រាជធានីភ្នំពេញ ៖ រដ្ឋមន្ត្រីក្រសួងការពារជាតិបានគូសបញ្ជាក់ថា នាវាចម្បាំងរបស់រុស្ស៊ីចំនួន២គ្រឿងចូលចតនៅកម្ពុជា និងលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យការពារជាតិ រវាងប្រទេសទាំងពីរជាប្រវត្តិសាស្ត្រ ។ ឯកឧត្តមនាយឧត្តមសេនីយ៍ ទៀ…
រាជធានីភ្នំពេញ ៖ រដ្ឋមន្ត្រីក្រសួងការពារជាតិបានគូសបញ្ជាក់ថា នាវាចម្បាំងរបស់រុស្ស៊ីចំនួន២គ្រឿងចូលចតនៅកម្ពុជា និងលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យការពារជាតិ រវាងប្រទេសទាំងពីរជាប្រវត្តិសាស្ត្រ ។
ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិថ្ងៃទី៧ ខែមេសា ឆ្នាំ២០២៦ បានទទួលសូមស្វាគមន៍នាវាចម្បាំងរបស់រុស្ស៊ីចំនួន២គ្រឿង(នាវា Sovershenny លេខ៣៣៣ និងនាវា Rezky លេខ៣៤៣) មកពីកងនាវាប្រចាំតំបន់ប៉ាស៊ីហ្វិកនៃកងទ័ពជើងទឹកសហព័ន្ធរុស្ស៊ី ដែលបានចូលចតនៅកំពង់ផែស្វយ័តក្រុងព្រះសីហនុ ដើម្បីបំពេញទស្សនកិច្ចរយៈពេល៣ថ្ងៃនៅកម្ពុជា ជាមួយនាវិកសរុបប្រមាណ២៦២នាក់ ។
ឯកឧត្តមឧបនាយករដ្ឋមន្ត្រីបានលើកឡើងថា ដំណើរទស្សនកិច្ចរបស់កងទ័ពជើងទឹករុស្ស៊ី និងនាវាចម្បាំងនាពេលនេះនឹងលើកកម្ពស់ទំនាក់ទំនង និងកិច្ចសហប្រតិបត្តិការលើវិស័យការពារជាតិរវាងកម្ពុជា និងរុស្ស៊ី ដែលប្រទេសទាំងពីរតែងប្រកាន់យកក្នុងប្រវត្តិនៃទំនាក់ទំនង ។
ឯកឧត្តមបានបញ្ជាក់ថា «ខ្ញុំក៏សង្ឃឹមយ៉ាងមុតមាំថា រុស្ស៊ីនឹងនៅតែបន្តគាំទ្រ និងធ្វើការយ៉ាងជិតស្និទ្ធជាមួយកងយោធពលខេមរភូមិន្ទ ដើម្បីពង្រឹង និងពង្រីកកិច្ចសហប្រតិបត្តិការយោធារបស់យើងបន្ថែមទៀត ជាពិសេស ការបណ្តុះបណ្តានធនធានមនុស្ស និងការធ្វើលំហាត់សមយុទ្ធរួមគ្នានាពេលអនាគត» ៕
ចែករំលែកព័តមាននេះ