ADផ្ទាំងផ្សព្វផ្សាយពាណិជ្ជកម្ម

Picture

តាម​ស្ទាក់​ចាប់​អ្នកបើកបរ​រថយន្ត​ម្នាក់ ក្រោយ​បើក​បុក​រត់គេច​ពី​កន្លែង​កើតហេតុ និង​បុក​រះ​សមត្ថកិច្ច​ឱ្យ​រង​របួស នៅ​ស្រុក​ចំការលើ

1 ថ្ងៃ មុន

ខេត្តកំពង់ចាម ៖ ក្រុមការងារ​ព័ត៌មាន និង​ប្រតិកម្ម​រហ័ស នៃ​ស្នងការដ្ឋាន​នគរបាល​ខេត្តកំពង់ចាម នៅ​ល្ងាច​ថ្ងៃ​ទី​០៦ ខែមេសា ឆ្នាំ​២០២៦​នេះ​បាន​ចេញ​សេចក្តី​បំភ្លឺ​ព័ត៌មាន ស្ដី​ពី​ការ​ស្ទាក់​ឃាត់ខ្លួន​អ្នកបើកបរ​រថយន្ដ ដែល​រត់គេច​ពី​កន្លែង​កើតហេតុ…

ខេត្តកំពង់ចាម ៖ ក្រុមការងារ​ព័ត៌មាន និង​ប្រតិកម្ម​រហ័ស នៃ​ស្នងការដ្ឋាន​នគរបាល​ខេត្តកំពង់ចាម នៅ​ល្ងាច​ថ្ងៃ​ទី​០៦ ខែមេសា ឆ្នាំ​២០២៦​នេះ​បាន​ចេញ​សេចក្តី​បំភ្លឺ​ព័ត៌មាន ស្ដី​ពី​ការ​ស្ទាក់​ឃាត់ខ្លួន​អ្នកបើកបរ​រថយន្ដ ដែល​រត់គេច​ពី​កន្លែង​កើតហេតុ ក្នុង​ករណី​គ្រោះថ្នាក់​ចរាចរណ៍ ស្ថិត​ក្នុងស្រុក​ចំការលើ ខេត្តកំពង់ចាម ។

ក្រុមការងារ​ព័ត៌មាន និង​ប្រតិកម្ម​រហ័ស បាន​ឲ្យ​ដឹង​ពី​អង្គហេតុ​ថា នៅ​វេលា​ម៉ោង​០៩​និង​៣៥​នាទី​ព្រឹក​ថ្ងៃ​ទី​០៦ ខែមេសា ឆ្នាំ​២០២៦ នៅ​ចំណុច​ផ្លូវ​កៅស៊ូ​ក្នុងភូមិ​វាល ឃុំ​ស្ពឺ ស្រុក​ចំការលើ ខេត្តកំពង់ចាម មាន​ករណី​គ្រោះថ្នាក់​ចរាចរណ៍​មួយ បង្ក​ឡើង​ដោយ​រថយន្ត​ម៉ាក TOYOTA VELL FIRE ពណ៌​ខ្មៅ ស្លាក់​លេខ ភ្នំពេញ 2BA-7775 បើកបរ ដោយ​ឈ្មោះ ប៉ុន ពោធិ​ចា ភេទ​ប្រុស អាយុ ៣២​ឆ្នាំ រស់នៅ​ភូមិ​ព្រែក​ថ្មី សង្កាត់​ព្រែក​ថ្មី ខណ្ឌមានជ័យ រាជធានី​ភ្នំពេញ បាន​បុក​ប៉ះ​ជាមួយ​រថយន្ត ១​គ្រឿង​ម៉ាក Tacoma ពណ៌​ទឹកប្រាក់ ស្លាក​លេខ ភ្នំពេញ 2 AQ-7400 និង​បន្ដ​ទៅ​បុក​ប៉ះ​ជាមួយ​រថយន្ត​ម៉ាក Highlander ពណ៌​ទឹកប្រាក់ ស្លាក​លេខ 2AM-8590 បន្ទាប់​មក​អ្នកបើកបរ​រថយន្ត​ម៉ាក TOYOTA VELL FIRE ពណ៌​ខ្មៅ ស្លាក់​លេខ ភ្នំពេញ 2BA-7775 បាន​បន្ត​បើក​រត់គេច​ពី​កន្លែង​កើតហេតុ ។

