ប្រទេសវៀតណាម ៖ នាយកដ្ឋាននគរបាលបង្ការ និងសង្គ្រោះអគ្គីភ័យនៃទីក្រុងហូជីមិញ បានព្រមានអំពីហានិភ័យនៃអគ្គីភ័យសន្ធោរសន្ធៅ ការស្លាប់ និងការខូចខាតទ្រព្យសម្បត្តិ នៅពេលប្រជាជនទិញប្រេងសាំង ឬម៉ាស៊ូត រក្សាទុកនៅក្នុងផ្ទះ…
ប្រទេសវៀតណាម ៖ នាយកដ្ឋាននគរបាលបង្ការ និងសង្គ្រោះអគ្គីភ័យនៃទីក្រុងហូជីមិញ បានព្រមានអំពីហានិភ័យនៃអគ្គីភ័យសន្ធោរសន្ធៅ ការស្លាប់ និងការខូចខាតទ្រព្យសម្បត្តិ នៅពេលប្រជាជនទិញប្រេងសាំង ឬម៉ាស៊ូត រក្សាទុកនៅក្នុងផ្ទះ ពិសេសអំឡុងពេលតម្លៃកើនឡើង ដោយសារតែសង្គ្រាមមជ្ឈិមបូព៌ារវាងសហរដ្ឋអាមេរិក អ៊ីស្រាអែល និងអ៊ីរ៉ង់ ដែលប៉ះពាល់ដល់ការផ្គត់ផ្គង់សកល។ នេះបើយោងតាមប្រភពពីសារព័ត៌មានវៀតណាម Znews ចេញផ្សាយកាលពីថ្ងៃទី៧ ខែមីនា ឆ្នាំ២០២៦។
នាយកដ្ឋានបានប្រកាសថា សាំង និងប្រេង សារធាតុរាវងាយឆាបឆេះ និងផ្ទុះខ្លាំង ដូច្នេះសូម្បីតែការធ្វេសប្រហែសតូចមួយ ដូចជា ការលេចធ្លាយ ការប៉ះទង្គិចខ្លាំង ឬប៉ះជាមួយកំដៅ ឬផ្កាភ្លើងអគ្គិសនី អាចបង្កជាអគ្គីភ័យសន្ធោរសន្ធៅ ដែលគំរាមកំហែងដោយផ្ទាល់ដល់អាយុជីវិត និងទ្រព្យសម្បត្តិផ្ទាល់ខ្លួន និងអ្នកជិតខាង។
យោងតាមអាជ្ញាធរ ថ្មីៗនេះមានស្ថានភាពមួយដែលប្រជាជនមួយចំនួននៅតែសម្រុកទិញសាំងច្រកដាក់ក្នុងដប ពីដុង កំប៉ុង ឬធុងធំៗ ដើម្បីយកទៅផ្ទះ ដើម្បីរក្សាទុក ឬលក់បន្ត។ អាជ្ញាធរបានព្រមានថា សកម្មភាពបែបនេះ បង្កហានិភ័យខ្ពស់អគ្គីភ័យ និងការផ្ទុះ ជាពិសេសក្នុងតំបន់លំនៅដ្ឋាន ផ្ទះមានកូនតូចៗ ឬកន្លែងមានសកម្មភាពរស់នៅ និងធ្វើអាជីវកម្មរួមបញ្ចូលគ្នា។ ដូច្នេះ នាយកដ្ឋាននគរបាលបង្ការ និងសង្គ្រោះអគ្គីភ័យនៃទីក្រុងហូជីមិញ បានណែនាំថា ប្រជាជនគួរតែទិញសាំង និងប្រេងម៉ាស៊ូតគ្រប់គ្រាន់សម្រាប់តម្រូវការផ្ទាល់ខ្លួន ហើយមិនត្រូវរក្សាទុកបរិមាណច្រើននៅក្នុងផ្ទះនោះទេ។
សាំង និងប្រេងម៉ាស៊ូតមិនគួររក្សាទុកក្នុងតំបន់មនុស្សរស់នៅ នៅជាន់ផ្ទាល់ដី ក្នុងបន្ទប់ក្រោមដី ឬនៅជិតផ្លូវសុវត្ថិភាពរត់គេចខ្លួនពីគ្រោះថ្នាក់យថាហេតុនោះទេ។ នៅក្នុងករណីតម្រូវរក្សាទុកចាំបាច់ ប្រេងសាំង និងប្រេងម៉ាស៊ូតគួរតែរក្សាទុកនៅកន្លែងដាច់ដោយឡែកមួយ មានខ្យល់ចេញចូលល្អ ឆ្ងាយពីពន្លឺព្រះអាទិត្យដោយផ្ទាល់ ទីតាំងមានកំដៅ និងឧបករណ៍អគ្គិសនី។ ហាមដាច់ខាតផ្ទេរប្រេងសាំង ឬប្រេងម៉ាស៊ូតចូលក្នុងដបប្លាស្ទិក កំប៉ុង ឬធុងផ្សេងទៀតដែលគ្មានសុវត្ថិភាព។ សម្រាប់កុមារ មិនគួរត្រូវបានអនុញ្ញាតឱ្យនៅជិតទីតាំងមានប្រេងសាំង ឬប្រេងម៉ាស៊ូតឡើយ។ នៅពេលប្រើចង្ក្រានប្រេង ឬប្រេងកាត អ្នកត្រូវតែធានាការប្រើប្រាស់ត្រឹមត្រូវ។
នាយកដ្ឋានកត់សម្គាល់ឃើញថា នៅពេលដែលសាំង ឬប្រេងឆេះ ភ្លើងរាលដាលយ៉ាងលឿន បង្កើតផ្សែងពុលច្រើន បណ្តាលឱ្យថប់ដង្ហើម និងធ្វើឱ្យការរត់គេចខ្លួនពិបាកខ្លាំងណាស់។ ក្នុងស្ថានភាពនេះ អ្នកមិនគួរប្រើទឹកដើម្បីពន្លត់ភ្លើងសាំង ឬប្រេងទេ ព្រោះវាអាចបណ្តាលឱ្យភ្លើងឆាបឆេះរាលដាលថែមទៀត។
នៅពេលមានអគ្គីភ័យកើតឡើង អ្នកត្រូវតែស្រែកប្រាប់ភ្លាមៗ ដើម្បីព្រមានអ្នករស់នៅជុំវិញខ្លួន ហើយទូរស័ព្ទទៅអាជ្ញាធរជាបន្ទាន់ ដើម្បីរាយការណ៍ពីអគ្គីភ័យ។ ខណៈពេលកំពុងរង់ចាំអាជ្ញាធរមកដល់ ប្រសិនបើអគ្គីភ័យទើបតែចាប់ផ្តើម ហើយអាចគ្រប់គ្រងបាន អ្នកអាចប្រើបំពងពន្លត់អគ្គីភ័យ ឬខ្សាច់ដែលនៅជិតនោះ៕
ចែករំលែកព័តមាននេះ