ខេត្តបាត់ដំបង ៖ គិតត្រឹមម៉ោង៤និង៣០នាទីរសៀលថ្ងៃទី២៣ មីនា ជនសង្ស័យចំនួន០៣នាក់ ដែលកម្លាំងសមត្ថកិច្ចនៃអធិការក្រុងបាត់ដំបងបង្ក្រាបបានក្នុងករណី«បន្លំចូលលួចលុយក្នុងផ្ទះអាជីវករយកអស់ចំនួនជិត៥០០លានរៀល និងគ្រឿងអល័ង្ការមួយចំនួនផង» កំពុងស្ថិតក្នុងដៃលោកចៅក្រមស៊ើបសួរនៃសាលាដំបូងខេត្តនៅឡើយ មុនពេលសម្រេចចេញដីកាបង្គាប់ឲ្យសមត្ថកិច្ចបញ្ជូនជនទាំង០៣នាក់ ដឹកយកទៅឃុំខ្លួនក្ម្នុងពន្ធនាគារជាបណ្ដោះអាសន្ន។
ជនសង្ស័យដៃឆើតទាំង០៣នាក់នោះ រួមមាន៖ ១ឈ្មោះ-វង់ កញ្ញា ភេទស្រី អាយុ១៦ឆ្នាំ រស់នៅភូមិពពាលខែ ឃុំអូរតាគី ស្រុកថ្មគោល ២-ឈ្មោះ ម៉ុន ម៉ុត ភេទស្រី អាយុ៣៩ឆ្នាំ (២នាក់នេះជាម្ដាយនិងកូន) និង៣-ឈ្មោះ ប៉ាកកា ជីឡូរី ភេទស្រី អាយុ១៦ឆ្នាំ ស្នាក់នៅមិនពិតប្រាកដ ។ ក្រុមជនសង្ស័យវ័យក្មេង និងចាស់ទាំង០៣នាក់នេះ ត្រូវបានកម្លាំងជំនាញនៃអធិការក្រុងបាត់ដំបងធ្វើការស្រាវជ្រាវ តាមឃាត់ខ្លួនបានជាបន្តបន្តាប់ ជាមួយនឹងការរឹបអូសវត្ថុតាងបានមួយចំនួនផង កាលពីល្ងាចថ្ងៃទី២០ មីនា បន្ទាប់ពីមន្ត្រីជំនាញទទួលពាក្យបណ្ដឹងជនរងគ្រោះ និងកំណត់បាននូវមុខសញ្ញាក្រុមជនសង្ស័យ ។
បើយោងលើរបាយការណ៍អធិការក្រុងបាត់ដំបង លោក ពេជ្រ សារ៉ែន បានឲ្យដឹងថា ករណី«បន្លំចូលលួចលុយ» រាប់រយលានរៀលខាងលើនេះ បានកើតឡើងតាំងពីរសៀលថ្ងៃទី ១៨ មីនា នៅផ្ទះអ្នកលក់ដូរសម្លៀកបំពាកគ្រប់មុខ បោះដុំមួយនៅចំណុចភូមិផ្កាស្លា សង្កាត់ចំការសំរោង ក្រុងបាត់ដំបង ដែលមានជនរងគ្រោះឈ្មោះ ថាច់ ប៊ុនសុង ភេទប្រុសអាយុ៤៣ឆ្នាំ ជាដើមបណ្ដឹង ។
លោក ពែជ្រេ សារ៉ែន បានប្រាប់ថា ក្នុងសំណុំរឿងអំពើ «ចោរកម្ម» គឺនាងៗវ័យ១៦ឆ្នាំ ទាំង០២នាក់នោះជាអ្នកប្រព្រឹត្តផ្ទាល់ រីឯស្ត្រីម្នាកជាម្ដាយអាយុ៣៨ឆ្នាំ ជាអ្នករួមគំនិតជួយលាក់ផលចោរកម្ម ។
