ប្រទេសវៀតណាម ៖ នៅក្នុងចំណោមតម្លៃប្រេងឥន្ធនៈដែលមានការប្រែប្រួលឥតឈប់ឈរ ទីភ្នាក់ងារនិយតកម្មរបស់ប្រទេសបានចំណាយប្រាក់ ៥ ទ្រីលានដុង ឬជិត ១៩០ លានដុល្លារអាមេរិកពីមូលនិធិស្ថិរភាពតម្លៃប្រេងឥន្ធនៈរយៈពេលខ្លី ដើម្បីទប់ស្កាត់ការឡើងថ្លៃ។…
ប្រទេសវៀតណាម ៖ នៅក្នុងចំណោមតម្លៃប្រេងឥន្ធនៈដែលមានការប្រែប្រួលឥតឈប់ឈរ ទីភ្នាក់ងារនិយតកម្មរបស់ប្រទេសបានចំណាយប្រាក់ ៥ ទ្រីលានដុង ឬជិត ១៩០ លានដុល្លារអាមេរិកពីមូលនិធិស្ថិរភាពតម្លៃប្រេងឥន្ធនៈរយៈពេលខ្លី ដើម្បីទប់ស្កាត់ការឡើងថ្លៃ។ នេះបើតាមប្រភពពីសារព័ត៌មានវៀតណាម Znews ចេញផ្សាយកាលពីថ្ងៃទី២៥ ខែមីនា ឆ្នាំ២០២៦។
នៅរសៀលថ្ងៃទី២៥ ខែមីនា ឆ្នាំ២០២៦ ក្រសួងឧស្សាហកម្ម និងពាណិជ្ជកម្ម រួមជាមួយក្រសួងហិរញ្ញវត្ថុវៀតណាម បានប្រកាសពីការកែតម្រូវតម្លៃលក់រាយសាំង និងម៉ាស៊ូត ដែលមានប្រសិទ្ធភាពចាប់ពីម៉ោង ២ រសៀលថ្ងៃដដែលតទៅ។ តម្លៃប្រេងសាំង RON 95-III ឬសាំងស៊ុបពែរ បានចុះយ៉ាងខ្លាំង ៣ ៨៩០ ដុង ឬប្រហែល ៦០០រៀល មកត្រឹម ២៩ ៩៥០ ដុងក្នុង១លីត្រ ឬប្រហែល ៤ ៥៥០ រៀល។ ប្រេងសាំង E5 RON 92 ឬសាំងធម្មតា ចុះ ២ ០៤០ ដុង ឬ ៣០០ រៀល មកត្រឹម ២៨ ០៧០ ដុង/លីត្រ ឬប្រហែល ៤ ៣០០ រៀល។
ចំណែកតម្លៃប្រេងម៉ាស៊ូតបានធ្លាក់ចុះចំនួន ១ ៧៧០ ដុង ឬប្រហែល ៣០០ រៀល មក ត្រឹម ៣៧ ៨៩០ ដុង/លីត្រ ឬប្រហែល ៥ ៨០០ រៀល ប្រេងកាតធ្លាក់ចុះ ៤ ១០០ ដុង ឬប្រហែល ៦០០ រៀល មកត្រឹម ៣៦ ៣៥០ ដុង/លីត្រ ឬ ៥ ៤៥០ រៀល ខណៈប្រេងឥន្ធនៈប្រើប្រាស់សម្រាប់ឡចំហាយឧស្សាហកម្ម ឬម៉ាស៊ីនកប៉ាល់ បានធ្លាក់ចុះ ២ ៣៦០ ដុង ឬ ៣៥០ រៀល មកនៅត្រឹម ២០ ២៤០ ដុងក្នុង១គីឡូក្រាម ឬ ៣ ០០០ រៀល។