ក្រុមការងារ​ព័ត៌មាន និង​ប្រតិកម្ម​រហ័ស បាន​ឲ្យ​ដឹង​បន្ត​ថា ខណៈនោះ សមត្ថកិច្ច​បាន​បើក​កិច្ច​ប្រតិបត្តិការ ព្យាយាម​បញ្ឈប់រថយន្ត​ខាងលើ តែ​រថយន្ត​នេះ មិន​ព្រម​បញ្ឈប់​សកម្មភាព រហូត​ដល់​បើក​បំ​បុក សមត្ថកិច្ច​នគរបាល​បណ្ដាល​ឲ្យ​មាន​របួស​ចំនួន​៣​នាក់ និង​ខូចខាត​ម៉ូតូ ចំនួន​៤​គ្រឿង​ទៀត​ជា​បន្តបន្ទាប់ ហើយ​មិន​បាន​ឈប់​រថយន្ត ក៏​បន្ដ​ទៅ​ដល់​ចំណុច ស្ថិត​ក្នុងភូមិ​អំពិល​ជួរ ឃុំ​តា​អុង ស្រុក​ចំការលើ ក៏​បាន​បើក​បំ​បុក​រថយន្ដ​កម្លាំង​នគរបាល ដែល​កំពុង​ប្រតិបត្តិការ ១​គ្រឿង​ទៀត ។

ក្រុមការងារ​ព័ត៌មាន និង​ប្រតិកម្ម​រហ័ស បាន​បញ្ជាក់​ថា ដើម្បី​ការពារ​ខ្លួន និង​កុំ​ឲ្យ​បន្ត​មាន​គ្រោះថ្នាក់​ដល់​អ្នក​ដទៃ​បន្ត​ទៀត​ផង​នោះ ដោយ​ក្នុង​ពេល​កិច្ច​ប្រតិបត្តិការ​នេះ សមត្ថកិច្ច​បាន​ឈាន​ដល់​ការ​ផ្ទុះអាវុធ​ចំនួន​៣​គ្រាប់ បាញ់​បំបែក​កង់​ឡាន​តែ​ម្ដង ដើម្បី​ឃាត់​រថយន្ត​ខាងលើ ។

សូម​បញ្ជាក់​ថា ករណី​នេះ បណ្ដាល​ឲ្យ​រង​របួស កងកម្លាំង​នគរបាល​ចំនួន ៣​នាក់ និង​ខូចខាត​ម៉ូតូ​ចំនួន ៤​គ្រឿង និង​រថយន្ត​ចំនួន ៤​គ្រឿង ។

បច្ចុប្បន្ន ជំនាញ​បាន​ឃាត់ខ្លួន​អ្នកបើកបរ​ឈ្មោះ ប៉ុន ពោធិ​ចា មក​សាកសួរ​នៅ​អធិការដ្ឋាន​នគរបាល​ស្រុក​ចំការលើ និង​បាន​កសាង​សំណុំរឿង​តាម​និ​តិ​វិធី ដើម្បី​ប​ញ្ចូ​ន​ទៅ​ស្ថាប័ន​អយ្យការ​អម​សាលាដំបូង​ខេត្តកំពង់ចាម តាម​ការ​សម្របសម្រួល​របស់​លោក កែវ សុ​ជាតិ ព្រះរាជអាជ្ញា នៃ​អយ្យការ​អម​សាលាដំបូង​ខេត្តកំពង់ចាម ៕

អត្ថបទសរសេរ ដោយ

កែសម្រួលដោយ