រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌខណ្ឌទួលគោកធ្វើការស្រាវជ្រាវឃាត់ ខ្លួនបន្ទាប់ពីធ្វើសកម្មភាពចូលលួចយកសម្ភារៈ និងលុយ នៅក្នុងហាងកាហ្វេ THE PEACE គិតជាប្រាក់ប្រមាណ១,៧៥០ដុល្លារ…
រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌខណ្ឌទួលគោកធ្វើការស្រាវជ្រាវឃាត់ ខ្លួនបន្ទាប់ពីធ្វើសកម្មភាពចូលលួចយកសម្ភារៈ និងលុយ នៅក្នុងហាងកាហ្វេ THE PEACE គិតជាប្រាក់ប្រមាណ១,៧៥០ដុល្លារ រួចគេចខ្លួន បានប្រមាណជាង៦ម៉ោង ។
ជនសង្ស័យរូបនោះឈ្មោះ ជា សុភ័ក្រ ភេទប្រុស អាយុ៤១ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ មានសារធាតុញៀ.ន ។
តាមនគរបាលខណ្ឌទួលគោក បានឱ្យដឹងថា ជនសង្ស័យត្រូវបានកម្លាំងផ្នែកជំនាញនៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួន នៅថ្ងៃទី១១ ខែមីនា ឆ្នាំ២០២៦ វេលាម៉ោងប្រហែល០៨និង៣០នាទីព្រឹក នៅចំណុចលើផ្លូវរថភ្លើង ភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ ពីបទ លួច (ចូលក្នុងហាងកាហ្វេលួចទ្រព្យសម្បត្តិសរុបជាទឹកប្រាក់ ១,៧៥០ដុល្លារ) ដែលបានប្រព្រឹត្តបទល្មើសនៅចំណុចហាងកាហ្វេ THE PEACE ទីតាំងផ្ទះលេខ៧B ផ្លូវលេខ៦០៨ ក្រុមទី១០២ ភូមិ២២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ កាលពីថ្ងៃទី១០ ខែមីនា ឆ្នាំ២០២៦ វេលាម៉ោងប្រហែល០២:២៨នាទីយប់រំលងអធ្រាត្រ ។
តាមនគរបាលបានឲ្យដឹងទៀតថា នៅយប់រំលងអធ្រាត្រ ខណៈដែលជនរងគ្រោះ ឈ្មោះ ចាន់ ស៊ីណា ភេទប្រុស អាយុ២៥ឆ្នាំ ជនជាតិខ្មែរ មុខរបរលក់ដូរ កំពុងតែដេកលង់លក់ជនសង្ស័យបានចូលធ្វើសកម្មភាពលួចយកសម្ភារៈរួមមានៈ ទូកាសៀ គិតលុយ ចំនួន០១ , Laptop ពណ៌ខ្មៅ ចំនួន០១ , ហ្គីតាចំនួន០១ , តុនិងកៅអីចំនួន០២ឈុត , លុយចំនួន៥០០ដុល្លារ (ប្រាំរយដុល្លារសហរដ្ឋអាមេរិក) និងភេសជ្ជៈមួយចំនួន តែគិតជាប្រាក់សរុបជាទឹកប្រាក់១,៧៥០ដុល្លារ ។
លុះព្រឹកឡើង សមត្ថកិច្ចព្រហ្មទណ្ឌនគរបាលខណ្ឌទួលគោកសហការជាមួយនឹងនគរបាលប៉ុស្តិ៍ បានធ្វើការស្រាវជ្រាវហើយឈានទៅឃាត់ខ្លួនបានជនសង្ស័យខាងលើ។
ជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅ អធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការតាមនីតិវិធី៕
ចែករំលែកព័តមាននេះ