ខេត្តប៉ៃលិន ៖ រហូតមកដល់ថ្ងៃទី២៥ ខែមីនា ឆ្នាំ២០២៦នេះ គេសង្កេតឃើញប្រជាពលរដ្ឋរស់នៅក្នុងក្រុងប៉ៃលិនជាច្រើនគ្រួសារ សប្បាយរីករាយក្នុងការប្រមូលផលគ្រាប់ផ្លែស្វាយចន្ទីនៅក្នុងចំការរបស់ខ្លួន ដើម្បីប្រមូលលក់ឱ្យឈ្មួញ ខណៈដែលតម្លៃទីផ្សារហក់ឡើងខ្ពស់ត្រដែតគួរឱ្យកត់សម្គាល់។ តែចំការអ្នកខ្លះទទួលបានទិន្នផលល្អ…
ខេត្តប៉ៃលិន ៖ រហូតមកដល់ថ្ងៃទី២៥ ខែមីនា ឆ្នាំ២០២៦នេះ គេសង្កេតឃើញប្រជាពលរដ្ឋរស់នៅក្នុងក្រុងប៉ៃលិនជាច្រើនគ្រួសារ សប្បាយរីករាយក្នុងការប្រមូលផលគ្រាប់ផ្លែស្វាយចន្ទីនៅក្នុងចំការរបស់ខ្លួន ដើម្បីប្រមូលលក់ឱ្យឈ្មួញ ខណៈដែលតម្លៃទីផ្សារហក់ឡើងខ្ពស់ត្រដែតគួរឱ្យកត់សម្គាល់។ តែចំការអ្នកខ្លះទទួលបានទិន្នផលល្អ ព្រោះពួកគាត់ចេះថែទាំដាក់ជីបានដិតដល់។ តែអ្នកខ្លះទៀតទទួលរងការធ្លាក់ចុះទិន្នផលអស់ច្រើន ដោយសារតែមិនទាន់ចេះបច្ចេកទេសថែទាំច្បាស់លាស់ ណាមួយដំណាំមិនសូវត្រូវទឹកភ្លៀងគ្រប់គ្រាន់ គួបផ្សំនឹងអាកាសធាតុក្តៅខ្លាំង ធ្វើឱ្យជ្រុះផ្កា និងក្តិបអស់ច្រើន ។
បើតាមប្រភពព័ត៌មានពីកសិករម្នាក់ ឈ្មោះ លីម ភេទប្រុស អាយុ៥៥ឆ្នាំ រស់នៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន បានរៀបរាប់ឱ្យដឹងថា ៖ គាត់មានស្រុកកំណើតនៅខេត្តកណ្តាល ដោយបាននាំក្រុមគ្រួសារចូលមករស់នៅ និងទិញដីចំការចំនួន៥ហិកតាក្នុងខេត្តប៉ៃលិន ដើម្បីដាំដំណាំផ្លែស្វាយចន្ទីជាង១០០០ដើម ពោលគឺអស់រយៈពេលជាច្រើនឆ្នាំមកហើយ ដោយបន្ទាប់ពីដាំបានរយៈពេល២ទៅ៣ឆ្នាំ ក៏បានប្រមូលផលបេះលក់ឱ្យឈ្មួញបន្តបន្ទាប់ជារៀងរាល់ឆ្នាំ។ លោកបន្តទៀតថា ប៉ុន្តែនៅឆ្នាំ២០២៦នេះ ដំណាំស្វាយចន្ទីរបស់ខ្លួន ទទួលបានទិន្នផលច្រើនជាងសព្វឆ្នាំ ដោយព្រោះលោកបានផលិតជីធម្មជាតិទឹកដោយខ្លួនឯង គឺមានរួមផ្សំសារធាតុផ្លែឈើទុំច្រើនប្រភេទ ហើយក៏ដើរស្រោចគល់ដំណាំជាញឹកញាប់ ដែលធ្វើឱ្យដំណាំស្វាយចន្ទីរបស់ខ្លួនលូតលាស់យ៉ាងល្អ ហើយក៏បញ្ចេញផ្កា និងផ្លែច្រើនគួរឱ្យកត់សម្គាល់ ។
លោកបញ្ជាក់ទៀតថា អ្វីដែលធ្វើឱ្យលោកសប្បាយចិត្តនាឆ្នាំថ្មីនេះ គឺតម្លៃទីផ្សារគ្រាប់ស្វាយចន្ទីឡើងខ្ពស់ លើសពីការរំពឹងទុក ដោយក្រុមឈ្មួញដើរទិញក្នុង១គីឡូក្រាមតម្លៃជិត៨០០០រៀល ពោលគឺហក់ឡើងខ្ពស់ជាងឆ្នាំមុនឆ្ងាយខ្លាំង ។ ដូច្នេះ បន្ទាប់ពីប្រមូលផលជាបណ្តើរៗ រួច ប្រហែល៣ទៅ៤សារទើបអស់ រូបលោកសង្ឃឹមថា អាចនឹងទទួលបានថវិកាយកទៅសងជំពាក់បំណុលគេរួចរាល់ ហើយនៅសល់ខ្លះអាចនឹងធ្វើដើមទុន ដើម្បីបង្កបង្កើនផលថែទាំដំណាំស្វាយចន្ទីបន្តទៀត ។
ចំណែកកសិករមួយចំនួនទៀត បានលើកឡើងដោយរអ៊ូរទាំថា ពួកគាត់ពិតជាសោកស្តាយខ្លាំង ព្រោះដំណាំស្វាយចន្ទីរបស់ខ្លួននាឆ្នាំនេះ មិនសូវកាន់ផ្កា ហើយមានការជ្រុះក្តិបអស់ច្រើន ព្រោះអាកាសធាតុមិនអំណោយផល។ ដូច្នេះ ពេលប្រមូលផល ទទួលបានតិចតួចប៉ុណ្ណោះ ទោះបីជាតម្លៃទីផ្សារឡើងខ្ពស់យ៉ាងណាក៏ដោយ។ តែពួកគាត់នឹងរកវិធីសាស្ត្រ និងសួរនាំអ្នកដែលថែទាំបានល្អ ដើម្បីយកធ្វើជាគំរូ ទៅមើលថែទាំដំណាំក្នុងចំការបស់ខ្លួន។
ពាក់ព័ន្ធនឹងបញ្ហានេះ បើតាមរបាយការណ៍ពីខាងមន្ទីរកសិកម្ម និងរុក្ខាប្រមាញ់ខេត្តប៉ៃលិន បានឱ្យដឹងដែរថា ដំណាំស្វាយចន្ទី បើគិតត្រឹមចាប់ពីថ្ងៃទី២១ ខែមីនា ឆ្នាំ២០២៦ រហូតមកដល់ពេលនេះ ៖ ផ្ទៃដីដាំដុះអនុវត្តបានចំនួន បូកយោង ២៧៤២ហិកតា ហើយផ្ទៃដីកំពុងប្រមូលផលអនុវត្តបាន ៤៧២ហិកតា ស្មើនឹង១៣% នៃផ្ទៃដាំដុះសរុបទាំងអស់ ដោយបរិមាណផល ២៨៩តោន។ បើប្រៀបធៀប ទៅនឹងបរិមាណផលប្រចាំឆ្នាំ២០២៥ មានចំនួន ៥០៤៩តោន ៕
ចែករំលែកព័តមាននេះ