ខេត្តមណ្ឌលគិរី ៖ ក្នុងគោលដៅជំរុញយុទ្ធសាស្ត្រចក្រាវិស័យបរិស្ថាន និងការប្រែប្រួលអាកាសធាតុ ពិសេសការបង្កើនគម្របព្រៃឈើឱ្យបាន ៦០% នៅឆ្នាំ២០៥០ នាព្រឹកថ្ងៃទី២៧-២៨ ខែកុម្ភៈ ឆ្នាំ២០២៦…
ខេត្តមណ្ឌលគិរី ៖ ក្នុងគោលដៅជំរុញយុទ្ធសាស្ត្រចក្រាវិស័យបរិស្ថាន និងការប្រែប្រួលអាកាសធាតុ ពិសេសការបង្កើនគម្របព្រៃឈើឱ្យបាន ៦០% នៅឆ្នាំ២០៥០ នាព្រឹកថ្ងៃទី២៧-២៨ ខែកុម្ភៈ ឆ្នាំ២០២៦ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដឹកនាំគណៈប្រតិភូជាន់ខ្ពស់ អមដំណើរដោយឯកឧត្តម ថង សាវុន អភិបាលខេត្តមណ្ឌលគិរី ចុះបំពេញបេសកកម្មការងារសំខាន់ៗក្នុងភូមិសាស្ត្រខេត្តមណ្ឌលគិរី។
ឯកឧត្តមរដ្ឋមន្ត្រី និងគណៈប្រតិភូ បានអញ្ជើញចុះពិនិត្យដោយផ្ទាល់នូវវឌ្ឍនភាពនៃការដាំដុះ និងថែទាំកូនឈើនៅ ថ្នាលបណ្តុះកូនឈើថ្នាក់តំបន់ ក្នុងដែនជម្រកសត្វព្រៃកែវសីមា។ ថ្នាលបណ្តុះកូនឈើដ៏មានសារៈសំខាន់នេះ ត្រូវបានបង្កើតឡើងក្នុងគោលបំណងផ្គត់ផ្គង់កូនឈើគ្រប់ប្រភេទ សម្រាប់ចែកចាយជូនប្រជាពលរដ្ឋយកទៅដាំដុះដោយឥតគិតថ្លៃ និងសម្រាប់យុទ្ធនាការដាំស្តារព្រៃឈើឡើងវិញក្នុងតំបន់ការពារធម្មជាតិ។
ឯកឧត្តមបណ្ឌិត អ៊ាង សុផល្លែត បានសង្កត់ធ្ងន់ថា ការបណ្តុះកូនឈើឱ្យបានច្រើន និងមានគុណភាព គឺជាគ្រឹះដ៏សំខាន់ក្នុងការសម្រេចបាននូវអព្យាក្រឹតកាបូន និងការបង្កើតសោភ័ណភាពបៃតងសម្រាប់កម្ពុជា។ ឯកឧត្តមបានណែនាំឱ្យមន្ត្រីឧទ្យានុរក្ស និងក្រុមការងារបច្ចេកទេស ត្រូវយកចិត្តទុកដាក់ខ្ពស់លើការជ្រើសរើសពូជឈើដែលធន់នឹងអាកាសធាតុ និងមានតម្លៃសេដ្ឋកិច្ចខ្ពស់ ដើម្បីលើកទឹកចិត្តដល់សាធារណជនក្នុងការចូលរួមដាំដុះ។
គណៈប្រតិភូបានបន្តដំណើរទៅកាន់ សិប្បកម្មកែច្នៃឬស្សី “បាមប៊ូសា” (Bambusa) ដើម្បីស្វែងយល់ពីចង្វាក់ផលិតកម្ម និងការកែច្នៃធនធានធម្មជាតិឱ្យទៅជាផលិតផលមានតម្លៃ។ សិប្បកម្មនេះបានបង្ហាញពីសមត្ថភាពខ្ពស់ក្នុងការផលិតសម្ភារៈប្រើប្រាស់ប្រណីតៗជាច្រើនប្រភេទ រួមមាន តុ ទូ កៅអី និងសម្ភារៈតុបតែងលម្អ ដែលមានគុណភាពអាចប្រកួតប្រជែងលើទីផ្សារទាំងក្នុងស្រុក និងនាំចេញទៅបរទេស។
ឯកឧត្តមរដ្ឋមន្ត្រី បានកោតសរសើរចំពោះគំនិតច្នៃប្រឌិត និងការប្រើប្រាស់វត្ថុធាតុដើមក្នុងស្រុក ដែលមិនត្រឹមតែជួយកាត់បន្ថយការប្រើប្រាស់ឈើប្រណីតប៉ុណ្ណោះទេ ប៉ុន្តែថែមទាំងបានបង្កើតការងារជូនប្រជាពលរដ្ឋក្នុងមូលដ្ឋានស្រុកកែវសីមា និងស្រុកកោះញែក ឱ្យមានចំណូលស្ថិរភាព។ ឯកឧត្តមបានចាត់ទុកសិប្បកម្មនេះថាជា “សេដ្ឋកិច្ចបៃតងគំរូ” ដែលផ្សារភ្ជាប់ការអភិរក្សទៅនឹងការអភិវឌ្ឍកម្រិតជីវភាព។
ក្នុងឱកាសនោះដែល ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា អមដំណើរដោយឯកឧត្តម ថង សាវុន អភិបាលខេត្តមណ្ឌលគិរី បានដឹកនាំគណៈប្រតិភូជាច្រើនរូប អញ្ជើញចុះពិនិត្យការដ្ឋានអណ្តូងរ៉ែមាស ក្នុងក្រុមហ៊ុន រ៉ឺនេសង់ មីនើរ៉ល ដែលមានទីតាំងនៅតំបន់អូរខ្វាវ ក្នុងភូមិសាស្ត្រឃុំចុងផ្លាស់ ស្រុកកែវសីមា ខេត្តមណ្ឌលគិរី ៕
ចែករំលែកព័តមាននេះ