ទីក្រុងបាគូ ៖ ប្រទេសអាស៊ែបៃហ្សង់ប្រកាសនឹងសងសឹកប្រឆាំងនឹងអ្វីដែលខ្លួនហៅថា «អំពើភេរវកម្ម» ដោយបានចោទប្រកាន់ថាធ្វើឡើងដោយអ៊ីរ៉ង់ បន្ទាប់ពីដ្រូន២គ្រឿងរបស់ប្រទេសនេះ បានវាយប្រហារអាកាសយានដ្ឋាន និងបុកអគារសាលារៀនមួយក្នុងតំបន់ Nakhchivan របស់អាស៊ែបៃហ្សង់…
ទីក្រុងបាគូ ៖ ប្រទេសអាស៊ែបៃហ្សង់ប្រកាសនឹងសងសឹកប្រឆាំងនឹងអ្វីដែលខ្លួនហៅថា «អំពើភេរវកម្ម» ដោយបានចោទប្រកាន់ថាធ្វើឡើងដោយអ៊ីរ៉ង់ បន្ទាប់ពីដ្រូន២គ្រឿងរបស់ប្រទេសនេះ បានវាយប្រហារអាកាសយានដ្ឋាន និងបុកអគារសាលារៀនមួយក្នុងតំបន់ Nakhchivan របស់អាស៊ែបៃហ្សង់ នៅតាមព្រំដែនជាមួយអ៊ីរ៉ង់ បង្កឱ្យជនស៊ីវិល ៤ នាក់រងរបួស កាលពីថ្ងៃទី៥ ខែមីនា ឆ្នាំ២០២៦។
ទោះយ៉ាងណាក៏ដោយ ទីក្រុងតេហេរ៉ង់បានបដិសេធការជាប់ពាក់ព័ន្ធនឹងការវាយប្រហារនេះ។ នេះបើតាមប្រភពពីសារព័ត៌មាន Reuters, France24 និង Euronews បានចេញផ្សាយ។
ប្រធានាធិបតីអាស៊ែបៃហ្សង់ លោក អ៊ីលហាំ អាលីយ៉ូវ (Ilham Aliyev) បានប្រាប់កិច្ចប្រជុំក្រុមប្រឹក្សាសន្តិសុខថា «ថ្ងៃនេះ អំពើភេរវកម្មមួយត្រូវបានអនុវត្តពីភាគីអ៊ីរ៉ង់ប្រឆាំងនឹងទឹកដីអាស៊ែបៃហ្សង់»។ លោកបានបន្ថែមថា «យោធាអាស៊ែបៃហ្សង់ត្រូវបានណែនាំឱ្យរៀបចំ និងអនុវត្តវិធានការសងសឹក ព្រមទាំងដាក់ការចល័តកងកម្លាំងនៅកម្រិតលេខ ១ ហើយត្រូវតែត្រៀមខ្លួន ដើម្បីធ្វើប្រតិបត្តិការណាមួយភា្លមៗ»។
ក្រសួងការពារជាតិអាស៊ែបៃហ្សង់បានបញ្ជាក់ថា ការវាយប្រហារនេះ នឹងមិនអាចគ្មានចម្លើយនោះទេ។ ដោយបន្ថែមថា ខ្លួនកំពុងស៊ើបអង្កេតប្រភេទដ្រូនដែលប្រើក្នុងការវាយប្រហារ និងរៀបចំវិធានការឆ្លើយតបចាំបាច់ ដើម្បីការពារបូរណភាពទឹកដី អធិបតេយ្យភាពជាតិ និងធានាសុវត្ថិភាពរបស់ជនស៊ីវិល និងហេដ្ឋារចនាសម្ព័ន្ធជនស៊ីវិល។
ជុំវិញការចោទប្រកាន់នេះ អនុរដ្ឋមន្ត្រីការបរទេសអ៊ីរ៉ង់ លោក កាហ្សេម ហ្គារីបាបាឌី (Kazem Gharibabadi) បានបដិសេធថា អ៊ីរ៉ង់មិនបានកំណត់គោលដៅទៅលើតំបន់ Nakhchivan នោះទេ។ ដោយលោកបានប្រាប់សារព័ត៌មានអាស៊ែបៃហ្សង់ AnewZ ថា អ៊ីរ៉ង់មិនវាយប្រហារប្រទេសជិតខាងខ្លួននោះទេ។
ដោយឡែក រដ្ឋមន្ត្រីការបរទេសអ៊ីរ៉ង់ លោក អាបាស អារ៉ាជី (Abbas Araghchi) បានចោទប្រកាន់អ៊ីស្រាអែលថាបានបើកការវាយប្រហារ ដើម្បីបំផ្លាញទំនាក់ទំនងរបស់អ៊ីរ៉ង់ជាមួយប្រទេសជិតខាងភាគខាងជើងរបស់ខ្លួន។
ក្រោយការហៅទូរស័ព្ទរវាងរដ្ឋមន្ត្រីការបរទេសអាស៊ែបៃហ្សង់ និងអ៊ីរ៉ង់នោះ ក្រសួងការបរទេសអាស៊ែបៃហ្សង់បានទាមទារឱ្យអ៊ីរ៉ង់បញ្ជាក់បញ្ហានេះក្នុងរយៈពេលដ៏ខ្លីបំផុត ផ្តល់ការពន្យល់ និងចាត់វិធានការបន្ទាន់ចាំបាច់ដើម្បីការពារឧប្បត្តិហេតុបែបនេះមិនឱ្យកើតឡើងវិញនាពេលអនាគត ដោយបន្ថែមថា ឧប្បត្តិហេតុនេះ រួមចំណែកដល់ភាពតានតឹងកើនឡើងនៅក្នុងតំបន់៕
ចែករំលែកព័តមាននេះ