ខេត្តមណ្ឌលគិរី ៖ ក្នុងកិច្ចខិតខំប្រឹងប្រែងបំប្លែងការអភិរក្សធនធានធម្មជាតិ ឱ្យទៅជាប្រាក់ចំណូលជួយសហគមន៍ គម្រោងរេដបូកកែវសីមា បានប្រកាសបញ្ចេញកញ្ចប់ថវិកាមូលនិធិសរុបចំនួន ១,៨៣៩,៣២០ ដុល្លារអាមេរិក ជូនដល់សហគមន៍ជនជាតិដើមភាគតិច និងសហគមន៍មូលដ្ឋានចំនួន…
ខេត្តមណ្ឌលគិរី ៖ ក្នុងកិច្ចខិតខំប្រឹងប្រែងបំប្លែងការអភិរក្សធនធានធម្មជាតិ ឱ្យទៅជាប្រាក់ចំណូលជួយសហគមន៍ គម្រោងរេដបូកកែវសីមា បានប្រកាសបញ្ចេញកញ្ចប់ថវិកាមូលនិធិសរុបចំនួន ១,៨៣៩,៣២០ ដុល្លារអាមេរិក ជូនដល់សហគមន៍ជនជាតិដើមភាគតិច និងសហគមន៍មូលដ្ឋានចំនួន ២០ ភូមិគោលដៅ ក្នុងខេត្តមណ្ឌលគិរី។ ថវិកានេះ គឺជាលទ្ធផលដែលបានមកពីការលក់ឥណទានកាបូន ក្នុងដំណាក់កាលទី៥ ឆ្នាំ២០២៦ ដើម្បីបន្តគាំទ្រដល់ជីវភាពរស់នៅរបស់សហគមន៍ ដែលបានលះបង់កម្លាំងកាយចិត្តក្នុងការការពារព្រៃឈើ។
យោងតាមរបាយការណ៍ដែលកោះសន្តិភាពទទួលបាននាថ្ងៃទី១៨ ខែមីនា ឆ្នាំ២០២៦ បានឲ្យដឹងថា ថវិកាមួយផ្នែកធំត្រូវបានបង្វែរទៅលើការកសាង និងជួសជុលផ្លូវលំក្នុងភូមិ ការស្ថាបនាស្ពាន និងលូបង្ហូរទឹក ដើម្បីសម្រួលដល់ការធ្វើដំណើរ និងការដឹកជញ្ជូនកសិផល។ ទន្ទឹមនឹងនេះ ការកសាងអណ្ដូងទឹកស្អាត អាងស្តុកទឹក និងប្រព័ន្ធចែកចាយទឹកដល់ខ្នងផ្ទះ ក៏ជាអាទិភាពចម្បងដែលជួយឱ្យពលរដ្ឋមានទឹកស្អាតប្រើប្រាស់គ្រប់គ្រាន់។
ក្នុងរបាយការណ៍ដដែលបន្តថា ដើម្បីកសាងធនធានមនុស្សក្នុងតំបន់ដាច់ស្រយាល ថវិកានេះត្រូវបានប្រើសម្រាប់ផ្ដល់អាហាររូបករណ៍ដល់សិស្សក្រីក្រ ការអនុវត្តកម្មវិធីផ្ដល់អាហារពេលព្រឹកមានជីវជាតិដល់កុមារនៅតាមសាលារៀន និងការជួយឧបត្ថម្ភថវិកាសម្រាប់បញ្ជូនអ្នកជំងឺទៅកាន់មន្ទីរពេទ្យ រួមទាំងការទិញសម្ភារសុខាភិបាលចាំបាច់សម្រាប់សហគមន៍។
គម្រោងខាងលើបានផ្ដោតសំខាន់លើការបង្កើត «មូលនិធិឥណទានសហគមន៍» ដែលអនុញ្ញាតឱ្យសមាជិកខ្ចីបុលយកទៅពង្រីកមុខរបរដូចជា ការចិញ្ចឹមសត្វ បច្ចេកទេសដាំដុះកសិកម្មថ្មីៗ និងការបង្កើតសេវាកម្មទេសចរណ៍សហគមន៍។ ការងារនេះបានជួយឱ្យសហគមន៍មានចំណូលស្ថិរភាព និងកាត់បន្ថយការពឹងផ្អែកលើការទាញយកផលអនុផលព្រៃឈើ។ថវិកាមួយផ្នែកត្រូវបានប្រើប្រាស់សម្រាប់ទ្រទ្រង់ដំណើរការចុះបញ្ជីដីធ្លីសមូហភាពសហគមន៍ជនជាតិដើមភាគតិច ដើម្បីធានានូវសិទ្ធិកាន់កាប់ដីធ្លីស្របច្បាប់។ បន្ថែមពីនេះ វាក៏បានជួយដល់ការរៀបចំពិធីបុណ្យប្រពៃណី និងការថែរក្សាព្រៃអារក្ស ដែលជាទីសក្ការៈ និងជាអត្តសញ្ញាណវប្បធម៌របស់បងប្អូនជនជាតិដើមភាគតិច។
ដើម្បីធានាថាព្រៃឈើនៅតែមានភាពស្រស់បំព្រង ថវិកាមូលនិធិបានផ្ដល់ជាសោហ៊ុយធ្វើដំណើរ និងម្ហូបអាហារដល់ក្រុមល្បាតសហគមន៍ ដែលចុះធ្វើសកម្មភាពទប់ស្កាត់បទល្មើសព្រៃឈើ និងការបរបាញ់សត្វព្រៃ ដោយសហការយ៉ាងជិតស្និទ្ធជាមួយមន្ត្រីឧទ្យានុរក្ស។គម្រោងរេដបូកកែវសីមាដែលកំពុងប្រមូលថវិកាពីការលក់កាបូននាពេលនេះ ក្រោមការដឹកនាំសម្របសម្រួលពីក្រសួងបរិស្ថាន និងរដ្ឋបាលខេត្តមណ្ឌលគិរី មានមន្ទីរបរិស្ថានខេត្តជាសេនាធិការ បានសបញ្ជាក់ឱ្យឃើញថា ការរួមគ្នាការពារព្រៃឈើមិនត្រឹមតែជួយដល់បរិស្ថានពិភពលោកប៉ុណ្ណោះទេ ប៉ុន្តែវាបាននាំមកនូវការអភិវឌ្ឍ និងស្នាមញញឹមយ៉ាងពិតប្រាកដដល់ប្រជាសហគមន៍នៅមូលដ្ឋាន៕
ចែករំលែកព័តមាននេះ