រាជធានីភ្នំពេញ ៖ ត្រីតូចនិងធំ រាប់រយក្បាល បានងាប់អណ្ដែតនៅក្នុងទឹកស្ទឹងព្រែកត្នោត ស្ថិតនៅក្នុងភូមិសាស្ត្រសង្កាត់សាក់សំពៅ និងសង្កាត់គងនយ ខណ្ឌដង្កោ រាជធានីភ្នំពេញ ដោយពុំទាន់ដឹងថា…
រាជធានីភ្នំពេញ ៖ ត្រីតូចនិងធំ រាប់រយក្បាល បានងាប់អណ្ដែតនៅក្នុងទឹកស្ទឹងព្រែកត្នោត ស្ថិតនៅក្នុងភូមិសាស្ត្រសង្កាត់សាក់សំពៅ និងសង្កាត់គងនយ ខណ្ឌដង្កោ រាជធានីភ្នំពេញ ដោយពុំទាន់ដឹងថា បណ្ដាលមកពីមូលហេតុអ្វីនោះទេ ហើយសូម្បីតែទឹកស្ទឹងនោះ ក៏មានធំក្លិនស្អុយ មិនអាចឲ្យអ្នកភូមិនៅតំបន់នោះ យកទៅប្រើការលែងបានដែរ នេះបើតាមការប្រាប់ឲ្យដឹងពីប្រជាពលរដ្ឋ ។
ប្រជាពលរដ្ឋ បានប្រាប់ទៀតថា គិតមកត្រឹមថ្ងៃទី៣០ ខែមីនា ឆ្នាំ២០២៦នេះ មានរយៈពេលប្រមាណ៣ថ្ងៃមកហើយ ដែលត្រីនៅក្នុងស្ទឹងព្រែកត្នោតនេះ បានងាប់ជាបន្តបន្ទាប់ ហើយពេលដើរទៅជិតធំក្លិនស្អុយអស់ទៅហើយ។ ដោយឡែកទឹកស្ទឹង ដែលពួកគាត់តែងតែអាស្រ័យផល ក៏បានធំក្លិនស្អុយមិនអាចយកទៅប្រើប្រាស់បានដែរ ដែលពួកគាត់ពុំបានដឹងថា បណ្ដាលមកពីមូលហេតុអ្វីនោះទេ ។
ប្រជាពលរដ្ឋ បានប្រាប់ឲ្យដឹងបន្តទៀតថា ច្រើនឆ្នាំមកហើយ ពុំដែលមានហេតុការណ៍បែបនេះកើតឡើងនោះទេ ទើបតែកើតឡើងនៅឆ្នាំ២០២៦នេះប៉ុណ្ណោះ ហើយពួកគាត់ក៏មានការភ្ញាក់ផ្អើលផងដែរ ពេលដែលនៅសុខៗ ស្រាប់តែមានត្រីតូចធំរាប់រយក្បាលងាប់បែបនេះ។ ពួកគាត់សង្ស័យថា មានការបំពុលបរិស្ថានពីសំណាក់ក្រុមហ៊ុន ឬសិប្បកម្មកែច្នៃណាមួយនៅតាមបណ្ដោយដងស្ទឹងព្រែកត្នោតនោះបង្ហូរទឹក ដែលមានសារធាតុពុលចូលទៅក្នុងស្ទឹងហើយមើលទៅ ។
ទាក់ទិនទៅនឹងហេតុការណ៍នេះផងដែរ នៅថ្ងៃទី៣០ ខែមីនា ឆ្នាំ២០២៦ ក្រោយពីទទួលបានព័ត៌មាន ដែលប្រជាពលរដ្ឋរាយការណ៍ មន្ត្រីជំនាញ នៃក្រសួងបរិស្ថាន បានចុះទៅពិនិត្យទីតាំងស្ទឹងព្រែកត្នោត ត្រង់ចំណុចដែលមានត្រីងាប់នោះហើយ ដើម្បីរកមូលហេតុថា តើទឹកស្ទឹងមានសារធាតុអ្វី ទើបបណ្តាលឱ្យពុលត្រីងាប់បែបនេះ ៕
ចែករំលែកព័តមាននេះ