រាជធានីភ្នំពេញ ៖ លោកជំទាវបណ្ឌិតសាស្ត្រាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានធ្វើការវាយតម្លៃខ្ពស់ចំពោះសិល្បៈករ សិល្បៈការិនីទាំងអស់ដែលបានចូលរួមចំណែកផ្សព្វផ្សាយសិល្បៈ វប្បធម៌ខ្មែរ…
រាជធានីភ្នំពេញ ៖ លោកជំទាវបណ្ឌិតសាស្ត្រាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានធ្វើការវាយតម្លៃខ្ពស់ចំពោះសិល្បៈករ សិល្បៈការិនីទាំងអស់ដែលបានចូលរួមចំណែកផ្សព្វផ្សាយសិល្បៈ វប្បធម៌ខ្មែរ និងបានចាត់ទុកសកម្មភាពនេះ គឺជាការរួមចំណែកជាស្ពាននាំកម្ពុជាទៅកាន់ពិភពលោក ។
ក្រសួងវប្បធម៌និងវិចិត្រសិល្បៈបានសហការជាមួយនាយកដ្ឋានជំរុញចលនាវប្បធម៌ សាសនា និងប្រវត្តិសាស្ត្រនៃសហភាពសហព័ន្ធយុវជនកម្ពុជាបានរៀបចំវេទិកា យុវជនក្នុងកិច្ចការពារវប្បធម៌ ក្រោមប្រធានបទ រួមគ្នាលើកស្ទួយសិល្បៈវប្បធម៌ ដែលពិធីនេះរៀបចំធ្វើឡើង កាលពីថ្ងៃទី៣០ ខែមីនា ឆ្នាំ២០២៦ នៅសណ្ឋាគារមួយកន្លែង ដោយមានវត្តមានពីថ្នាក់ដឹកនាំក្រសួង និងសិល្បករ សិល្បការិនី ព្រមទាំងអ្នកផលិតមាតិកាកម្សាន្តតាមប្រព័ន្ធអនឡាញសរុប១២០រូប ។
គោលបំណងនៃការរៀបចំវេទិកានេះ គឺដើម្បីបង្កើតទំនាក់ទំនងកិច្ចសហការឲ្យកាន់តែជិតស្និទ្ធិរវាងក្រសួង និងវិស័យឯកជន ពិសេស សិល្បករសិល្បការិនី អ្នកផលិតមាតិកាកម្សាន្តក្នុងការបណ្តុះស្មារតីស្រឡាញ់ ថែរក្សា និងចូលរួមផ្សព្វផ្សាយឲ្យកាន់តែទូលំទូលាយប្រកបដោយភាពសុក្រឹតត្រឹមត្រូវ រក្សាបាននូវក្បួនខ្នាតនៃទម្រង់សិល្បៈវប្បធម៌សម្លៀកបំពាក់ប្រពៃណី និងសេចក្តីថ្លៃថ្នូររបស់ជាតិសាសន៍យើង។
លោកជំទាវបណ្ឌិតសាស្ត្រាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានលើកឡើងថា ការថែរក្សាសិល្បៈវប្បធម៌ និងអត្តសញ្ញាណជាតិ គឺជាភារកិច្ចរបស់កូនខ្មែរគ្រប់ៗរូប ហើយជាកិច្ចការដែលត្រូវធ្វើដោយយកចិត្តទុកដាក់និងជាប្រចាំ ព្រមទាំងត្រូវផ្តល់បន្តដល់អ្នកជំនាន់ក្រោយ ។
លោកជំទាវក៏ថ្លែងនូវការកោតសរសើរ និងវាយតម្លៃខ្ពស់ចំពោះតួនាទីគន្លឹះរបស់ប្អូនៗជាផលិតករ អ្នកបង្កើត មាតិកាកម្សាន្ត សិល្បករសិល្បការិនីទាំងក្នុងនិងក្រៅប្រព័ន្ធ ដែលបានចូលរួមយ៉ាងសកម្មទាំងក្នុង ក្របខណ្ឌការងាររបស់ក្រសួងស្ថាប័ន និងទាំងក្របខណ្ឌផ្ទាល់ខ្លួនចំពោះការគាំទ្រ និងការរួមចំណែកយ៉ាងសំខាន់ ដល់ការថែរក្សាសិល្បៈវប្បធម៌ដ៏ផូរផង់បន្សល់ទុកពីដូនតាយើង ព្រមទាំងដើរតួនាទីក្នុងការ ផ្សព្វផ្សាយ សិល្បៈវប្បធម៌ជាតិដ៏ថ្លៃថ្លានេះលើឆាកជាតិ អន្តរជាតិ ពិសេសតាមរយៈការផ្សព្វផ្សាយនេះ បានក្លាយជាស្ពាននាំកម្ពុជាទៅកាន់ពិភពលោក ។
ដោយឡែក ក្នុងឱកាសនោះ លោកជំទាវបណ្ឌិតសភាចារ្យក៏បានផ្តល់កិត្តិយសប្រគល់បណ្ណថ្លែងអំណរគុណជូនដល់ អ្នកជួយឧបត្តម្ភ វាគ្មិនកិត្តិយស សិល្បករ សិល្បការិនី អ្នកផលិតមាតិកាលើបណ្តាញសង្គម ព្រមទាំងក្រុមការងារពាក់ព័ន្ធផងដែរ ៕
ចែករំលែកព័តមាននេះ