រាជធានីភ្នំពេញ ៖ អគ្គនាយកដ្ឋានអន្តោប្រវេសន៍ បានប្រកាសនាយប់ថ្ងៃទី២២ ខែមេសានេះថា ៖ សមត្ថកិច្ចពិន័យម្ចាស់ទីតាំង រស់នៅប្រមូលផ្ដុំល្មើសអនុក្រឹត្យ០៣ សរុបទឹកប្រាក់ជាង១ពាន់លានរៀល ។…
រាជធានីភ្នំពេញ ៖ អគ្គនាយកដ្ឋានអន្តោប្រវេសន៍ បានប្រកាសនាយប់ថ្ងៃទី២២ ខែមេសានេះថា ៖ សមត្ថកិច្ចពិន័យម្ចាស់ទីតាំង រស់នៅប្រមូលផ្ដុំល្មើសអនុក្រឹត្យ០៣ សរុបទឹកប្រាក់ជាង១ពាន់លានរៀល ។
ក្នុងយុទ្ធនាការរឹតបន្តឹងការអនុវត្តខ្លឹមសារនៃអនុក្រឹត្យលេខ០៣ ស្ដីពីការគ្រប់គ្រងសន្ដិសុខសុវត្ថិភាព តាមទីតាំងរស់នៅប្រមូលផ្ដុំ សមត្ថកិច្ចបានចាត់វិធានការផាកពិន័យយ៉ាងតឹងរឹងលើម្ចាស់ទីតាំង និងបុគ្គលល្មើសច្បាប់មួយចំនួន ដោយទទួលបានទឹកប្រាក់សរុប ចំនួន១.៧៤៤.០០០.០០០រៀល ។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ ។
បើតាមរបាយការណ៍ ការផាកពិន័យនេះ បែងចែកជាពីរផ្នែកធំៗ រួមមានទី១ គឺការផាកពិន័យលើការស្នាក់នៅខុសច្បាប់ (៤លានរៀលក្នុងជនបរទេសម្នាក់) ដោយករណីនេះ សមត្ថកិច្ចផាកពិន័យបានទឹកប្រាក់១ពាន់ ៧២០លានរៀល ក្នុងនោះនៅភ្នំពេញមាន៩៥៦លានរៀល ព្រះសីហនុមាន៦៦៨លានរៀល កណ្តាលមាន៦០លានរៀល មណ្ឌលគិរីមាន២០លានរៀល និងខេត្តសៀមរាប មាន១៦លានរៀល ។
ចំណែក ទី២ គឺការផាកពិន័យលើការគ្រប់គ្រងប្រព័ន្ធសន្តិសុខ ទទួលបានទឹកប្រាក់ពិន័យចំនួន២៤លានរៀល រួមមានខេត្តមណ្ឌលគិរី ៤០០.០០០រៀល និងខេត្តកណ្តាល ២៣.៦០០.០០០រៀល ។
ដោយឡែក នៅក្នុងខែមេសានេះ គិតចាប់ពីថ្ងៃទី៣ ដល់ថ្ងៃទី២០ សមត្ថកិច្ចមូលដ្ឋានបានបើកយុទ្ធនាការបន្តចុះត្រួតពិនិត្យរដ្ឋបាលយ៉ាងសកម្មនៅតាមបណ្តារាជធានី-ខេត្ត សរុប២.៦៩៦ទីតាំង មានមនុស្សពាក់ព័ន្ធ២១.២៥៩នាក់ ក្នុងនោះ នៅរាជធានីភ្នំពេញ មាន១.០៤៥ទីតាំង តាកែវ មាន១.១០៨ទីតាំង ក្រចេះ មាន៣៤៥ទីតាំង ព្រះសីហនុ មាន៨៣ទីតាំង បន្ទាយមានជ័យ មាន៥៦ទីតាំង កំពង់ចាម មាន៣៧ទីតាំង មណ្ឌលគិរី មាន១២ទីតាំង ឧត្តរមានជ័យមាន៥ទីតាំង កណ្ដាល មាន៣ទីតាំង រតនគិរី មាន១ទីតាំង និងខេត្តសៀមរាប មាន១ទីតាំង។
ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបង្ហាញនូវឆន្ទៈយ៉ាងមុតមាំ ក្នុងនាមជាសេនាធិការដ៏សំខាន់របស់រាជរដ្ឋាភិបាល ក្នុងការអនុវត្តច្បាប់ឱ្យមានប្រសិទ្ធភាពខ្ពស់បំផុត ។ ឯកឧត្តមអភិសន្តិបណ្ឌិតបានសង្កត់ធ្ងន់ថា ការរឹតបន្តឹងអនុក្រឹត្យលេខ ០៣ មិនមែនធ្វើឡើងត្រឹមតែជាយុទ្ធនាការមួយគ្រានោះទេ ប៉ុន្តែ គឺជាកិច្ចការងារអាទិភាពដែលត្រូវអនុវត្តជាប្រចាំ ដើម្បីធានាឱ្យបាននូវការគ្រប់គ្រងជនបរទេស និងសន្តិសុខសណ្តាប់ធ្នាប់សង្គមឱ្យបានហ្មត់ចត់ ពិសេសរួមចំណែកបោសសម្អាត និងលុបបំបាត់ឱ្យអស់ បទល្មើសឆបោកតាមប្រព័ន្ធបច្ចេកវិទ្យា ។
ឯកឧត្តមឧបនាយករដ្ឋមន្ត្រី ក៏បានអំពាវនាវដល់អាជ្ញាធរគ្រប់លំដាប់ថ្នាក់ឱ្យបន្តសហការគ្នាជិតស្និទ្ធក្នុងការត្រួតពិនិត្យរដ្ឋបាល និងតាមដានរាល់សកម្មភាពមិនប្រក្រតី នៅតាមមូលដ្ឋាន ដើម្បីកសាងប្រទេសជាតិឱ្យកាន់តែមានសុវត្ថិភាព ផ្ដល់ទំនុកចិត្តខ្ពស់ដល់ប្រជាពលរដ្ឋ ក៏ដូចជាវិនិយោគិនបរទេសដែលមកធ្វើអាជីវកម្មស្របច្បាប់ ។
ប្រមុខក្រសួងមហាផ្ទៃ បានរំលឹក និងដាស់តឿនយ៉ាងទទូច ដល់ម្ចាស់ទីតាំងរស់នៅប្រមូលផ្ដុំទាំងអស់អនុវត្តកាតព្វកិច្ចរាយការវត្តមានជនបរទេស និងរៀបចំទីតាំងរបស់ខ្លួនឲ្យស្របតាមការកំណត់ក្នុងអនុក្រឹត្យ០៣ ចៀសវាងទទួលរងការផាកពិន័យ និងទណ្ឌកម្មផ្លូវច្បាប់ផ្សេងទៀត ។
សូមបញ្ជាក់ថា ទីតាំងស្នាក់នៅប្រមូលផ្តុំ គឺសំដៅទៅលើ ទីសំណាក់ប្រមូលផ្តុំ ឬលំនៅឋានប្រមូលផ្តុំ រួមមាន បុរី ខុនដូ អាផាតមិន រីសត បឹងកាឡូ អគារសហកម្មសិទ្ធិ រោងចក្រ សហគ្រាស កសិដ្ឋាន តំបន់សេដ្ឋកិច្ចពិសេស តំបន់ដីសម្បទានសេដ្ឋកិច្ច ផ្ទះសំណាក់ សណ្ឋាគារ អន្តេវាសិកដ្ឋាន វត្តអារាម វិហារសាសនា និងមណ្ឌលថែទាំកុមារកំព្រាជាដើម។
