សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ បានស្នើផែនការសន្តិភាពមួយចំពោះអ៉ីរ៉ង់ ហើយកាលពីថ្ងៃទី២៤ មីនា បានបង្ហាញសុទិដ្ឋនិយមលើភ័ព្វវាសនាសម្រេចបានកិច្ចព្រមព្រៀងមួយ ខណៈអ៉ីរ៉ង់គូសបញ្ជាក់ថា ខ្លួននឹងអនុញ្ញាតឲ្យបណ្ដានាវាមិនប្រទូស្តរ៉ាយឆ្លងកាត់ច្រកសមុទ្រហ័រមូស…
សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ បានស្នើផែនការសន្តិភាពមួយចំពោះអ៉ី
រ៉ង់ ហើយកាលពីថ្ងៃទី២៤ មីនា បានបង្ហាញសុទិដ្ឋនិយមលើភ័ព្វវាសនាសម្រេចបានកិច្ចព្រមព្រៀងមួយ ខណៈអ៉ីរ៉ង់គូសបញ្ជាក់ថា ខ្លួននឹងអនុញ្ញាតឲ្យបណ្ដានាវាមិនប្រទូស្តរ៉ាយឆ្លងកាត់ច្រកសមុទ្រហ័រមូស ។
ពេលសង្គ្រាមអ៉ីរ៉ង់បានឈានចូលដល់ថ្ងៃទី២៦ ប្រធានាធិបតីអាមេរិកអះអាងជាថ្មីថា អ៉ីរ៉ង់ និង
អាមេរិកបានចរចាគ្នា ប៉ុនប៉ងបញ្ចប់ជម្លោះប៉ុន្តែប្រតិបត្តិការយោធាអាមេរិកប្រឆាំងអ៉ីរ៉ង់នៅតែបន្ត ពុំមានការសម្រាលនៅឡើយ ។ ម្យ៉ាងទៀត សារព័ត៌មានអាមេរិកលើកឡើងថា ទាហានឆ័ត្រយោងអាមេរិក៣០០០នាក់ ត្រូវបានបញ្ជូនទៅបន្ថែមកម្លាំងនៅមជ្ឈឹមបូព៌ា ។ ចំណែកកងទ័ពអ៉ីស្រាអែលក៏គូសបញ្ជាក់ដែរថា ខ្លួនបន្តសកម្មភាពនិងវាយប្រហារលើអ៉ីរ៉ង់ ទៅតាមផែនការដែលមិនមានការផ្លាស់ប្ដូរ ទាំងនៅអ៉ីរ៉ង់ក៏ដូចជានៅលីបង់ ។ អ៉ីរ៉ង់វិញក៏បានតបតដោយបន្តបាញ់ស្រោចមីស៊ីលជាថ្មីលើអ៉ីស្រាអែល ។
ទោះបីយ៉ាងណា សារព័ត៌មានជាច្រើន ក្នុងនោះ មានកាសែតញូវយ៉កថែម និងទូរទស្សន៍អ៉ីស្រា
អែលCHANNEL 12 ជាដើម លើកឡើងថា រដ្ឋការលោកត្រាំបានលើកពីផែនការសន្តិភាពមាន១៥ចំណុចចំពោះអ៉ីរ៉ង់ តាមរយៈប្រទេសប៉ាគីស្ថានដែលថែរក្សាទំនាក់ទំនងល្អទាំងជាមួយអ៉ីរ៉ង់ទាំងជាមួយអាមេរិក ។ តាមប្រភព៣មិនបង្ហាញអត្តសញ្ញាណ ដកស្រង់ដោយទូរទស្សន៍ CHANNEL 12 ថា អាមេរិកបានស្នើសំណើបទឈប់បាញ់រយៈពេល១ខែ ហើយអាជ្ញាធរអ៉ីរ៉ង់កំពុងសិក្សាសំណើនេះ ។
ក្នុងចំណោមចំណុចទាំង១៥ ចំណុច៥ទាក់ទិននឹងកម្មវិធីនុយក្លេអ៊ែរអ៉ីរ៉ង់ ហើយចំណុចដទៃៗទៀតតម្រូវឲ្យអ៉ីរ៉ង់បោះបង់ចោល ការជួយទ្រទ្រង់ដល់បណ្ដាក្រុមប្រដាប់អាវុធក្នុងតំបន់ដូចជា ក្រុមហេសប៊ុលឡាហ៍និងក្រុមហាម៉ាស់ជាដើម ។ មានចំណុចមួយទទូចឲ្យច្រកសមុទ្រហ័រមូសនៅតែបើកចំហ សម្រាប់នាវាចរណ៍សមុទ្រ ។ ជាថ្នូរមកវិញអ៉ីរ៉ង់នឹងទទួលបាន ការលុបចោលបណ្ដាទណ្ឌកម្មអន្តរជាតិប្រឆាំងខ្លួន និងការជួយទ្រទ្រង់ដល់កម្មវិធីនុយក្លដេអ៊ែរស៊ីវិលរបស់ខ្លួន។
