ប្រទេសជប៉ុន ៖ ការព្រមានអំពីរលកយក្សស៊ូណាមិ ជាមួយនឹងការគំរាមកំហែងនៃរលកយក្សរហូតដល់ ៣ ម៉ែត្រ ត្រូវបានចេញផ្សាយនៅរសៀលថ្ងៃទី២០ ខែមេសា ឆ្នាំ២០២៦ (ម៉ោងនៅជប៉ុន)…
ប្រទេសជប៉ុន ៖ ការព្រមានអំពីរលកយក្សស៊ូណាមិ ជាមួយនឹងការគំរាមកំហែងនៃរលកយក្សរហូតដល់ ៣ ម៉ែត្រ ត្រូវបានចេញផ្សាយនៅរសៀលថ្ងៃទី២០ ខែមេសា ឆ្នាំ២០២៦ (ម៉ោងនៅជប៉ុន) សម្រាប់ខេត្ត Iwate, Aomori និង Hokkaido ភាគខាងជើងប្រទេសជប៉ុន បន្ទាប់ពីការរញ្ជួយដីកម្រិត ៧,៤ រ៉ិចទ័របានវាយប្រហារឆ្នេរសមុទ្រ Iwate។
ពិធីករទូរទស្សន៍ជប៉ុន NHK ម្នាក់ បានជំរុញឱ្យប្រជាជននៅក្នុងតំបន់ផ្លាស់ទីទៅរកកន្លែងខ្ពស់ៗ ឆ្ងាយពីទន្លេ និងឆ្នេរសមុទ្រ បន្ទាប់ពីទីភ្នាក់ងារឧតុនិយមជប៉ុន បានរាយការណ៍ពីគ្រោះរញ្ជួយដីកម្រិត ៧,៤ រ៉ិចទ័រ ដែលបានវាយប្រហារនៅជម្រៅ ១០ គីឡូម៉ែត្រនៃឆ្នេរសមុទ្រ Iwate វេលាម៉ោង ៤:៥៣ នាទីរសៀល ម៉ោងក្នុងស្រុក ដែលត្រូវនឹងម៉ោង ២:៥៣នាទី ម៉ោងនៅកម្ពុជា។
ទីភ្នាក់ងារឧតុនិយមជប៉ុនបានចេញផ្សាយបញ្ជីពេញលេញនៃការព្រមាន និងការណែនាំស្តីអំពីរលកយក្សស៊ូណាមិ សម្រាប់ខេត្ត Iwate, Aomori និង Hokkaido ជាមួយនឹងការណែនាំឱ្យប្រុងប្រយ័ត្ន ដែលត្រូវបានចេញផ្សាយសម្រាប់ផ្នែកផ្សេងទៀតនៃឆ្នេរសមុទ្រប៉ាស៊ីហ្វិកនៃខេត្ត Miyagi និង Fukushima ផងដែរ ដោយកម្ពស់ទឹកអាចឡើងដល់ ១ ម៉ែត្រនៅក្នុងតំបន់ទាំងនោះ។
ប្រតិបត្តិកររថភ្លើងល្បឿនលឿន Tohoku Shinkansen បានប្រកាសអំពីការផ្អាកសេវាកម្មរវាងស្ថានីយ៍ទីក្រុងតូក្យូ និងស្ថានីយ៍ Shin-Aomori ដោយសារតែការរញ្ជួយដី។ រីឯក្រុមហ៊ុនថាមពលអគ្គិសនីតូក្យូ ក៏បានរាយការណ៍ថា ខ្លួនកំពុងតែពិនិត្យមើលថា តើការរញ្ជួយដីបានបង្កបញ្ហាណាមួយនៅរោងចក្រថាមពលនុយក្លេអ៊ែរ Fukushima Daiichi និង Fukushima Daini របស់ខ្លួនដែរឬទេ។ ស្របពេលដែលក្រុមហ៊ុនថាមពលអគ្គិសនី Tohoku កំពុងតែធ្វើការត្រួតពិនិត្យស្រដៀងគ្នានេះ នៅរោងចក្រថាមពលនុយក្លេអ៊ែរ Onagawa របស់ខ្លួនក្នុងខេត្ត Miyagi និងរោងចក្រថាមពលនុយក្លេអ៊ែរ Higashidori ក្នុងខេត្ត Aomori។ ប្រតិបត្តិកររោងចក្រថាមពលនុយក្លេអ៊ែរ Fukushima Daini នៅក្នុងខេត្ត Fukushima បានអះអាងថា រហូតមកដល់ពេលនេះ មិនទាន់មានរបាយការណ៍អំពីភាពមិនប្រក្រតីណាមួយនៅក្នុងរោងចក្រនេះនៅឡើយទេ៕ ប្រភព ៖ NHK និង BBC
ចែករំលែកព័តមាននេះ