ខេត្តកំពង់ឆ្នាំង ៖ វត្តចន្ទប្បជោតនារាម ហៅវត្តតាសុត ដែលការដើមឡើយគឺ ទីអាស្រម របស់ពុទ្ធបរិស័ទ ក្រោយមកបានក្លាយជាទីអារាម និងបន្តប្រែក្លាយជា តំបន់ទេសចរណ៍…
ខេត្តកំពង់ឆ្នាំង ៖ វត្តចន្ទប្បជោតនារាម ហៅវត្តតាសុត ដែលការដើមឡើយគឺ ទីអាស្រម របស់ពុទ្ធបរិស័ទ ក្រោយមកបានក្លាយជាទីអារាម និងបន្តប្រែក្លាយជា តំបន់ទេសចរណ៍ យ៉ាងទាក់ទាញ សម្រាប់ ប្រជាពលរដ្ឋមកពីគ្រប់មជ្ឈដ្ឋានយ៉ាងច្រើនកុះករ នាំគ្នាមកទស្សនាកម្សាន្ត រមណីដ្ឋានទេសចរណ៍បែបសាសនា មួយនេះ។ អារាមដ៏ប្រណិតភាពនេះ ស្ថិតក្នុងភូមិប៉ាតឡាង ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
ប្រជាពរដ្ឋ ដែលមកលេងកម្សាន្តនៅទីនេះមានចំណាប់អារម្មណ៍ថា ដោយសារភាពស្រស់ស្អាតនៃសោភ័ណភាព ចាប់ពីចំណុចផ្លូវចូល និងផ្នែកខាងក្នុងបរិវេណ និងទីតាំងជាច្រើន រំលេចនូវរចនាបទបែបខ្មែរ គួរអោយទាក់ទាញមែនមែន ធ្វើអោយមានអារម្មណ៍ជ្រះថ្លា ស្រស់ស្រាយ នៅពេលដែលបានមកលេងម្តងៗមិនចង់វិលត្រឡប់ទៅវិញឡើយដូចបានមកលេងឋានសួគ៌ ព្រោះថាមានតាំងពីកន្លែងសក្ការៈបូជាយ៉ាងច្រើនសំបូរបែប ទេសភាពធម្មជាតិ ជាពិសេសសមិទ្ធិផលថ្មីរូងនាគរាជ កាន់តែពិសិដ្ឋ។ ជាក់ស្តែងនៅ វត្តចន្ទប្បជោត្តនារាម ដែលព្រះធម្មវនវាសី ចន្ទ មុនី ជាព្រះចៅអធិការគង់នៅនេះ គឺមានប្រជាពលរដ្ឋពុទ្ធបរិស័ទយ៉ាងច្រើនកុះករ បានមកគោរពប្រតិបត្តិជារៀងរាល់ថ្ងៃ ដោយថា គាត់ ទទួលបាននូវភាពជ្រះថ្លា មានសុខភាពល្អផ្លូវចិត្ត កាត់បន្ថយរោគស្ត្រេស យល់ដឹងពីបាប និងបុណ្យកាន់តែប្រសើរ។
លោក សេង វិចិត្រ អភិបាលស្រុករលាប្អៀរបញ្ជាក់ថា វត្តចន្ទប្បជោត្តនារាម ហៅវត្តតាសុត ដែលស្ថិតនៅភូមិប៉ាតឡាង ឃុំក្រាំងលាវ គឺជាផ្នែកមួយក្នុងការលើកកម្ពស់វិស័យពុទ្ធសាសនា និងជាការួមចំណែកប្រែក្លាយតំបន់នេះ ឲ្យទៅជាតំបន់វប្បធម៌ សាសនា និងទេសចរណ៍ នាពេលដ៏ខ្លីខាងមុខ ដែលពលរដ្ឋកម្ពុជាមិនថាតិចឬច្រើន នឹងទទួលបានជាប្រយោជន៍គ្រប់ៗគ្នា តាមរយៈការគេយកលុយមកចាយនៅស្រុកខ្មែរយើង ដែលនឹងធ្វើឲ្យពលរដ្ឋយើងមានការងារធ្វើ មានមុខរបប ធ្វើឲ្យជីវភាពពលរដ្ឋយើងកាន់តែប្រសើរឡើង ។ ម្យ៉ាងទៀតចន្ទប្បជោត្តនារាម ហៅវត្តតាសុត ជាវត្តទេសចរណ៍ វប្បធម៌ និងសាសនាគំរូ នៅក្នុងខេត្តកំពង់ឆ្នាំង អនាគត មិនត្រឹមតែបម្រើឲ្យវិស័យសាសនា វប្បធម៌នោះទេ ប៉ុន្តែជាទីកន្លែងមួយដ៏ទាក់ទាញសម្រាប់ទេសចរក្នុងស្រុក និងទេសចរអន្តរជាតិបែបសាសនា ដ៏ល្អនៅក្នុងតំបន់ និងពិភពលោក។
លោកអភិបាលស្រុករលាប្អៀរ បន្ថែមថា ទីតាំងនេះយើងអាចហៅបានថាជាទេសចរណ៍បែបសាសនា ដែលមានបណ្ឌិតចន្ទមុន្នី ជាចៅអធិការ បានយកចិត្តទុកដាក់រៀបចំបានស្អាតទៅលើបរិស្ថាន ក៏ដូចជាសោភ័ណភាពផ្សេងៗ ជារចនាបទបែបខ្មែរ ជាមួយគ្នានេះក្នុងនាមអាជ្ញាធរខេត្តក៏ដូចជាស្រុក បានចូលរួមសហការកម្លាំងប្រជាការពារ ប៉ុស្តិ៍នគរបាលឃុំ កម្លាំងគណៈបញ្ជាការឯកភាពខេត្ត ចូលរួសម្រួលទៅលើចរាចរណ៍ និងការងារសន្តិសុខសណ្ដាប់ធ្នាប់ផ្សេងៗ លើសពីនេះគឺយើងបានរៀបចំនូវការសម្អាតអនាម័យបរិស្ថាន នៅតាមដងផ្លូវនិងនៅក្នុងបរិវេណ បានយ៉ាងល្អប្រសើរ។
ជាការសំណូមពរគឺ នៅពេលដែលបងប្អូនអញ្ជើញមកលេងពីអារាមយើងនេះសូមមេត្តាជួយ សម្រួលតាមការណែនាំរបស់ អាជ្ញាធរជាពិសេសគឺសមត្ថកិច្ចដែលសម្រួលចរាចរណ៍ និងចូលរួមជួយសម្អាតអនាម័យបរិស្ថានទាំងអស់គ្នា៕
ចែករំលែកព័តមាននេះ