នៅក្នុងរយៈពេលកែតម្រូវតម្លៃនេះ គណៈកម្មាធិការអន្តរក្រសួងរបស់វៀតណាមបានបន្តប្រើប្រាស់មូលនិធិស្ថិរភាពតម្លៃប្រេងឥន្ធនៈ។ ជាពិសេស ថវិកាចំនួន ៣ ០០០ ដុង/លីត្រ ឬ ៤៥០ រៀល ត្រូវបានបែងចែកសម្រាប់សាំង ប្រេងកាត និងប្រេងឥន្ធនៈ ខណៈដែលប្រេងម៉ាស៊ូតទទួលបាន ៤ ០០០ ដុង/លីត្រ ឬ ៦០០ រៀល។ ទាំងនេះ គឺជាការចូលរួមសំខាន់មួយដែលប្រើដើម្បីកាត់បន្ថយសម្ពាធលើការកើនឡើងតម្លៃក្នុងស្រុក ចំពេលមានការប្រែប្រួលគួរឱ្យកត់សម្គាល់នៅក្នុងទីផ្សារពិភពលោក។
ក្នុងរយៈពេលត្រឹមតែកន្លះខែប៉ុណ្ណោះ ថវិកាប្រមាណ ៥ ទ្រីលានដុង ឬជិត ១៩០ លានដុល្លារអាមេរិក ត្រូវបានប្រើប្រាស់ដើម្បីគាំទ្រដល់ស្ថិរភាពតម្លៃសាំង និងប្រេងម៉ាស៊ូតក្នុងស្រុក។ យោងតាមការគណនារបស់ក្រសួងឧស្សាហកម្ម និងពាណិជ្ជកម្ម នៅដើមខែនេះ ក្នុងអត្រាចំណាយបច្ចុប្បន្ន ទុនបម្រុងរបស់មូលនិធិកំពុងថយចុះយ៉ាងលឿន ហើយអាចនឹងអស់នៅចុងខែ។
នៅក្នុងបញ្ហានេះ រដ្ឋាភិបាលវៀតណាមបានចាប់ផ្តើមពិចារណាលើសេណារីយ៉ូឆ្លើយតប ដោយកាលពីថ្មីៗនេះ លោកនាយករដ្ឋមន្ត្រី ផាំ មិញជិញ (Pham Minh Chinh) បានថ្លែងថា វៀតណាមត្រូវរៀបចំផែនការបន្ទាន់ជាមុន ក្នុងករណីដែលមូលនិធិស្ថិរភាពមានហានិភ័យ ជាពិសេសដោយសារលក្ខណៈប្រើប្រាស់ចាំបាច់រហ័ស និងយូរអង្វែងនៃវិបត្តិថាមពលពិភពលោក។
ដោយផ្អែកលើចំណុចនេះ ប្រមុខរដ្ឋាភិបាលបានយល់ព្រមជាគោលការណ៍ក្នុងការប្រើប្រាស់ចំណូលថវិការដ្ឋដែលកើនឡើងកាលពីឆ្នាំ ២០២៥ ដើម្បីបំពេញបន្ថែមទៅក្នុងមូលនិធិជាបណ្តោះអាសន្ន ហើយបន្ទាប់ពីទីផ្សារថាមពលមានស្ថិរភាព ទីភ្នាក់ងារនិយតកម្មនឹងប្រើប្រាស់មូលនិធិពីមូលនិធិស្ថិរភាពតម្លៃ ដើម្បីសងទៅរដ្ឋវិញ។
ក្រសួងហិរញ្ញវត្ថុមានភារកិច្ចសម្របសម្រួលជាមួយការិយាល័យរដ្ឋាភិបាល និងក្រសួងឧស្សាហកម្ម និងពាណិជ្ជកម្ម ដើម្បីបញ្ចប់សេចក្តីព្រាង និងដាក់ជូនអាជ្ញាធរមានសមត្ថកិច្ចសម្រាប់ការពិចារណា ដោយរយៈពេលអនុវត្តដែលរំពឹងទុកនឹងបញ្ចប់នៅថ្ងៃទី ១៥ ខែមេសា ឆ្នាំ២០២៦៕ ប្រភព ៖ Znews
ចែករំលែកព័តមាននេះ