សុខភាព៖ យោងតាមការចុះផ្សាយពីប្រភពបរទេស តម្រងនោមគឺជាអវយវៈដ៏សំខាន់បំផុតមួយ ដែលធ្វើការយ៉ាងសកម្មក្នុងការចម្រោះជាតិពុល និងរក្សាតុល្យភាពទឹកក្នុងរាងកាយ។ ជាអកុសល មនុស្សជាច្រើនតែងតែបណ្តោយឱ្យតម្រងនោមធ្វើការធ្ងន់ហួសកម្រិតរហូតដល់មានសភាពទ្រុឌទ្រោម ទើបដឹងខ្លួនថាមានបញ្ហា។ ការចាប់អារម្មណ៍លើសញ្ញាខុសប្រក្រតី និងការថែទាំតាំងពីដំបូង គឺជាវិធីសាស្ត្រដ៏ល្អបំផុតដើម្បីកាត់បន្ថយហានិភ័យនៃជំងឺតម្រងនោម។

សញ្ញាអាសន្នដែលបញ្ជាក់ថា តម្រងនោមរបស់អ្នកកំពុងធ្វើការធ្ងន់ រួមមានការប្រែប្រួលនៃទឹកនោម (នោមតិចជាងមុន នោមញឹកនៅពេលយប់ ឬទឹកនោមមានពពុះច្រើន)។ អាការៈហើមនៅត្រង់ផ្ទៃមុខ ដៃ ឬប្រអប់ជើង ក៏ជាសញ្ញាបង្ហាញថារាងកាយកំពុងដក់ទឹកខ្លាំង។ ក្រៅពីនេះ ប្រសិនបើអ្នកមានអារម្មណ៍អស់កម្លាំងល្ហិតល្ហៃខុសធម្មតា ឡើងសម្ពាធឈាមខ្ពស់ ស្បែកស្ងួតរមាស់ ឬមានការឈឺចាប់នៅត្រង់ចង្កេះ នោះគឺជាសញ្ញាដែលអ្នកមិនគួរមើលរំលងឡើយ។ កត្តាចម្បងដែលធ្វើឱ្យតម្រងនោមខូចខាតលឿនបំផុត គឺទម្លាប់ញ៉ាំប្រៃខ្លាំង ញ៉ាំទឹកតិច ជក់បារី ផឹកគ្រឿងស្រវឹង និងការប្រើប្រាស់ថ្នាំបំបាត់ការឈឺចាប់មួយចំនួនដោយគ្មានវេជ្ជបញ្ជា។

ដើម្បីថែរក្សាតម្រងនោមឱ្យមានសុខភាពល្អ អ្នកគួរចាប់ផ្ដើមពីការកែប្រែទម្លាប់ញ៉ាំអាហារ ដោយកាត់បន្ថយជាតិប្រៃ និងអាហារកែច្នៃ រួមទាំងជ្រើសរើសប្រភពប្រូតេអ៊ីនដែលមានគុណភាពដូចជា ត្រី និងស៊ុត។ ការញ៉ាំទឹកស្អាតឱ្យបានគ្រប់គ្រាន់ពី ៦ ទៅ ៨ កែវក្នុងមួយថ្ងៃ គឺជាគន្លឹះដ៏សំខាន់ដើម្បីជួយដល់ដំណើរការចម្រោះជាតិពុល។ បន្ថែមពីនេះ ការហាត់ប្រាណឱ្យបានទៀងទាត់ដើម្បីគ្រប់គ្រងទម្ងន់ និងសម្ពាធឈាម រួមជាមួយការទៅពិនិត្យសុខភាពតម្រងនោមឱ្យបានទៀងទាត់ ជាពិសេសសម្រាប់អ្នកដែលមានជំងឺទឹកនោមផ្អែម ឬលើសឈាម នឹងជួយឱ្យអ្នករក្សាបាននូវតម្រងនោមដ៏រឹងមាំ និងរស់នៅបានយូរអង្វែង៕