អនុក្រឹត្យលេខ០៣ ក៏បានបែងចែកតួនាទី និងភារកិច្ចដល់ អាជ្ញាធរ អភិបាលនៃគណៈអភិបាលរាជធានី-ខេត្ត ក្រុង ស្រុក ខណ្ឌ ត្រូវដឹកនាំត្រួតពិនិត្យ និងជំរុញការអនុវត្តការងារគ្រប់គ្រងការស្នាក់នៅ តាមទីតាំងរស់នៅប្រមូលផ្តុំ ។ ចំណែកស្នងការ និងអធិការ មានតួនាទីជាសេនាធិការជូនអភិបាល លើការរៀបចំផែនការ និងដឹកនាំគ្រប់គ្រងប៉ុស្តិ៍នគរបាលរដ្ឋបាលឃុំ-សង្កាត់ ដើម្បីអនុវត្តផែនការការងារគ្រប់គ្រង ការស្នាក់នៅតាមទីតាំងរស់នៅប្រមូលផ្តុំក្នុងដែនសមត្ថកិច្ច។
អនុក្រឹត្យនេះ ក៏បានកំណត់កាតព្វកិច្ចយ៉ាងច្បាស់ដល់ម្ចាស់ទីតាំង ប្រធាន ឬម្ចាស់ ឬអ្នកគ្រប់គ្រងទីតាំងរស់នៅប្រមូលផ្តុំ មានកាតព្វកិច្ចកត់ត្រាអ្នកស្នាក់នៅទាំងអស់ ដើម្បីរាយការណ៍ទៅសមត្ថកិច្ច ។ ការប្រែប្រួលអ្នកស្នាក់នៅក៏ត្រូវតែរាយការណ៍នឹងត្រូវសហការពេលសមត្ថកិច្ចចុះត្រួតពិនិត្យរដ្ឋបាល ។ ករណីមានវត្តមានជនបរទេសស្នាក់នៅបណ្តោះអាសន្ន ត្រូវរាយការណ៍ដល់មន្ត្រីប៉ុស្តិ៍នគរបាលរដ្ឋបាលឃុំ-សង្កាត់ ឬសមត្ថកិច្ច យូរបំផុត២៤ម៉ោង ។ មុនអនុញ្ញាតឱ្យស្នាក់នៅត្រូវឱ្យជនបរទេសផ្ដល់ឯកសារបញ្ជាក់អំពីសិទ្ធិស្នាក់នៅស្របច្បាប់បើផ្ទុយពីនេះ គឺមិនត្រូវឱ្យស្នាក់នៅជាដាច់ខាត។
ក្នុងករណីម្ចាស់ទីតាំង ឬអាជ្ញាធរមានសមត្ថកិច្ចមិនអនុវត្តតាមខ្លឹមសារនៃអនុក្រឹត្យនេះ នឹងត្រូវប្រឈមមុខនឹងទណ្ឌកម្មមួយចំនួនដូចជា ចំពោះម្ចាស់ទីតាំង ប្រធាន ម្ចាស់ ឬអ្នកគ្រប់គ្រងទីតាំងស្នាក់នៅប្រមូលផ្តុំណា ដែលមិនបានអនុវត្តកាតព្វកិច្ចខាងលើ នឹងត្រូវផាកពិន័យជាប្រាក់ចំនួន ៤លានរៀល ក្នុងជនបរទេសម្នាក់ (គុណប្រាក់តាមចំនួនជនបរទេសជាក់ស្តែង) ដោយមិនទាន់គិតដល់ទោសព្រហ្មទណ្ឌ ។
ដោយឡែក ចំពោះអាជ្ញាធរមានសមត្ថកិច្ច ដែលមិនបំពេញតួនាទីដោយស្មោះត្រង់ឬមានចេតនាលាក់បាំងជនបរទេសខុសច្បាប់ឱ្យស្នាក់នៅក្នុងដែនសមត្ថកិច្ចរបស់ខ្លួន នឹងត្រូវទទួលទណ្ឌកម្មវិន័យបណ្តេញចេញពីក្របខ័ណ្ឌ ដោយមិនទាន់គិតដល់ទោសព្រហ្មទណ្ឌឡើយ៕
ចែករំលែកព័តមាននេះ