រាជធានីភ្នំពេញ ៖ ម្ចាស់គណនីហ្វេសប៊ុកមានឈ្មោះ«អាឡែន» បានចូលបំភ្លឺចំពោះមុខសមត្ថកិច្ច ដោយបានសារភាពថា ខ្លួនពិតជាបានទិញទុរេននាំចូលប្រទេសថៃពិតមែន ។ នេះបើតាមសេចក្តីប្រកាសព័ត៌មាន ករណីម្ចាស់គណនីហ្វេសប៊ុកឈ្មោះ អា…
រាជធានីភ្នំពេញ ៖ ម្ចាស់គណនីហ្វេសប៊ុកមានឈ្មោះ«អាឡែន» បានចូលបំភ្លឺចំពោះមុខសមត្ថកិច្ច ដោយបានសារភាពថា ខ្លួនពិតជាបានទិញទុរេននាំចូលប្រទេសថៃពិតមែន ។ នេះបើតាមសេចក្តីប្រកាសព័ត៌មាន ករណីម្ចាស់គណនីហ្វេសប៊ុកឈ្មោះ អា ឡែន ជុំវិញរឿងទិញលក់ផ្លែទុរេន របស់អ្នកនាំពាក្យនៃស្នងការដ្ឋាននគរបាលខេត្តបាត់ដំបង ។
អ្នកនាំពាក្យស្នងការដ្ឋាននគរបាលបានឲ្យដឹងថា មកដល់ថ្ងៃទី៤ ខែឧសភា ឆ្នាំ២០២៦ នេះម្ចាស់គណនីហ្វេសប៊ុកឈ្មោះ អា ឡែន បានចូលខ្លួនមកបំភ្លឺនៅចំពោះមុខសមត្ថកិច្ចនគរបាល ជុំវិញការផ្សព្វផ្សាយក្នុងបណ្តាញសង្គមចំពោះរូបគាត់ថា បាននាំផ្លែទុរេនពីប្រទេសថៃមកក្នុងប្រទេសកម្ពុជា ។
លទ្ធផលនៃការសាកសួរ និងបំភ្លឺបានឱ្យដឹងថា គាត់ជាម្ចាស់គណនីឈ្មោះ អា ឡែន មានឈ្មោះពិត គឺឈ្មោះ លឿន សាក់ឡែន ភេទស្រី អាយុ៣១ឆ្នាំ រស់នៅភូមិភ្នំចាំចាប ឃុំបឹងរាំង ស្រុកកំរៀង ខេត្តបាត់ដំបង គាត់បន្តថា សារសំឡេងដែលបែកធ្លាយនៅតាមបណ្តាញសង្គមរឿងទិញ លក់ផ្លែទុរេនពីប្រទេសថៃ នាប៉ុន្មានថ្ងៃ កន្លងមកនេះ គឺជាសំឡេងរបស់គាត់ ដែលបានទំនាក់ទំនងជាមួយអ្នករកស៊ីទិញផ្លែទុរេនពិតមែន ។
ពីខែមេសា ដល់ដើមខែ ឧសភា ឆ្នាំ២០២៦ នេះ គាត់បានទំនាក់ទំនងជាមួយជនជាតិថៃ ធ្លាប់ស្គាល់ និងធ្លាប់រកស៊ីជាមួយគ្នានាពេលកន្លងមក ទិញផ្លែទុរេនបានចំនួន០៣លើក មានចំនួនប្រមាណ២,០០០គីឡូក្រាម (ពីរពាន់គីឡូក្រាម) ដោយសារមានអ្នកបញ្ជាទិញនៅខេត្តកំពង់ចាម ហើយទំនិញទាំង០៣ លើកនេះគាត់បានដាក់រថយន្តផ្ញើទៅឱ្យអ្នកបញ្ជាទិញនៅខេត្តកំពង់ចាមផ្ទាល់ នៅពេលគេដឹកមកដល់ ។
គាត់បានបន្តថា ឈ្មួញនៅថៃ បានរៀបចំផ្ញើមកតាមព្រំដែនកាលីន តែគាត់មិនបានដឹងថា គេផ្ញើមកតាមរបៀបណានោះទេ លុះរថយន្តដឹកមកដល់ គាត់ក៏ទទួលហើយផ្ញើទៅខេត្តកំពង់ចាមតែម្តង ។
អ្នកនាំពាក្យនៃស្នងការដ្ឋាននគរបាលខេត្តបាត់ដំបង សូមបញ្ជាក់ជូនថា ខណៈមានការបំភ្លឺបែបនេះពីឈ្មោះ លឿន សាក់ឡែន សមត្ថកិច្ចនគរបាលកំពុងបន្តធ្វើការស្រាវជ្រាវជុំវិញករណីខាងលើនេះ ជាបន្តទៀតយ៉ាងយកចិត្តទុកដាក់បំផុតឈានទៅស្វែងរកអ្នកពាក់ព័ន្ធក្នុងករណីខាងលើ ដើម្បីចាត់វិធានការស្របតាមនីតិវិធីច្បាប់ ៕
ចែករំលែកព័តមាននេះ