ខេត្តប៉ៃលិន ៖ ក្រោយពេលប្រមូលផលមើមដំឡូងមីរួចរាល់ បានប្រហែលជាង២ទៅ៣ខែ ដោយកសិករ បាននាំគ្នាភ្ជួរហាលដីរួចរាល់ ដើម្បីឱ្យងាប់ស្មៅល្អ និងធ្វើឱ្យដីឆ្អិន ស្របពេលនេះដែរ រហូតមកដល់ថ្ងៃទី២៩…
ខេត្តប៉ៃលិន ៖ ក្រោយពេលប្រមូលផលមើមដំឡូងមីរួចរាល់ បានប្រហែលជាង២ទៅ៣ខែ ដោយកសិករ បាននាំគ្នាភ្ជួរហាលដីរួចរាល់ ដើម្បីឱ្យងាប់ស្មៅល្អ និងធ្វើឱ្យដីឆ្អិន ស្របពេលនេះដែរ រហូតមកដល់ថ្ងៃទី២៩ ខែមីនា ឆ្នាំ២០២៦ បន្ទាប់ពីសង្កេតឃើញមេបង្អុរភ្លៀងធ្លាក់ចំនួន២ទៅបីមេធំៗ ដែលធ្វើឱ្យដីចំការសើម ទើបម្នាក់ៗនាំគ្នាសម្រុកជួលកម្មករឱ្យចូលទៅដាំដើមដំឡូងមីនៅក្នុងដីចំការរបស់ខ្លួន ហើយបើមេឃបន្តបន្ថែមទឹកភ្លៀងជាបន្តបន្ទាប់ទៀត អាចនឹងមិនធ្វើឱ្យដំណាំដំឡូងមីរបស់ខ្លួនងាប់ខូចខាតនោះឡើយ ។
បើតាមប្រភពព័ត៌មានពីបុរសម្នាក់ ឈ្មោះ ហ៊ា ម៉ាប់ អាយុ៤៨ឆ្នាំ រស់នៅក្នុងក្រុងប៉ៃលិន បានរៀបរាប់ឱ្យភ្នាក់ងារយើងដឹងថា ៖ បន្ទាប់ពីសង្កេតឃើញដីនៅក្នុងចំការរបស់គាត់សើមល្មមអាចនឹងបង្កបង្កើនផលដំណាំឡើងវិញបាន លោកក៏មិនបង្អង់យូរឡើយ ដោយប្រញាប់ជួលកម្មករជាង១០នាក់ ឱ្យចូលទៅដាំដើមដំឡូងមីក្នុងចំការដែលមានទំហំជាង១០ហិកតា ស្ថិតនៅក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ដោយកម្មករខ្លះកាត់ដើមខ្លីៗ ប្រវែងជាង២តឹក អ្នកខ្លះដើរដោតនៅតាមជួររងដំឡូងមីនីមួយៗ ។ លោកបន្តទៀតថា ការជួលកម្មករឱ្យចូលទៅដាំដំឡូងក្នុងចំការនេះ គឺម៉ៅក្នុង១ហិកតា អស់កម្រៃ៣០ម៉ឺនរៀល ដោយពួកគាត់អាចដាំបានក្នុង១ថ្ងៃចាប់ពី២ទៅ៣ហិកតា ក៏យកថវិកាទាំងនោះបែងចែកគ្នា នាពេលល្ងាច ដើម្បីយកទៅទិញម្ហូបអាហារសម្រាប់ផ្គត់ផ្គង់ជីវភាពប្រចាំថ្ងៃ ។
លោកបន្ថែមទៀតថា នៅដើមឆ្នាំ២០២៦នេះ ការប្រមូលផលដំឡូងមីរបស់ខ្លួន ទទួលបានទិន្នផលមធ្យម រីឯតម្លៃទីផ្សារហក់ឡើងខ្ពស់ ដោយឈ្មួញទិញរហូតដល់ក្នុង១គីឡូក្រាមចាប់ពី២៥០ទៅ៣០០រៀល លុះក្រោយប្រមូលផលរួច លោកក៏អាចយកថវិកានោះទៅសងជំពាក់បំណុលគេ និងសល់មួយចំនួនទុកសម្រាប់ផ្គត់ផ្គង់ជីវភាពគ្រួសារ និងមួយចំនួនទៀតទុកធ្វើដើមទុនសម្រាប់ជួលកម្មករ ឱ្យចូលទៅដាំដើមដំឡូងននៅក្នុងចំការសម្រាប់ឆ្នាំថ្មីបន្តទៀត ។
លោកបានបញ្ជាក់ទៀតថា ដោយសារតែលោក ទើបប្រមូលផលមើមដំឡូងមីរួចថ្មីៗ លោក៏រក្សាទុកដើមដំឡូងមីស្រស់ទាំងអស់យកទៅដាំសារថ្មីឡើងវិញ ដោយមិនត្រូវចំណាយថវិកា ដើម្បីទិញដើមដំឡូងមីគេយកទៅដាំដូចឆ្នាំមុនៗ ឡើយ ក៏ជាកក្តាជួយរួមចំណែកសន្សំថវិកាក្នុងគ្រួសារផងដែរ ព្រោះដើមដំឡូងមីបច្ចុប្បន្ននេះ ពិតជាថ្លៃ បើសិនជាដាំរួចរាំងស្ងួតរយៈពេលយូរ ប្រហែលជាត្រូវចំណាយថវិកាទិញដើមគេដាំហើយ ។
ចំណែកកសិករមួយចំនួនទៀត ដែលមិនទាន់ប្រមូលផលដំឡូងមីរួចរាល់ ម្នាក់ៗខិតខំប្រឹងប្រែងម្នីម្នា ជួលកម្មករ ឱ្យចូលទៅដកដើមប្រមូលយកមើមលក់នៅតាមស្តង់នានាក្នុងក្រុងប៉ៃលិន ខណៈដែលតម្លៃទីផ្សារនៅឋេរដដែលមិន មានការធ្លាក់ចុះនោះឡើយ ដែលធ្វើឱ្យពួកគាត់ម្នាក់ៗ សប្បាយរីករាយយ៉ាងខ្លាំង ហើយសង្ឃឹមថា នៅឆ្នាំក្រោយ កសិផលមើមដំឡូងមីនឹងនៅតែបន្តឡើងថ្លៃដដែល ។ រីឯអ្នកខ្លះទៀត ដែលធ្លាប់ដាំដំណាំពោតក្រហម និងដាំដំណាំស្វាយកែវរមៀត ក៏ងាកបែរមកដាំដំណាំដំឡូងមីវិញ ព្រោះតម្លៃទីផ្សារឡើងខ្ពស់ អាចទទួលយកបាន ៕
ចែករំលែកព័តមាននេះ