ទីក្រុងហាណូយ ៖ ក្រសួងពាណិជ្ជកម្មវៀតណាមបានអំពាវនាវដល់បណ្តាអាជីវកម្មក្នុងស្រុកឱ្យលើកទឹកចិត្តបុគ្គលិកពួកគេធ្វើការពីផ្ទះជាផ្នែកមួយនៃកិច្ចខិតខំប្រឹងប្រែង ដើម្បីសន្សំសំចៃប្រេងឥន្ធនៈ អំឡុងពេលការរំខានដល់ការផ្គត់ផ្គង់ និងការកើនឡើងតម្លៃបង្កឡើងដោយសង្គ្រាមនៅអ៊ីរ៉ង់។ នេះបើយោងតាមប្រភពពី Reuters ចេញផ្សាយនៅថ្ងៃទី១០ ខែមីនា…
ទីក្រុងហាណូយ ៖ ក្រសួងពាណិជ្ជកម្មវៀតណាមបានអំពាវនាវដល់បណ្តាអាជីវកម្មក្នុងស្រុកឱ្យលើកទឹកចិត្តបុគ្គលិកពួកគេធ្វើការពីផ្ទះជាផ្នែកមួយនៃកិច្ចខិតខំប្រឹងប្រែង ដើម្បីសន្សំសំចៃប្រេងឥន្ធនៈ អំឡុងពេលការរំខានដល់ការផ្គត់ផ្គង់ និងការកើនឡើងតម្លៃបង្កឡើងដោយសង្គ្រាមនៅអ៊ីរ៉ង់។ នេះបើយោងតាមប្រភពពី Reuters ចេញផ្សាយនៅថ្ងៃទី១០ ខែមីនា ឆ្នាំ២០២៦។
រដ្ឋាភិបាលវៀតណាម នៅថ្ងៃទី១០ ខែមីនា ឆ្នាំ២០២៦ បានបញ្ជាក់នៅក្នុងសេចក្តីថ្លែងការណ៍មួយថា វៀតណាម គឺជាប្រទេសមួយក្នុងចំណោមប្រទេសរងផលប៉ះពាល់ខ្លាំងបំផុតដោយការរំខានលើការផ្គត់ផ្គង់ប្រេងឥន្ធនៈ ចាប់តាំងពីសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់បានចាប់ផ្តើម ដោយបានពឹងផ្អែកយ៉ាងខ្លាំងលើការនាំចូលប្រេងពីមជ្ឈិមបូព៌ា។
សេចក្តីថ្លែងការណ៍នេះបានឱ្យដឹងបន្តថា បណ្តាអាជីវកម្មត្រូវលើកទឹកចិត្តឱ្យបុគ្គលិកពួកគេធ្វើការពីផ្ទះជាមួយការងារដែលអាចធ្វើពីផ្ទះបាន ដើម្បីកាត់បន្ថយតម្រូវការសម្រាប់ការធ្វើដំណើរ និងការដឹកជញ្ជូន។
បើតាមទិន្នន័យពីក្រុមប្រេងឥន្ធនៈជាតិវៀតណាម Petrolimex បានបង្ហាញថា តម្លៃប្រេងសាំងនៅក្នុងប្រទេសអាស៊ីអាគ្នេយ៍មួយនេះ បានកើនឡើង ៣២% ម៉ាស៊ូតកើនឡើង ៥៦% និងប្រេងកាតកើនឡើង ៨០% ចាប់តាំងពីចុងខែមុន។
នៅថ្ងៃទី១០ ខែមីនានេះ រថយន្ត និងម៉ូតូជាច្រើនគ្រឿងត្រូវបានឃើញតម្រង់ជួរយ៉ាងវែងនៅតាមស្ថានីយប្រេងឥន្ធនៈនានាក្នុងរដ្ឋធានីហាណូយ។ យោងតាមសេចក្តីថ្លែងការណ៍ ក្រសួងក៏បានអំពាវនាវដល់បណ្តាអាជីវកម្ម និងបុគ្គលកុំឱ្យស្តុកទុក ឬធ្វើអាជីកម្មបន្តលើប្រេងឥន្ធនៈ។
នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានទូរស័ព្ទទៅកាន់សមភាគីរបស់លោកនៅប្រទេសគុយវ៉ែត កាតា និងអារ៉ាប់រួម កាលពីថ្ងៃទី៩ ខែមីនា កន្លងទៅ ដើម្បីធានាការផ្គត់ផ្គង់ប្រេងឥន្ធនៈ និងប្រេងឆៅ។ នៅក្នុងថ្ងៃជាមួយគ្នានោះដែរ ប្រទេសវៀតណាមបានសម្រេចចិត្តលុបចោលពន្ធនាំចូលលើប្រេងឥន្ធនៈ ដែលមានប្រសិទ្ធភាពរហូតដល់ចុងខែមេសា ឆ្នាំ២០២៦៕
ចែករំលែកព័តមាននេះ