កម្ពុជា និងសហរដ្ឋអាមេរិក បានឈានដល់ការបោះជំហានថ្មីមួយ ក្នុងការពង្រឹងទំនាក់ទំនងវិស័យអាកាសចរណ៍ដែលមិនធ្លាប់មានពីមុនមក បន្ទាប់ពីភាគីទាំងពីរ បានចុះហត្ថលេខាលើកិច្ចព្រមព្រៀង «បើកចំហជើងមេឃ» (Open Skies Agreement) ដែលជាកិច្ចព្រមព្រៀងដឹកជញ្ជូនតាមផ្លូវអាកាសទ្វេភាគីលើកដំបូងរវាងប្រទេសទាំងពីរ ។
រដ្ឋលេខាធិការដ្ឋានអាកាសចរណ៍ស៊ីវិល បានអោយដឹងថា ពិធីចុះហត្ថលេខានេះបានប្រព្រឹត្តទៅនៅរសៀលថ្ងៃទី៣០ ខែមិថុនា ឆ្នាំ២០២៦ នៅក្រសួងការបរទេសសហរដ្ឋអាមេរិក នាទីក្រុងវ៉ាស៊ីនតោនឌីស៊ី ដោយភាគីកម្ពុជា ត្រូវបានដឹកនាំដោយលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល ខណៈភាគីសហរដ្ឋអាមេរិក ត្រូវបានតំណាងដោយលោក គ្រីស្តូហ្វ័ ឡេនដូ ( Cristopher Landau) អនុរដ្ឋមន្ត្រីការបរទេសសហរដ្ឋអាមេរិក ។
កិច្ចព្រមព្រៀងនេះ មានគោលបំណងពង្រឹងកិច្ចសហប្រតិបត្តិការអាកាសចរណ៍រវាងប្រទេសទាំងពីរ តាមរយៈការបង្កើនសេរីភាពក្នុងការដឹកជញ្ជូនតាមផ្លូវអាកាស និងការបង្កើតបរិយាកាសប្រកួតប្រជែងដោយស្មើភាព ស្របតាមស្តង់ដារអន្តរជាតិ ។
ការចុះហត្ថលេខាលើកិច្ចព្រមព្រៀង «បើកចំហជើងមេឃ»នេះ ត្រូវបានចាត់ទុកថា ជាព្រឹត្តិការណ៍ប្រវត្តិសាស្ត្រមួយសម្រាប់ទំនាក់ទំនងកម្ពុជា-សហរដ្ឋអាមេរិក ក្នុងវិស័យអាកាសចរណ៍ដោយវានឹងជួយពង្រីកការតភ្ជាប់ផ្លូវអាកាសរវាងប្រទេសទាំងពីរឆ្ពោះទៅរកប្រព័ន្ធដឹកជញ្ជូនតាមផ្លូវអាកាស ដែលមានស្តង់ដារទំនើបខ្ពស់បំផុត ។
លើសពីនេះ កិច្ចព្រមព្រៀងនេះ ត្រូវបានរំពឹងថា នឹងរួមចំណែកជំរុញការវិនិយោគ ពាណិជ្ជកម្ម ទេសចរណ៍ និងការផ្លាស់ប្តូរប្រជាជនរវាងកម្ពុជា និងសហរដ្ឋអាមេរិក ក៏ដូចជា បង្កើនឱកាសសម្រាប់ក្រុមហ៊ុនអាកាសចរណ៍នៃប្រទេសទាំងពីរក្នុងការពង្រីកបណ្តាញជើងហោះហើរ និងកិច្ចសហប្រតិបត្តិការពាណិជ្ជកម្មនាពេលអនាគត ។
ការឈានដល់កិច្ចព្រមព្រៀងនេះ ក៏ឆ្លុះបញ្ចាំងពីការបន្តពង្រឹងទំនាក់ទំនងទ្វេភាគីរវាងកម្ពុជា និងសហរដ្ឋអាមេរិក និងការប្តេជ្ញាចិត្តរួមគ្នាក្នុងការអភិវឌ្ឍវិស័យអាកាសចរណ៍ឱ្យកាន់តែមានប្រសិទ្ធភាព សុវត្ថិភាព និងស្របតាមស្តង់ដារអន្តរជាតិ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