រាជធានីភ្នំពេញ ៖ ការខិតខំអភិរក្សជិត ២០ ឆ្នាំ ត្រូវបានបាត់បង់ក្នុងមួយប៉ព្រិចភ្នែក ។ អាជ្ញាធរជាតិព្រះវិហារ បានឱ្យដឹងពីទំហំខូចខាតប្រាសាទព្រះវិហារ ដែលទាមទារការចំណាយថវិការាប់សិបលានដុល្លារ…
រាជធានីភ្នំពេញ ៖ ការខិតខំអភិរក្សជិត ២០ ឆ្នាំ ត្រូវបានបាត់បង់ក្នុងមួយប៉ព្រិចភ្នែក ។ អាជ្ញាធរជាតិព្រះវិហារ បានឱ្យដឹងពីទំហំខូចខាតប្រាសាទព្រះវិហារ ដែលទាមទារការចំណាយថវិការាប់សិបលានដុល្លារ និងពេលវេលាស្ដារឡើងវិញរហូតដល់ ៣០ ឆ្នាំ ដើម្បីស្រោចស្រង់សម្បត្តិបេតិកភណ្ឌពិភពលោកមួយនេះឱ្យរស់ឡើងវិញ ។
នៅក្នុងវេទិកាសារព័ត៌មានលើប្រធានបទ «ការខូចខាតប្រាសាទព្រះវិហារ សម្បត្តិបេតិកភណ្ឌពិភពលោក» នៅព្រឹកថ្ងៃទី ៦ ខែមេសា ឆ្នាំ ២០២៦ នេះ លោក គង់ ពុទ្ធិការ អគ្គនាយកអាជ្ញាធរជាតិព្រះវិហារ បានឱ្យដឹងថា ការស្តាប្រាសាទព្រះវិហារឡើងវិញ គឺជាកិច្ចការបន្ទាន់ចំពោះមុខរបស់អាជ្ញាធរជាតិព្រះវិហារ ក៏ដូចជារាជរដ្ឋាភិបាល នៅក្នុងកិច្ចការពារសម្បត្តិបេតិកភណ្ឌពិភពលោកមួយនេះ ។
លោកបានបញ្ជាក់ថា ព្រះសាទព្រះវិហារ គឺយើងបានខិតខំប្រឹងប្រែងអភិរក្សអស់រយៈពេល ២០ ឆ្នាំមកហើយ តាំងពី ២០០៦ រហូតមកដល់ឆ្នាំ ២០២៥ ។ ហើយការបំផ្លាញនៅក្នុងឆ្នាំ ២០២៥ នេះគឺបំផ្លាញខ្ទេចនូវអ្វីដែលយើងបានខិតខំប្រឹងប្រែងអភិរក្សប្រាសាទព្រះវិហារកន្លងមក ។ មិនត្រឹមតែខ្ទេចអ្វីដែលប្រឹងប្រែងអភិរក្សទេ គឺខ្ទេចមុននឹងយើងបានអភិរក្សទៅទៀត ។
លោក គង់ ពុទ្ធិការ ឱ្យដឹងទៀតថា ការខូចខាតនេះមានទំហំធំធេងដែលយើងមិនអាចកាត់ថ្លៃបាន ហើយតាមការពិនិត្យ គឺការខូចខាតនេះទាមទារទី ១ ចំណាយពេលពី ៥ ទៅ ១០ឆ្នាំ ដើម្បីគ្រាន់តែស្តារឡើងវិញកុំឱ្យខូចខាតទៅមុខទៀត និងទី ២ គឺការអភិរក្សជួសជុល ជារឿងដោយឡែកមួយទៀតដែលត្រូវធ្វើបន្តពី ១០ ឆ្នាំតទៅទៀត ហើយក៏ត្រូវចំណាយថវិកាច្រើនផងដែរ ។
លោកអគ្គនាយកអាជ្ញាធរជាតិព្រះវិហារ បញ្ជាក់ថា ការស្តារប្រាសាទព្រះវិហារឡើងវិញត្រូវសម្អាតអាវុធយុទ្ធភណ្ឌមិនទាន់ផ្ទុះត្រូវតែធ្វើ ដើម្បីធានាសុវត្ថិភាពអ្នកទៅធ្វើការអភិរក្ស ។ ការងារទុលទ្រកុំឱ្យខូចប្រាសាទគឺជារឿងមួយទៀត ដែលចំណាយពេលអភិរក្សអាចពី ២០ ទៅ ៣០ ឆ្នាំ ទៅមុខទៀតដើម្បីឱ្យប្រាសាទព្រះវិហារមានភាពល្អ និងរឹងមាំឡើងវិញ និងចំណាយថវិកាគ្រាន់តែគិតត្រួសៗជិត ៧០ លានដុល្លារទៅហើយ ដោយមិនទាន់គិតការស្តារពី ក្នុងរយៈពេលពី ៥ ទៅ ១០ ឆ្នាំផង ដូច្នេះទាមទារនូវថវិកាច្រើននៅក្នុងការស្តារប្រាសាទ ៕
ចែករំលែកព័តមាននេះ