ខេត្តកំពង់ស្ពឺ ៖ អធិការរដ្ឋាននគរបាលស្រុកសាមគ្គីមុនីជ័យ បានប្រកាសនាយប់ថ្ងៃទី១៩ ខែមេសា ឆ្នាំ២០២៦នេះថា ៖ កម្លាំងនគរបាលស្រុកសាមគ្គីមុនីជ័យ បង្ក្រាបចោរគាស់ផ្ទះម្នាក់ភ្លាមៗ ក្រោយធ្វើសកម្មភាពលួចធុងបាស់…
ខេត្តកំពង់ស្ពឺ ៖ អធិការរដ្ឋាននគរបាលស្រុកសាមគ្គីមុនីជ័យ បានប្រកាសនាយប់ថ្ងៃទី១៩ ខែមេសា ឆ្នាំ២០២៦នេះថា ៖ កម្លាំងនគរបាលស្រុកសាមគ្គីមុនីជ័យ បង្ក្រាបចោរគាស់ផ្ទះម្នាក់ភ្លាមៗ ក្រោយធ្វើសកម្មភាពលួចធុងបាស់ និងម៉ូទ័រពីប្រជាពលរដ្ឋ ។
អធិការរដ្ឋាននគរបាលស្រុកសាមគ្គីមុនីជ័យ បានបន្តថា ដោយអនុវត្តតាមការដឹកនាំបញ្ជាដ៏ខ្ពង់ខ្ពស់ ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ កម្លាំងអធិការដ្ឋាននគរបាលស្រុកសាមគ្គីមុនីជ័យ បង្ក្រាបករណីវាយទ្វាផ្ទះលួចទ្រព្យសម្បត្តិ(លួចធុងបាស់ និងម៉ូទ័រ) ។
នៅថ្ងៃទី១៩ ខែមេសាឆ្នាំ២០២៦ វេលាម៉ោង១០: ៣០នាទី ប៉ុស្ដិ៍នគរបាលរដ្ឋបាលចាន់សែន នៃអធិការដ្ឋាននគរបាលស្រុកសាមគ្គីមុនីជ័យ បានទទួលពាក្យបណ្តឹងពីឈ្មោះ មាជ ទុំ ភេទស្រី អាយុ៦២ឆ្នាំ រស់នៅភូមិត្រពាំងអំពិល ឃុំចាន់សែន ស្រុកសាមគ្គីមុនីជ័យ បានប្តឹងទៅលើជនសង្ស័យឈ្មោះ ថាវ បូរី ភេទប្រុស អាយុ២០ឆ្នាំ រស់នៅក្នុងភូមិព្រៃជង្រុក ឃុំមានជ័យ ស្រុកសាមគ្គីមុនីជ័យ ថាកាលពីថ្ងៃទី១៧ ខែមេសា ឆ្នាំ២០២៦ ម៉ោង១៧និង១០នាទី ជនសង្ស័យខាងលើ បានវៃសោបើកទ្វាផ្ទះចូលលួចធុងបាស់ និងម៉ូតូទ័ររបស់គាត់ ។
ក្រោយទទួលពាក្យបណ្ដឹងពីជនរងគ្រោះ សមត្ថកិច្ចបានឃាត់ខ្លួនជនសង្ស័យខាងលើ យកមកសាកសួរ រូបគេក៏ឆ្លើយសារភាពថា រូបគេពិតជាបានគាស់ទ្វាផ្ទះរបស់ជនរងគ្រោះចូលលួចធុងបាស់ និងម៉ូទ័រពិតប្រាកដមែន ។
ចំពោះវត្ថុតាងដកហូត: ធុងបាស់ចំនួន០២គ្រាប់ ម៉ូទ័រ០១គ្រឿង កំណាត់ឈើសម្រាប់វាយសោរផ្ទះ០១ដើម និងមេសោរ០១គ្រាប់ ។
បច្ចុប្បន្នជនសង្ស័យខាងលើត្រូវបានឃាត់ខ្លួននៅអធិការដ្ឋាននគរបាលស្រុកសាមគ្គីមុនីជ័យ ដើម្បីកសាងសំណុំរឿងចាត់ការតាមនីតិវិធីបន្ត ។
ចែករំលែកព័តមាននេះ