ខេត្តស្វាយរៀង ៖ កម្លាំងសមត្ថកិច្ចស្នងការដ្ឋាននគរបាលខេត្តស្វាយរៀង បានបើកប្រតិបត្តិការបង្ក្រាបក្រុមឧក្រិដ្ឋជន ជាមេខ្លោងចែកចាយ ជួញដូរ និងកែច្នៃគ្រឿងញៀន ជនជាតិវៀតណាម ចំនួន០៤នាក់ រឹបអូសបានគ្រឿងញៀនសរុបជាង០៣គីឡូក្រាម…
ខេត្តស្វាយរៀង ៖ កម្លាំងសមត្ថកិច្ចស្នងការដ្ឋាននគរបាលខេត្តស្វាយរៀង បានបើកប្រតិបត្តិការបង្ក្រាបក្រុមឧក្រិដ្ឋជន ជាមេខ្លោងចែកចាយ ជួញដូរ និងកែច្នៃគ្រឿងញៀន ជនជាតិវៀតណាម ចំនួន០៤នាក់ រឹបអូសបានគ្រឿងញៀនសរុបជាង០៣គីឡូក្រាម នៅក្រុងបាវិត ។
ប្រតិបត្តិការនេះ ដោយអនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចង្អុលដឹកនាំពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្ត និងដឹកនាំបញ្ជាផ្ទាល់ដោយលោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន និងដោយមានការសម្របសម្រួលពីលោកស្រី ស៊ុត យឿត ព្រះរាជអាជ្ញារង អមសាលាដំបូងខេត្តស្វាយរៀង កាលពីថ្ងៃទី៣០ ខែមេសា ឆ្នាំ២០២៦ ។
លោកឧត្តមសេនីយ៍ត្រី កែវ សុថា បានប្រាប់អ្នកព័ត៌មាននៅល្ងាចថ្ងៃទី៣ ខែឧសភា ឆ្នាំ២០២៦នេះថា ប្រតិបត្តិការនេះ កម្លាំងការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យសហការជាមួយកម្លាំងអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុង បានបើកប្រតិបត្តិការបង្ក្រាបករណីជួញដូរ ដឹកជញ្ជូន រក្សាទុក កែឆ្នៃ និងប្រើប្រាស់គ្រឿងញៀនខុសច្បាប់ នៅចំណុចបន្ទប់ជួលស្ថិតក្នុងភូមិតាបឹប សង្កាត់បាវិត ក្រុងបាវិត កម្លាំងជំនាញ ឃាត់ខ្លួនជនសង្ស័យបានចំនួន០៤នាក់ រួមមាន ៖
ទី១.ឈ្មោះ ង្វៀង វ៉ាន់ជុង ជនជាតិវៀតណាម
ទី២.ឈ្មោះ ង្វៀង ស៉ឹងនិញ ជនជាតិវៀតណាម
ទី៣.ឈ្មោះ វ៉ាន់ ឡុងវ៉ូ ជនជាតិវៀតណាម
និងទី៤.ឈ្មោះ វ៉ាង ធីហឿង ភេទស្រីជនជាតិវៀតណាម ។
ដកហូតសម្ភារវត្ថុតាង នូវសារធាតុញៀនគ្រប់ប្រភេទទម្ងន់៣៥៥៧.៦៤ក្រាម ក្នុងនោះ ៖
-ថ្នាំញៀនប្រភេទ កេតាមីន ២០២៤.៦៦ក្រាម
-ថ្នាំញៀនប្រភេទ មេតំហ្វេតាមីន ៣២១.៧៥ក្រាម
-ថ្នាំញៀនប្រភេទ ហេរ៉ូអ៊ីន ៣០.២៥ក្រាម
-ថ្នាំញៀនប្រភេទ អ៊ិចស្ដាស៊ី (គ្រាប់) ២០.២៩ក្រាម
-ថ្នាំញៀនប្រភេទ អ៊ិចស្ដាស៊ី ៤១៥.៧៩ក្រាម
-រថយន្ដ១គ្រឿង
-ម៉ូតូ៣គ្រឿង
-ទូរសព្ទដៃ០៨គ្រឿង
-ជញ្ចីងថ្លឹងថ្នាំញៀន២គ្រឿង
-លិខិតឆ្លងដែន និងបារីអេឡិចត្រូនិកមួយចំនួន ។
បច្ចុប្បន្នជនសង្ស័យ រួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី ៕
ចែករំលែកព័តមាននេះ