ខេត្តកំពង់ស្ពឺ៖ បុរសជាកូនម្នាក់ត្រូវបានកម្លាំងមូលដ្ឋានកងរាជអាវុធហត្ថស្រុកគងពិសីធ្វើការឃាត់ខ្លួន ខណៈដែលគំរាមសម្លាប់ម្ដាយនិងបំផ្លិចបំផ្លាញទ្រព្យសម្បត្តិនៅក្នុងផ្ទះដោយទ្រាំនូវទង្វើរបស់កូនលែងបានសម្រេចដាក់ពាក្យបណ្ដឹង។
ការឃាត់ខ្លួនកូនគំរាមសម្លាប់ម្ដាយនិងបំភ្លេចបំផ្លាញទ្រព្យសម្បត្តិក្នុងផ្ទះបានកាលពីវេលាម៉ោង១០និង៤០នាទីយប់ ថ្ងៃទី៥ ខែមីនា ឆ្នាំ២០២៦ នៅចំណុចក្នុងភូមិបាំងណា ឃុំជង្រុក ស្រុកគងពិសី ខេត្តកំពង់ស្ពឺ។
មន្ត្រីកងរាជអាវុធហត្ថស្រុកគងពិសីបាននិយាយដឹងថា ក្រោយពីបានទទួលពាក្យបណ្ដឹងតាមទូរស័ព្ទរបស់ម្ដាយបុរសត្រូវឃាត់ខ្លួនខាងលើរួចមកកម្លាំងមូលដ្ឋានកងរាជអាវុធហត្ថស្រុកគងពិសី ដែលដឹកដោយលោក វរសេនីយ៍ត្រី ទុំ សារិទ្ធ មេបញ្ជាការមូលដ្ឋានស្រុកគងពិសី បានចុះទៅដល់ទីតាំងកន្លែងកើតហេតុភ្លាមៗ ហើយបានធ្វើការឃាត់ខ្លួនជនសង្ស័យម្នាក់មានឈ្មោះ ម៉ី ណាឃីម ភេទប្រុស អាយុ៣០ឆ្នាំ មុខរបរមិនពិតប្រាកដ រស់នៅក្នុងភូមិបាំងណា ឃុំជង្រុក ស្រុកគងពិសី ខេត្តកំពង់ស្ពឺ។
មន្ត្រីអាវុធហត្ថស្រុកគងពិសីបានបន្តថាបើយោងតាមការរៀបរាប់របស់ម្ដាយជនសង្ស័យឈ្មោះ ម៉ី ណាឃីម ភេទប្រុស អាយុ៣០ឆ្នាំ មុខរបរមិនពិតប្រាកដ រស់នៅជាមួយឪពុកម្ដាយ មានទីនៅបច្ចុប្បន្នភូមិ កើតហេតុខាងលើ ជនសង្ស័យខាងលើតែងតែគំរាមសម្លាប់ និងតែងតែបំផ្លិចបំផ្លាញទ្រព្យសម្បតិ្តក្នុងផ្ទះបណ្ដាយរងការខូចខាត។ ដោយទ្រាំនូវទង្វើរបស់កូនប្រុសលែងបានម្ដាយក៏ដាច់ចិត្តដាក់ពាក្យប្ដឹងឲ្យសមត្ថកិច្ចធ្វើការឃាត់ខ្លួនយកទៅអប់រំនិងកសាងសំណុំរឿងចាត់ការតាមផ្លូវច្បាប់។
មន្ត្រីកងរាជអាវុធហត្ថស្រុកគងពិសីបានបញ្ជាក់ថាក្រោយឃាត់ខ្លួនជនសង្ស័យខាងលើដកហូតវត្ថុតាងរួមមាន÷ ពូថៅចំនួន០១ និងឧបករណ៍ជក់គ្រឿងញៀនមួយចំនួនផងដែរ។
ក្រោយឃាត់ខ្លួនជនសង្ស័យ រួមជាមួយនឹងវត្ថុតាងត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