លោកត្រាំលើកឡើងនាថ្ងៃទី២៤ មីនា ពីកាដូដ៏ធំបំផុតមួយ ទាក់ទិននឹងប្រេងកាតព្រមទាំងឧស្ម័ន តែមិនផ្ដល់ការបញ្ជាក់ឡើយ ដែលកាដូនោះពិតណាស់ ទាក់ទិននឹងការបើកមួយផ្នែកនៃច្រកសមុទ្រហ័រមូស ។
លោកត្រាំនៅតែអះអាងជាថ្មីថា ការចរចានៅតែកំពុងធ្វើជាមួយក្រុងតេហេរ៉ង់ក្នុងពេលនេះ។ លោកថា អ្វីដែលលោកលើកកាលពីថ្ងៃទី២៣ មីនា គឺត្រឹមត្រូវទាំងស្រុងទោះមានការបដិសេធរបស់អ៉ីរ៉ង់ក្ដី ។ ការចរចានោះ ចូលរួមដោយទីប្រឹក្សាពិសេសលោកSTEVE WITKOFF កូនប្រសាលោកគឺលោក JARED KUSHER អនុប្រធានាធិបតីលោកជីឌីវ៉ាន និងរដ្ឋមន្ត្រីការបរទេសលោកម៉ារកូរូប៊ីយ៉ូ ។
ដោយរៀបរាប់ពីការចរចានោះ លោកត្រាំបានពន្យារពេល៥ថ្ងៃ ការគំរាមរបស់លោកវាយប្រហារបណ្ដាមជ្ឈមណ្ឌលអគ្គិសនីអ៉ីរ៉ង់ ។ បន្ទាប់មក លោកសម្ដែងការសាទរដែលក្រុងវ៉ាស៊ីនតោន និងក្រុងតេហេរ៉ង់ រកឃើញចំណុចព្រមព្រៀងគ្នាចម្បងៗ ក្នុងក្របខណ្ឌ្នៃការចរចានោះដែលធ្វើជាមួយមេដឹកនាំជាន់ខ្ពស់អ៉ីរ៉ង់ម្នាក់។ តើមេដឹកនាំអ៉ីរ៉ង់នោហចានរណាទៅ? ពិតជាមិនមែនមេដឹកនាំកំពូលថ្មីអ៉ីរ៉ង់ លោកម៉ូស្តាបាខាមេនីដែលបាត់មុខចាប់តាំងពីការតែងតាំង ក្រោយការស្លាប់របស់បិតាលោកនាថ្ងៃដំបូងនៃសង្គ្រាមមក។
ប្រធានសភាអ៉ីរ៉ង់លោកម៉ូហាម៉ាដបាក់ហ័រហ្គាលីបាស់ ដែលបណ្ដាញព័ត៌មានអាមេរិកមួយថា ជាអ្នកចរចាអ៉ីរ៉ង់នោះ បានបដិសេធទាំងស្រុង ។ ក្រសួងការបរទេសអ៉ីរ៉ង់បានទទួលស្គាល់ថា បានទទួលតាមរយៈបណ្ដាប្រទេសជាមិត្តនូវសំណើចរចា ។
ទោះជាមានការលើកឡើងពីផែនការសន្តិភាពនោះក្ដី ក៏អ៉ីស្រាអែល និងអាមេរិក បានវាយប្រហារមជ្ឈមណ្ឌលនុយក្លេអ៊ែរ BOUCHEHR អ៉ីរ៉ង់ តែមិនបណ្ដាលឲ្យមានការខូចខាតឡើយ ។ នៅអ៉ីស្រាអែលមនុស្ស១២នាក់រងរបួស កាលពីយប់ថ្ងៃទី២៤ មីនា នៅជិតក្រុងតែលអាវីវ ដោយមីស៊ីលបាញ់មគពីអ៉ីរ៉ង់ ។ ចំណែកប្រទេសបារ៉ែន អារ៉ាប៊ីសាអូឌីតនិងគុយវ៉ែត រាយការណ៍នាថ្ងៃទី២៤ មីនា ពីការវាយប្រហារដោយដ្រូន និងមីស៊ីលរបស់អ៉ីរ៉ង់។ ចំណែកកងទ័ពអ៉ីស្រាអែលបានធ្វើការវាយប្រហារទ្រង់ទ្រាយធំលើតំបន់ជាច្រើនរបស់អ៉ីរ៉ង់ពិសេសក្រុងអ៉ីស្ប៉ាហាន ។
នៅលីបង់កងទ័ពអ៉ីស្រាអែលបានទម្លាក់គ្រាប់បែក លើបណ្ដាតំបន់នៅភាគខាងជើងក្រុងបេរូត។ រួចនាយប់ថ្ងៃទី២៤ មីនា កងទ័ពអ៉ីស្រាអែល បានចេញការព្រមានមួយមុនវាយប្រហាលើភាគខាងត្បូងក្រុងបេរូត ៕
ចែករំលែកព័តមាននេះ