លោកអធិការបានបញ្ជាក់ថា ក្រោយពីទទួលបណ្ដឹងពីជនរងគ្រោះ មន្ត្រីជំនាញរបស់លោកបានធ្វើការស្រាវជ្រាវកំណត់ទៅលើមុខសញ្ញាលើកញ្ញាវ័យក្មេងៗ ដែលពួកនាងធ្លាប់ដើរចូលផ្ទះគេកន្លងមក ហើយធ្លាប់ត្រូវកម្លាំងរបស់លោកចាប់យកមកអប់រំ តែលើកនេះលែងចូលលួចដៃធ្ងន់តែម្ដង ។
លោកអធិការបានបញ្ជាក់ថា បើតាមពិនិត្យកន្លែងកើតហេតុ ពួកនាងៗបានឡើងផ្លោះរបងខាងក្រោយផ្ទះ ដល់ទៅទាំង០២ជាន់ រួចលបចូលតាមទ្វារក្រោយ ខណៈម្ចាស់ផ្ទះកំពុងនៅលក់ដូរខាងមុខ ។ ពួកនាងបានចូលកកូរកកាយលួចយកថង់ច្រកលុយដ៏ធំ និង គ្រឿងអល័ង្ការមួយចំនួនផង បោះចេញទៅក្រៅរបងខាងក្រោយ រួចនាំគ្នាជញ្ជូនចេញដោយសុវត្ថិភាព តែទីបំផុត ជាប់ជុចដដែល ព្រោះពួកនាងៗជាមុខសញ្ញាចាស់ ។
ជុំវិញអំពើ «ចោរកម្ម» ដែលប្រព្រឹត្តក្រោមស្នាដៃនាងៗ វ័យ១៦ឆ្នាំខាងលើនេះ តុល្យការនៃការបាត់បង់ដែលសមត្ថកិច្ចបានស្រង់ចម្លើយជនរងគ្រោះរួមមាន៖ គឺមាន«លុយនិងគ្រឿងអលង្ការ» ។ ក្នុងនោះ មាន៖ ១- ប្រាក់ខ្មែរចំនួន៤៩៥,០០០,០០០លានរៀល (បួនរយកៅសិបប្រាំម៉ឺនលានរៀល) ២-ប្រាក់ដុល្លារចំនួន៤,០០០ដុល្លារ ៣-ខ្សែ.កមាស០១ខ្សែទម្ងន់០៣តំឡឹង និង ៤-ខ្សែកាឡៃ០១ខ្សែទម្ងន់០៥តំឡឹង ។
ប៉ុន្តែក្រោយពីត្រូវឃាត់ខ្លួនបានក្រុមចោរស្រីដៃឆើតវ័យក្មេង សមត្ថកិច្ចបានស្រាវជ្រាវរកឃើញ និងដកហូតវត្ថុតាងបានមកវិញមួយចំនួនដូចជា៖ ១-ប្រាក់ខ្មែរចំនួន២៦៧,៩៥០,០០០លានរៀល (ពីររយហុកសិបប្រាំពីរលានកៅសិបប្រាំម៉ឺនរៀល) ២-ខ្សែលោហៈពណ៌លឿងចំនួន០៤ខ្សែ ៣-ផ្លាកដៃលោហៈពណ៌លឿងចំនួន០១ខ្សែ ៤-ខ្សែដៃលោហៈពណ៌លឿងចំនួន០១ខ្សែ ៥-ក្រវិលលោហៈពណ៌លឿង០១គូ ៦-បន្ដោងព្រះចំនួន០១ ៦-ម៉ូតូម៉ាកស្គូពីគ្មានលេខ០១គ្រឿង ៩-ទូរស័ព្ទចំនួន០៤គ្រឿង រួមជាមួយវត្ថុតាងពាក់ព័ន្ធមួយទៀត ។
លោក ឈឿង គឹមសុង ស្នងការរងទទួលផែនព្រហ្មទណ្ឌបានបញ្ជាក់ថា ក្រុមជនសង្ស័យ ស្ត្រីវ័យក្មេងៗទាំងនេះ ត្រូវបានការិយាល័យជំនាញ កសាងសំណុំរឿងទៅកាន់សាលាដំបូងខេត្តហើយ តែកំពុងស្ថិតក្នុងដៃលោកចៅក្រមស៊ើបសួរនៅឡើយ មុនពេលលោកចៅក្រមសម្រេចចេញដីកាបង្គាប់នាំខ្លួនពួកគេទៅដាក់ពន្ធនាគារ ៕
ចែករំលែកព័តមាននេះ