ទីក្រុងតេអេរ៉ង់៖ លោកដូណាល់ត្រាំថ្លែងថាលោកកំពុងរៀបចំផែនការជ្រើសរើសអនាគតមេដឹកនាំអ៊ីរ៉ង់ដោយផ្ទាល់ដៃ។ លោកដាក់ចេញផែនការនេះក្រោយការស្លាប់របស់អតីតមេដឹកនាំកំពូលអ៊ីរ៉ង់ លោកអាយ៉ាតូឡា អាលី ខាមេនីកាលពីថ្ងៃសៅរ៍។ នេះបើយោងតាមបាទសម្ភាសជាមួយគេហទំព័រអាក់សឺស (Axios)។ អ្នកខ្លះសម្លឹងឃើញកូនប្រុសរបស់លោកអាយ៉ាតូឡា អាលី…
ទីក្រុងតេអេរ៉ង់៖ លោកដូណាល់ត្រាំថ្លែងថាលោកកំពុងរៀបចំផែនការជ្រើសរើសអនាគតមេដឹកនាំអ៊ីរ៉ង់ដោយផ្ទាល់ដៃ។ លោកដាក់ចេញផែនការនេះក្រោយការស្លាប់របស់អតីតមេដឹកនាំកំពូលអ៊ីរ៉ង់ លោកអាយ៉ាតូឡា អាលី ខាមេនីកាលពីថ្ងៃសៅរ៍។ នេះបើយោងតាមបាទសម្ភាសជាមួយគេហទំព័រអាក់សឺស (Axios)។ អ្នកខ្លះសម្លឹងឃើញកូនប្រុសរបស់លោកអាយ៉ាតូឡា អាលី ខាមេនី ឈ្មោះមុជតាបា ខាមេនី (Mojtaba Khamenei) អាចក្លាយជាអ្នកស្នងតំណែងបន្តពីឪពុក។ ប៉ុន្តែលោកត្រាំជំទាស់នឹងគំនិតនេះ។ លោកថាលោកមុជតាបាមិនស័ក្ដិសមនឹងតំណែងនេះទេ។ លោកមិនទទួលយកជាដាច់ខាត។
លោកត្រាំនិយាយប្រៀបធៀបព្រឹត្តិការណ៍នៅអ៊ីរ៉ង់ទៅនឹងវេណេហ្ស៊ូអេឡា។ លោកថាលោកជាអ្នកសម្រេចដោយផ្ទាល់ក្នុងការជ្រើសរើសថ្នាក់ដឹកនាំនៅវេណេហ្ស៊ូអេឡា ហើយលោកក៏ចង់អនុវត្តវិធីនេះនៅអ៊ីរ៉ង់ផងដែរ។ លោកត្រាំប្រកាសត្រង់ៗថាលោកចង់បានមេដឹកនាំអ៊ីរ៉ង់ដែលមិនប្រឆាំងនឹងវ៉ាស៊ីនតោន។ លោកថាលោកចង់បានអនាគតមេដឹកនាំអ៊ីរ៉ង់ដែលនាំមកនូវសុខដុមនីយកម្ម និងសន្តិភាពជាមួយគ្នា។ បើអ៊ីរ៉ង់នៅតែប្រកាន់ជំហរដូចសព្វថ្ងៃនេះទៀត នៅមិនសុខនឹងគ្នាទេ សង្គ្រាមនឹងផ្ទុះឡើងទៀត។
មន្ត្រីរដ្ឋាភិបាលអាមេរិកអះអាងថាប្រតិបត្តិការសឹករបស់អាមេរិកនៅអ៊ីរ៉ង់លើកនេះគោលដៅធំគឺទប់ស្កាត់មិនឱ្យអ៊ីរ៉ង់មានអាវុធនុយក្លេអ៊ែរ, មីស៊ីលអន្តរទ្វីប និងកម្ចាត់ទ័ពជើងទឹករបស់ប្រទេសនេះឱ្យអស់។ ពោលគឺមិនមែនជាការផ្លាស់ប្ដូររបបដឹកនាំនៅអ៊ីរ៉ង់ទេ។ នៅពេលអ្នកសារព័ត៌មានសួរថាតើលោកសម្លឹងឃើញនរណាហើយឬនៅដើម្បីឡើងមកដឹកនាំប្រទេសអ៊ីរ៉ង់? លោកត្រាំឆ្លើយតបថាអ្នកដែលលោកសម្លឹងឃើញថាអាចនឹងក្លាយជាអនាគតមេដឹកនាំអ៊ីរ៉ង់នោះឥឡូវនេះពួកគេស្លាប់អស់ហើយ។
