ខេត្តបន្ទាយមានជ័យ ៖ នាព្រឹកថ្ងៃទី២៨ កក្កដា នៅស្នងការដ្ឋាននគរបាលខេត្ត មានរៀបចំពិធីប្រគល់ថវិកាជូនដល់ក្រុមគ្រួសារសពមន្ត្រីនគរបាលទទួលមរណភាព និងភរិយាទទួលមរណភាពសរុបចំនួន៣នាក់ ក្រោមអធិបតីភាពលោកវរសេនីយ៍ឯកចាន់ កុសល ស្នងការរង និងជាប្រធានសេនាធិការដ្ឋាននៃស្នងការដ្ឋាននគរបាលខេត្ត និងមានការចូលរួមពីលោកនាយការិយាល័យបុគ្គលិក ។
តាមរបាយការណ៍របស់ការិយាល័យបុគ្គលិក បានបង្ហាញថា ការឧបត្ថម្ភថវិការបស់សមាគមមិត្តនគរបាលជាតិកម្ពុជានាពេលនេះមានចំនួន៣នាក់ ក្នុងនោះសមាជិករបស់សមាគមម្នាក់ ឈ្មោះមុត ស៊ី ជាមន្ត្រីការិយាល័យបង្ការនិងពន្លត់អគ្គីភ័យនៃស្នងការដ្ឋានខេត្តដែលទទួលមរណភាព ។ ក្រៅពីនេះ មានភរិយារបស់សមាជិកចំនួន២នាក់ទៀត ទទួលមរណភាពគឺ១-ភរិយារបស់លោកទូច គឹមហ៊ាង នាយរងការិយាល័យកណ្តាលស្ថិតិអគ្គិភ័យ និង២-ភរិយាលោកយ៉ិត ប៊ុនណា មន្ត្រីនគរបាលវរសេនាតូចលេខ៨១៥ នៃស្នងការដ្ឋានខេត្ត ។
នាឱកាសនោះ លោកវរសេនីយ៍ឯក ចាន់ កុសល ស្នងការរង តំណាងលោកឧត្តមសេនីយ៍ស្នងការនគរបាលខេត្ត បានសម្តែងនូវការសោកស្តាយនិងចូលរួមមរណទុក្ខជាមួយនឹងក្រុមគ្រួសារសព ដែលបានបាត់បង់ប្តី ភរិយា និងឪពុក ម្តាយជាទីស្រឡាញ់របស់ខ្លួន។ ទន្ទឹមនោះ ស្នងការដ្ឋានក៏បានបាត់បង់មន្ត្រីនគរបាលដែលធ្លាប់បំពេញភារកិច្ចក្នុងតួនាទីជាអ្នកបម្រើការងារសង្គម ការពារផលប្រយោជន៍របស់ប្រជាពលរដ្ឋផងដែរ ។
លោកស្នងការរងបានបញ្ជាក់ថា តាមលក្ខន្តិកៈរបស់សមាគមមិត្តនគរបាលជាតិកម្ពុជា ដែលបានផ្តួចផ្តើមដោយលោកអគ្គស្នងការនគរបាលជាតិ គឺមន្ត្រីនរបាលជាតិកម្ពុជាដែលជាសមាជិកសមាគមទទួលមរណភាពម្នាក់ទទួលបានថវិកាពីសមាគមចំនួន៤លានរៀល និងភរិយារបស់សមាជិកទទួលមរណភាពម្នាក់ទទួលបានចំនួនមួយលានរៀល ៕
ចែករំលែកព័តមាននេះ