ថ្មីៗនេះតារាភាពយន្តចិននាងតាំង វេ (Tang Wei) បាននិយាយថា ការបរិភោគខ្លាញ់ដែលយកចេញពីសាច់ គឺមានសារប្រយោជន៍ដល់ស្បែករបស់លោកអ្នក ។ នាងនិយាយបែបនេះនៅក្នុងពិធីសម្ពោធបើកសាខាក្រុមហ៊ុនផលិតផលថែរក្សាសម្ផស្សម៉ាក SK II របស់ជប៉ុន ។
តារាភាពយន្តអាយុ៣២ឆ្នាំ រាងតូចច្រឡឹងរូបនេះទទួលអារម្មណ៍រំភើបញាប់ញ័រ ខណៈពេលឃើញអ្នកសារព័ត៌មានមកចូលរួមយ៉ាងច្រើន ហើយនាងខំប្រឹងទប់ជំហរ និងនិយាយថា ការបរិភោគអាហារទាំងនេះនឹងមិនបណ្តាលឱ្យលោកអ្នកកើនជាតិខ្លាញ់ឡើយ ប្រសិនបើលោកអ្នកហាត់ប្រាណនោះ ។
នៅក្នុងកិច្ចសម្ភាសន៍ជាមួយ RazorTV នាងបាននិយាយថា «វាជាអាហារផ្តល់ថាមពលដល់រាងកាយ ដោយសារលោកអ្នកអាចទទួលនូវសារធាតុបំប៉នកម្លាំងពីអាហារទាំងនោះ វាអាចឱ្យរាងកាយរបស់លោកអ្នកកាត់បន្ថយនូវកាឡូរី» ។
ការចែករំលែកនូវចំណេះដឹងនេះ នាងក៏បានបង្ហើបពីអាថ៌កំបាំងដើម្បីថែរក្សារាងឱ្យនៅតូចច្រឡឹង រួមទាំងវិធីសាស្ត្រក្នុងការតមអាហារពេញមួយថ្ងៃ ដោយមិនចាំបាច់ញ៉ាំផងដែរ ។ នាងបានបន្តថា ជារឿយៗភាពល្ហិតល្ហៃហេវហត់បានបណ្តាលឱ្យនាងបរិភោគអាហារយ៉ាងច្រើនក្រោយមកនាងក៏ធាត់ឡើងៗ ។ ពេលនោះរាងកាយរបស់នាងកាន់តែទន់ខ្សោយ ហើយនាងគិតថា សុខភាពរបស់នាងមិនល្អឡើយ ។ ដូច្នេះហើយនាងក៏បានរៀបចំពេលវេលាថ្មីមួយដើម្បីធ្វើលំហាត់ប្រាណឱ្យបានច្រើនតាមដែលអាចធ្វើទៅបាន ។
នាងតាំង វេ បានបន្ថែមទៀតថា នៅពេលដែលលោកអ្នកបរិភោគច្រើន ការងារដែលលោក អ្នកត្រូវធ្វើនោះ គឺហាត់ប្រាណឱ្យបានច្រើន ដើម្បីបញ្ចេញកម្លាំង បន្ទាប់មកលោកអ្នកអាចបរិភោគបន្ថែមទៀត តាមដែលសរីរាង្គយើងត្រូវការ ។ នាងបានលើកទឹកចិត្តចំពោះការរស់នៅប្រកបដោយសុខភាពផងដែរ គឺគេងពីព្រលប់ក្រោកពីព្រលឹម និងធ្វើលំហាត់ប្រាណឱ្យបានច្រើន ដើម្បីឱ្យរាងកាយចេញញើស ។
គួរបញ្ជាក់ថា នាងតាំង វេ កើតនៅថ្ងៃទី ៧ តុលា ឆ្នាំ១៩៧៩ នៅតំបន់ហង់ហ្ស៊ូ (Hang Zhou) ខេត្តស៊ីជាង (Zhejiang) ប្រទេសចិន ។ នាងចាប់ផ្តើមល្បីឈ្មោះបោះសំឡេងក្នុងឆ្នាំ២០០៧ ក្រោយពីស្នាដៃសម្តែងរបស់នាងក្នុងរឿង Lust Caution ដែលនិពន្ធដោយលោក Ang Lee ត្រូវបានទស្សនិកជនគាំទ្រ និងស្ងើចសរសើរ ហើយស្នាដៃសម្តែងចុងក្រោយរបស់នាងគឺក្នុងរឿង Wu Xia ដែលចូលរួមសម្តែងដោយលោក Donnie Yen (កុំកុំ) និងរឿង Speed Angel ដែលនឹងដាក់បញ្ចាំងនៅពេលឆាប់ៗខាងមុខនេះ ៕
ចែករំលែកព័តមាននេះ