កើតឡើងដោយរូបលោក និងកូនប្រុសៗរបស់លោកផ្ទាល់។
តាមរយៈប្រាក់ចំណូលទាំងនោះ ដែលលោកប្រធានាធិបតីបានបែងចែកជាមួយសមាជិកគ្រួសារ រួមមានជាង ៥២០ លានដុល្លារអាមេរិកបានមកពីការលក់កាក់គ្រីបតូ និងជាង ២៥០ លានដុល្លារទៀត បានមកពីការលក់ភាគហ៊ុននៅក្នុងអាជីវកម្ម World Liberty។ លោក ត្រាំ ក៏បានរាយការណ៍ពីចំណូលចំនួន ៦៣៥ លានដុល្លារផ្សេងទៀតពីការលក់កាក់ Trump meme ផងដែរ។
ដូច្នេះតាមរយៈព័ត៌មានទាំងនេះ បានគូសបញ្ជាក់អំពីរបៀបដែលរូបិយប័ណ្ណគ្រីបតូ បានផ្លាស់ប្តូរទ្រព្យសម្បត្តិរបស់លោកប្រធានាធិបតី ត្រាំ គួរឱ្យកត់សម្គាល់។ ជាមួយគ្នានោះ ទីភ្នាក់ងារសារព័ត៌មាន Reuters ថ្មីៗនេះ បានប៉ាន់ប្រមាណថា គ្រួសារលោក ត្រាំ រកចំណូលបានយ៉ាងហោចណាស់ ២,៣ ពាន់លានដុល្លារពីគម្រោងនានា ដែលទាក់ទងនឹងរូបិយប័ណ្ណគ្រីបតូ ចាប់តាំងពីលោក ត្រាំ បានវិលត្រឡប់មកកាន់សេតវិមាននៅក្នុងនាមជាមេដឹកនាំកំពូលសហរដ្ឋអាមេរិកវិញក្នុងឆ្នាំ ២០២៥។ នៅពេលចូលកាន់តំណែង លោកបានចាប់ផ្តើមដាក់ចេញនូវគោលនយោបាយ និងគំនិតផ្តួចផ្តើមនានា ដែលវិស័យនេះមើលឃើញថាមានផលប្រយោជន៍។
សម្រាប់ឆ្នាំ២០២៥ ប្រធានាធិបតីក៏បានរាយការណ៍ផងដែរអំពីចំណូលជាង ៨០ លានដុល្លារ ពីការដោះស្រាយវិវាទជាមួយក្រុមហ៊ុនប្រព័ន្ធផ្សព្វផ្សាយនានា និងចំណូលចំនួន ៥២ លានដុល្លារពីក្រុមហ៊ុនរបស់លោក ដែលផ្តល់សិទ្ធិប្រើប្រាស់ឈ្មោះលោកផ្ទាល់ទៅឱ្យក្រុមហ៊ុនអភិវឌ្ឍន៍អចលនទ្រព្យនៅបរទេស ដែលជំរុញជាចម្បងដោយកិច្ចព្រមព្រៀងជាមួយដៃគូនានានៅតំបន់មជ្ឈិមបូព៌ា៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