ខេត្តមណ្ឌលគិរី ៖ អនុវត្តតាមសេចក្ដីណែនាំ និងការយកចិត្តទុកដាក់ខ្ពស់ពីសំណាក់ ឯកឧត្តម ថង សាវុន អភិបាលខេត្តមណ្ឌលគិរី ក្នុងការលើកកម្ពស់សោភ័ណភាពក្រុងឱ្យកាន់តែមានភាពស្រស់បំព្រង នាព្រឹកថ្ងៃទី១៩…
ខេត្តមណ្ឌលគិរី ៖ អនុវត្តតាមសេចក្ដីណែនាំ និងការយកចិត្តទុកដាក់ខ្ពស់ពីសំណាក់ ឯកឧត្តម ថង សាវុន អភិបាលខេត្តមណ្ឌលគិរី ក្នុងការលើកកម្ពស់សោភ័ណភាពក្រុងឱ្យកាន់តែមានភាពស្រស់បំព្រង នាព្រឹកថ្ងៃទី១៩ ខែមីនា ឆ្នាំ២០២៦ នេះ លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្តមណ្ឌលគិរី បានដឹកនាំក្រុមការងារបច្ចេកទេស និងគ្រឿងចក្រខ្នាតធំ ចុះបញ្ជាផ្ទាល់ក្នុងប្រតិបត្តិការកែលម្អចិញ្ចើមផ្លូវ និងចាក់ថ្មក្រាលកៅស៊ូប្រភេទ DBST តាមបណ្ដោយផ្លូវភ្លោះក្នុងក្រុងសែនមនោរម្យ។ចាប់ពីរង្វង់មូលគោព្រៃ រហូតដល់ចំណុចផ្លូវបំបែកក្រោយរូបសំណាក់ដំរីដែក ដែលជាខ្សែផ្លូវសេដ្ឋកិច្ច និងទេសចរណ៍ដ៏សំខាន់បំផុតចំកណ្ដាលបេះដូងនៃក្រុងសែនមនោរម្យ។
លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត បានមានប្រសាសន៍ថា សកម្មភាពស្ថាបនា និងកែលម្អផ្លូវភ្លោះនាពេលនេះ គឺធ្វើឡើងដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋក្នុងមូលដ្ឋាន ក៏ដូចជាការត្រៀមលក្ខណៈជាស្រេចក្នុងការស្វាគមន៍ភ្ញៀវទេសចរជាតិ និងអន្តរជាតិ ដែលនឹងអញ្ជើញមកកម្សាន្តក្នុងខេត្តមណ្ឌលគិរី នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់ក្នុងពេលឆាប់ៗខាងមុខនេះ។
លោកប្រធានមន្ទីរបានបញ្ជាក់បន្ថែមថា ក្រោមការចង្អុលបង្ហាញផ្ទាល់ពី ឯកឧត្តមអភិបាលខេត្ត មន្ទីរបាននិងកំពុងខិតខំប្រឹងប្រែងអស់ពីកម្លាំងកាយចិត្ត ដើម្បីធានាថាហេដ្ឋារចនាសម្ព័ន្ធក្នុងក្រុងសែនមនោរម្យមានភាពល្អប្រសើរ មិនត្រឹមតែផ្ដល់ភាពងាយស្រួលក្នុងការធ្វើដំណើរប៉ុណ្ណោះទេ ប៉ុន្តែថែមទាំងជាការទាក់ទាញភ្ញៀវទេសចរឱ្យកាន់តែច្រើនមកកាន់ខេត្តរបស់យើង ដែលជាផ្នែកមួយក្នុងការជំរុញសេដ្ឋកិច្ចមូលដ្ឋានឱ្យកាន់តែរីកចម្រើន។ ក្រុមការងារបច្ចេកទេសបានផ្ដោតសំខាន់លើការសម្អាតផ្ទៃផ្លូវ ការកែលម្អនិងការចាក់កៅស៊ូប្រភេទ DBST ដើម្បីធានាបាននូវភាពរឹងមាំ គុណភាពជាប់បានយូរ និងបង្កើនសោភ័ណភាពផ្លូវឱ្យស័ក្តិសមជាទីក្រុងទេសចរណ៍គំរូ។
គួរបញ្ជាក់ផងដែរថា ក្រុងសែនមនោរម្យ ខេត្តមណ្ឌលគិរី គឺជាគោលដៅទេសចរណ៍ដ៏មានសក្ដានុពលបំផុតមួយក្នុងតំបន់ភូមិភាគឦសាន។ ការកែលម្អហេដ្ឋារចនាសម្ព័ន្ធផ្លូវថ្នល់ និងការរៀបចំសណ្ដាប់ធ្នាប់សោភ័ណភាពឱ្យបានស្អាតបាត និងមានរបៀបរៀបរយបែបនេះ នឹងក្លាយជាកម្លាំងចលករយ៉ាងសំខាន់ក្នុងការលើកមុខមាត់ខេត្ត និងផ្ដល់នូវភាពកក់ក្ដៅ សុវត្ថិភាពដល់អ្នកធ្វើដំណើរគ្រប់រូប។ជាមួយគ្នានេះ អាជ្ញាធរខេត្ត និងមន្ទីរជំនាញ ក៏បានអំពាវនាវដល់បងប្អូនប្រជាពលរដ្ឋ និងអ្នកធ្វើដំណើរទាំងអស់ សូមមេត្តាយោគយល់ចំពោះការរំខានបន្តិចបន្តួចក្នុងអំឡុងពេលស្ថាបនា និងសូមចូលរួមថែរក្សាសម្បត្តិធារណៈទាំងអស់គ្នា ដើម្បីឱ្យសម្រស់ក្រុងសែនមនោរម្យនៅតែមានភាពស្រស់ត្រកាលជានិរន្តរ៍៕
ចែករំលែកព័តមាននេះ