រដ្ឋមន្រ្តីក្រសួងរ៉ែ និងថាមពល ៖ កម្ពុជាមានអគ្គិសនីប្រើប្រាស់គ្រប់គ្រាន់ សូមកុំភ័យ
រាជធានីភ្នំពេញ ៖ ឯកឧត្តម កែវ រតនៈរដ្ឋមន្ត្រីក្រសួងរ៉ែ និង ថាមពល បានគូសបញ្ជាក់ថា បើទោះបីប្រេងឡើងថ្លៃ ធ្យូងថ្ម…
រាជធានីភ្នំពេញ ៖ ឯកឧត្តម កែវ រតនៈរដ្ឋមន្ត្រីក្រសួងរ៉ែ និង ថាមពល បានគូសបញ្ជាក់ថា បើទោះបីប្រេងឡើងថ្លៃ ធ្យូងថ្ម ឡើងថ្លៃបែបណាក៏ដោយ តែថ្លៃភ្លើងមិនឡើងថ្លៃទេ ពោល គឺនៅដដែលមិនបាច់ព្រួយបារម្ភឡើយ ។ អគ្គិសនីមិនខ្វះ ហើយក៏មិនឡើងថ្លៃដែរ សូមឱ្យមានការស្ងប់ចិត្តពីបញ្ហានេះ ។
ថ្លែងបញ្ជាក់របស់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល នៅថ្ងៃទី៨ ខែមីនា ឆ្នាំ២០២៦ថា នាពេលនេះ កម្ពុជាយើងសល់ទឹកក្នុងអាងស្តុកទឹកពី៧០ ទៅ៨០ភាគរយសម្រាប់ប្រើប្រាស់វារីអគ្គិសនី គឺទឹកសល់ពេញអាងមិនខ្វះភ្លើងប្រើប្រាស់សោះឡើយ ។
ដោយឡែក ជុំវិញបញ្ហាប្រេងសាំងវិញដែរ ឯកឧត្តម កែវ រតនៈ បានព្រមានថា ៖ «ចំពោះអ្នកដែលមានមិនមានអាជ្ញាបណ្ណលក់ប្រេងសាំងហាមទិញសាំងទាំងកានៗយកទៅដាក់លក់ ហើយលក់លើសថ្លៃនោះនឹងប្រឈមចាប់តែម្តង ព្រោះថា មិនមានអាជ្ញាបណ្ណត្រឹមត្រូវ ហើយមិនបានគោរពស្តង់ដារសុវត្ថិភាពបានត្រឹមត្រូវ ដែលអាចប្រឈមនឹងការគ្រោះថ្នាក់ ។
ការដែលយកធុងជ័រមកបញ្ច្រកដាក់លក់មុខផ្ទះនឹងប្រឈមចាប់ហើយ ។ សុំកុំធ្វើដូច្នេះ» ។ ជាមួយគ្នានេះ ឯកឧត្ដមរដ្ឋមន្ត្រីក្រសួងរ៉ែ និងថាមពល បានអំពាវនាវឱ្យពលរដ្ឋជួយគ្នា ដើម្បីសន្តិភាពដូចយើងចូលរួមគ្នា ការពារទឹកដី ពេលលំបាកមិនត្រូវឆ្លៀតកេងប្រវ័ញ្ចគ្នាទៅវិញទៅមកទេ ខណៈពេលលំបាក គឺពេលដែលចាប់ដៃគ្នា ដើម្បីឆ្លងគ្រានេះឱ្យផុតដើម្បីយើងស្រួលទាំងអស់គ្នា ដើម្បីជាតិខ្មែរជាកិត្តិយសយើងជួយគ្នា មិនមែនឆ្លៀតឱកាសធ្វើវិច្ឆេទកម្មសេដ្ឋកិច្ចទេ ហើយរាជរដ្ឋាភិបាលនឹងគាំទ្រដល់ក្រុមហ៊ុនធ្វើការត្រឹមត្រូវ និងដាក់វិន័យចំពោះអ្នកធ្វើការមិនត្រឹមត្រូវ។
ឯកឧត្ដមរដ្ឋមន្ដ្រីបានលើកឡើងថា ក្នុងសប្តាហ៍ខាងមុខនេះ ក្រសួងនឹងចេញវិធានការបន្តបន្ទាប់រឿងថ្លៃ រឿងបញ្ហាផ្គត់ផ្គង់ ហើយនិងការចែកចាយរបស់ក្រុមហ៊ុន ។
ឯកឧត្តម រដ្ឋមន្ដ្រីក៏បានព្រមានដែរចំពោះស្ថានីយប្រេងឥន្ធនៈដែលចែកចាយបន្តគ្នាពីស្ថានីយប្រេងឥន្ធនៈមួយទៅស្ថានីយប្រេងឥន្ធនៈទៀត ក្នុងពេលដែលរាជរដ្ឋាភិបាលបានកំណត់ថ្លែហើយប្រេងចាស់តម្លៃដូចម្តេច ហើយប្រេងនាំចូលថ្មីតម្លៃយ៉ាងណាត្រូវលក់ទៅតាមទីផ្សារ ។
ដោយឡែកចំពោះស្ថានីយប្រេងឥន្ធនៈណាដែលឆ្លៀតឱកាសផ្ទុកប្រេងសាំងទុកដ៏ច្រើន ហើយបិទទ្វារមិនលក់ ដើម្បីទុកតម្លើងថ្លៃនោះក៏ប្រឈមនឹងត្រូវបិទសិទ្ធិលែងឱ្យលក់មួយជីវិតដូចគ្នាផងដែរ៕
ចែករំលែកព័តមាននេះ