រហូតមកដល់ពេលនេះ មជ្ឈដ្ឋានទូទៅមិនទាន់ដឹងច្បាស់នៅឡើយទេថាតើនរណានឹងក្លាយជាមេដឹកនាំថ្មីរបស់អ៊ីរ៉ង់។ ប៉ុន្តែគេសម្លឹងឃើញលោកមុជចាបា ខាមេនី (កូនប្រុសលោកអាលីខាមេនី) អាចជាបេក្ខជនដ៏មានសក្ដានុពលម្នាក់។ អ្នកដែលមានសិទ្ធិសម្រេចនៅក្នុងជ្រើសរើសមេដឹកនាំកំពូលអ៊ីរ៉ង់គឺក្រុមប្រឹក្សារដ្ឋមានសមាជិក៨៨នាក់។ អ្នកខ្លះយល់ថាតំណែងនេះអាចបានទៅលើលោកហាសាន ខូមេនី (Hassan Khomeini) ដែលជាចៅប្រុសរបស់មេដឹកនាំបដិវត្តអ៊ីរ៉ង់ទី១ លោកអាយ៉ាតូឡា រ៉ូប៊ូឡា ខូមេនី (Ayatollah Ruhollah Khomeini) និងអាចារ្យជាន់ខ្ពស់ម្នាក់ទៀតឈ្មោះអាយ៉ាតូឡា អាលីរេហ្សា អារ៉ាហ្វ៊ី (Ayatollah Alireza Arafi)។
សព្វថ្ងៃនេះ នៅក្នុងក្រុមប្រឹក្សារដ្ឋសម្រាប់ដឹកនាំប្រទេសអ៊ីរ៉ង់ជាបណ្ដោះអាសន្នក៏មានលោកអារ៉ាហ្វ៊ី, ម៉ាស៊ូត ប៉េហ្សេស្គាន (ប្រធានាធិបតី) និងរដ្ឋមន្ត្រីយុត្តិធម៌ លោកហ្គោឡាម ហ៊ូសេន ម៉ូសេនី អេជេ (Gholam-Hossein Mohseni-Ejei) ផងដែរ។ តើលោកមុជចាបា ខាមេនី ជានរណា? លោកមុជចាបាសព្វថ្ងៃនេះមានអាយុ៥៦ឆ្នាំ ត្រូវគេចាត់ទុកថាជាអ្នកស្នងតំណែងបន្តពីឪពុក។ លោកកើតនៅឆ្នាំ១៩៦៩នៅទីក្រុងម៉ាស់ហាត (Mashhad)។ ចម្រើនវ័យបានដប់ឆ្នាំ បដិវត្តឥស្លាមក៏ផ្ទុះឡើងនៅឆ្នាំ១៩៧៩ដើម្បីផ្ដួលរំលំស្ដេចសាពីរាជបល្ល័ង្គ។
ក្រោយមក គ្រួសាររបស់លោកផ្លាស់ទៅនៅរដ្ឋធានីតេអេរ៉ង់ចំពេលដែលសង្គ្រាមអ៊ីរ៉ាក់ និងអ៊ីរ៉ង់កំពុងផ្ទុះពេញទំហឹង។ លោកក្លាយជាមនុស្សដ៏មានឥទ្ធិពលម្នាក់នៅពេលឪពុករបស់លោក (អាលី ខាមេនី) ឡើងកាន់អំណាចបន្តពីរ៉ូប៊ូឡា ខូមេនីនៅឆ្នាំ១៩៨៩។ យោងតាមឯកសារសម្ងាត់របស់អាមេរិកដែលបែកធ្លាយតាមវីឃីលីក (WikiLeaks) អាមេរិកចាត់ទុកកូនប្រុសរូបនេះជា «អំណាចនៅពីក្រោយវាំងនន» និងត្រូវរបបដឹកនាំអ៊ីរ៉ង់សម្លឹងឃើញថាជាមេដឹកនាំដែលមានសមត្ថភាពប្រកបដោយថាមពលខ្លាំងក្លា។ ទៅថ្ងៃមុខ បើគាត់មិនបានកាន់អំណាចកំពូលទេ យ៉ាងហោចណាស់គាត់ក៏អាចក្លាយជាមនុស្សសំខាន់នៅក្នុងជួរថ្នាក់ដឹកនាំផងដែរ៕ ប្រភព៖ ញូស្វីក និងប្រភពដទៃទៀត
ចែករំលែកព័តមាននេះ