រាជធានីភ្នំពេញ ៖ ពិតជាឈាមស្រែកស្បែកហៅ ជនសង្ស័យជាឃាតករ ដែលធ្វើសកម្មភាពចាក់សម្លាប់ម្ចាស់ផ្ទះជួល នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ខំរត់គេចខ្លួនទៅដល់ទឹកដីខេត្តរតនគិរី បាន២ថ្ងៃ…
រាជធានីភ្នំពេញ ៖ ពិតជាឈាមស្រែកស្បែកហៅ ជនសង្ស័យជាឃាតករ ដែលធ្វើសកម្មភាពចាក់សម្លាប់ម្ចាស់ផ្ទះជួល នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ខំរត់គេចខ្លួនទៅដល់ទឹកដីខេត្តរតនគិរី បាន២ថ្ងៃ ត្រូវបានកម្លាំងសមត្ថកិច្ច សហការស្រាវជ្រាវតាមចាប់ខ្លួនមកវិញ ដើម្បីនាំយកមកឲ្យទទួលទោសតាមផ្លូវច្បាប់ ។
សូមជម្រាបថា ៖ កាលពីថ្ងៃទី២៦ ខែមីនា ឆ្នាំ២០២៦ មានករណីឃាតកម្ម កើតឡើងនៅចំណុចផ្ទះលេខ២៨៧ ផ្លូវបេតុង ភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បង្កដោយជនសង្ស័យឈ្មោះ ហុក វិរៈ ភេទប្រុស អាយុ ៣៦ឆ្នាំ ជនជាតិខ្មែរ បានធ្វើសកម្មភាពប្រើកាំបិតចុងស្រួច ចាក់ទៅលើជនរងគ្រោះឈ្មោះ ងិន ធីរ៉ា ភេទប្រុស អាយុ៥៨ឆ្នាំ មុខរបរមន្ត្រីនគរបាលចូលនិវត្តន៍ បណ្តាលឲ្យបាត់បង់ជិវិតភ្លាមៗ ។
ក្រោយពីមានហេតុការណ៍ខាងលើកើតឡើង ដោយទទួលបានបញ្ជាពីលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, លោកឧត្តមសេនីយ៍ត្រី ហ៊ុន មុន្នីរ័ត្ន លោកវរសេនីយ៍ឯក ហែម បូណា និងលោកវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ បានចុះដល់ និងសហការជាមួយអាជ្ញាធរមូលដ្ឋាន ដើម្បីពិនិត្យជុំវិញទីតាំងកើតហេតុ ។
លុះនៅថ្ងៃទី២៧ ខែមីនា ឆ្នាំ២០២៦ វេលាម៉ោង២៣និង២០នាទី កម្លាំងជំនាញបានបន្តសហការជាមួយស្នងការដ្ឋាននគរបាលខេត្តរតនគិរី និងខេត្តកណ្តាល រហូតឃាត់ខ្លួនបានជនសង្ស័យខាងលើ នៅចំណុចភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគីរី ។ ពេលឃាត់ខ្លួនជនសង្ស័យបានសារភាពថា នៅថ្ងៃទី២៦ ខែមីនា ឆ្នាំ២០២៦ ខ្លួនពិតជាបានធ្វើសកម្មភាពយកកាំបិតចុងស្រួច ចាក់ទៅលើជនរងគ្រោះឈ្មោះ ងិន ធីរ៉ា បណ្តាលឲ្យស្លាប់ ប្រាកដមែន មូលហេតុដោយសារតែខឹងជនរងគ្រោះ ហាមឃាត់កុំឲ្យខ្លួនស្រែកឡូឡាពេក ។
ក្រោយពីស្តាប់ចម្លើយជនសង្ស័យបានសារភាព និងយោងទៅលើពាក្យបណ្តឹងក្រុមគ្រួសារជនរងគ្រោះ ពាក់ពន្ធករណីឃាតកម្មជាបទល្មើសឧក្រិដ្ឋជាក់ស្តែង ជនសង្ស័យត្រូវបានសមត្ថកិច្នាំខ្លួនមកកាន់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ បន្តនីតិវិធី ៕
ចែករំលែកព័តមាននេះ