សុខភាព៖ យោងតាមការចុះផ្សាយពីប្រភពបរទេស តាមធម្មតា ទឹកនោមដែលបញ្ចេញមកក្រៅមានសភាពថ្លា ឬពណ៌លឿងខ្ចី និងមានក្លិនតិចតួចដែលមិនបង្កការរំខានខ្លាំងឡើយ ប៉ុន្តែប្រសិនបើអ្នកសង្កេតឃើញថាទឹកនោមចាប់ផ្ដើមមានក្លិនឆួលខ្លាំង ឬក្លិនប្លែកខុសពីសព្វដង វាអាចជាសារដាស់តឿនពីរាងកាយថាប្រព័ន្ធខាងក្នុងរបស់អ្នកកំពុងមានបញ្ហា។

មូលហេតុទូទៅខ្លះដែលមិនសូវគ្រោះថ្នាក់ រួមមានការញ៉ាំអាហារឬភេសជ្ជៈដែលមានក្លិនខ្លាំងដូចជា កាហ្វេ ស្ពៃបារាំង ការប្រើប្រាស់ថ្នាំ និងវីតាមីនមួយចំនួន ឬការញ៉ាំទឹកមិនបានគ្រប់គ្រាន់ដែលធ្វើឱ្យទឹកនោមមានសភាពខាប់ខ្លាំង។ អ្នកអាចដោះស្រាយបញ្ហានេះបានយ៉ាងងាយ ដោយគ្រាន់តែញ៉ាំទឹកឱ្យបាន ២ លីត្រក្នុងមួយថ្ងៃ និងសង្កេតមើលថា តើក្លិននោះនឹងបាត់ទៅវិញដែរឬទេ នៅពេលអ្នកផ្អាកញ៉ាំអាហារទាំងនោះ។

ទោះជាយ៉ាងណា ប្រសិនបើការញ៉ាំទឹកច្រើននៅតែមិនអាចជួយបាន ហើយទឹកនោមនៅតែមានក្លិនឆួលខ្លាំង វាកំពុងបង្ហាញពីហានិភ័យនៃជំងឺធ្ងន់ធ្ងរដែលអ្នកមិនគួរមើលរំលង។ ការបង្ករោគក្នុងប្រព័ន្ធទឹកនោមអាចធ្វើឱ្យទឹកនោមមានក្លិនស្អុយខ្លាំង រួមជាមួយអាការៈផ្សារជាប់ ឬទឹកនោមល្អក់ ខណៈដែលជំងឺទឹកនោមផ្អែមដែលមានកម្រិតស្ករខ្ពស់ អាចធ្វើឱ្យទឹកនោមមានក្លិន “ផ្អែម” ខុសប្លែកពីគេ។ លើសពីនេះ ក្លិនឆួលខ្លាំងដែលអមមកជាមួយអាការៈភ្នែកលឿង ឬស្បែកលឿង អាចជាសញ្ញានៃជំងឺថ្លើម ឬបញ្ហាធ្ងន់ធ្ងរនៃពោះវៀនដែលមានការលេចធ្លាយរវាងប្លោកនោម និងសរីរាង្គផ្សេងៗ។

អ្នកគួរប្រញាប់ទៅជួបគ្រូពេទ្យជាបន្ទាន់ ប្រសិនបើការមានក្លិនឆួលនេះកើតឡើងរួមជាមួយអាការៈគ្រុនក្ដៅ នោមឈាម ឈឺពោះ ឈឺចង្កេះ ឬមានអារម្មណ៍ចង់ក្អួត និងវង្វេងវង្វាន់។ ការពិនិត្យទឹកនោមឱ្យបានច្បាស់លាស់ និងការធ្វើតេស្តផ្នែកវេជ្ជសាស្ត្រ គឺជាវិធីសាស្ត្រដ៏ល្អបំផុតក្នុងការស្វែងរកមូលហេតុពិតប្រាកដ និងទទួលបានការព្យាបាលទាន់ពេលវេលា ដើម្បីជៀសវាងការវិវត្តទៅជាជំងឺរ៉ាំរ៉ៃដែលពិបាកសង្គ្រោះ​៕​