អាវុធហត្ថខេត្តស្ទឹងត្រែង បង្ក្រាបករណីដឹកជញ្ជូនគ្រឿងញៀ.នឆ្លងដែន ៣៧គីឡូ នៅតាមភូមិសាស្ត្រទន្លេមេគង្គ
- ស្ទឹងត្រែង
ខេត្តស្ទឹងត្រែង៖កម្លាំងកងរាជអាវុធហត្ថខេត្តស្ទឹងត្រែង បានបើកប្រតិបត្តិការបង្ក្រាបករណីជួញដូរ និង ដឹកជញ្ជូនគ្រឿងញៀនដ៏ធំមួយ ដោយដកហូតបានសារធាតុញៀនប្រភេទមេតំហ្វេតាមីន (ICE) ជិត ៣៨គីឡូក្រាម នៅចំណុចកន្ទុយកោះហឹប ភូមិកោះហឹប ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។
ប្រតិបត្តិការបង្ក្រាបនេះធ្វើឡើងកាលពីវេលាម៉ោង ២១និង២០នាទីយប់ ថ្ងៃទី៣០ ខែមិថុនា ឆ្នាំ២០២៦ ដោយកម្លាំងកងរាជអាវុធហត្ថ ស្នាក់ការសន្តិសុខលេខ៧៤៧ ដឹកនាំបញ្ជាផ្ទាល់ដោយ លោក ឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្តស្ទឹងត្រែង សហការយ៉ាងជិតស្និទ្ធជាមួយកម្លាំងមន្ទីរបរិស្ថានខេត្ត ក្នុងកិច្ចប្រតិបត្តិការស្ទាក់បង្ក្រាបបទល្មើសគ្រឿងញៀននៅតាមភូមិសាស្ត្រដងទន្លេមេគង្គ។
យោងតាមប្រភពព័ត៌មាន ពីសមត្ថកិច្ច ក្នុងប្រតិបត្តិការផ្ទាល់អោយដឹងថា ជនសង្ស័យបានដឹងខ្លួនមុន និងបានរត់គេចខ្លួនបាត់ស្រមោល ដោយបន្សល់ទុកនូវវត្ថុតាងថ្នាំញៀនមួយចំនួនធំ។ក្រោយរឹបអូសវត្ថុតាងក្នុងវេលាកើតហេតុរួចមក លុះមកដល់វេលាម៉ោង ០៩និង៥០នាទីព្រឹក ថ្ងៃទី០១ ខែកក្កដា ឆ្នាំ២០២៦ ករណីនេះបានឈានដល់ដំណាក់កាលត្រួតពិនិត្យ និងថ្លឹងវត្ថុតាងជាផ្លូវការ នៅបញ្ជាការដ្ឋានកងរាជអាវុធហត្ថខេត្តស្ទឹងត្រែង ក្រោមវត្តមានលោក សរ សុពុត្រា អភិបាល នៃគណៈអភិបាលខេត្តស្ទឹងត្រែង លោក អ៊ន រី ព្រះរាជអាជ្ញារង អមសាលាដំបូងខេត្តស្ទឹងត្រែង លោក ឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្ត លោកប្រធានមន្ទីរ និងមន្ត្រីនៃមន្ទីរបរិស្ថានខេត្តស្ទឹងត្រែងជាលទ្ធផលនៃការត្រួតពិនិត្យវត្ថុតាងគ្រឿងញៀនដែលបានរឹបអូសខាងលើជាប្រភេទ មេតំហ្វេតាមីន (ICE / ទឹកកក)ចំនួន ៣៧ កញ្ចប់ធំ ទម្ងន់សរុប៖ ៣៧,៧១១.៧ ក្រាម (ថ្លឹងទាំងសម្បកថង់) ឬប្រហាក់ប្រហែលជិត ៣៨ គីឡូក្រាម។
បច្ចុប្បន្ន វត្ថុតាងទាំងអស់ត្រូវបានរក្សាទុកជាបណ្តោះអាសន្ន ខណៈកម្លាំងជំនាញនៃការិយាល័យប្រឆាំងគ្រឿងញៀន កងរាជអាវុធហត្ថខេត្ត កំពុងដុតដៃដុតជើងកសាងសំណុំរឿងតាមនីតិវិធី ដើម្បីបញ្ជូនទៅកាន់អយ្យការអមសាលាដំបូងខេត្តស្ទឹងត្រែង ចាត់ការបន្តទៅតាមផ្លូវច្បាប់ និងដេញប្រមាញ់ស្វែងរកតម្រុយដើម្បីចាប់ខ្លួនជនសង្ស័យដែលរត់គេចខ្លួនមកផ្តន្ទាទោសឱ្យខានតែបាន៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