ទីក្រុងម៉ូស្គូ៖ ប្រទេសរុស្ស៊ីចាប់ផ្ដើមបញ្ចេញសារនយោបាយពាក់ព័ន្ធនឹងសង្គ្រាមរវាងអ៊ីរ៉ង់ទល់នឹងអាមេរិក និងអ៊ីស្រាអែល។ ថ្ងៃនេះ ក្រសួងការបរទេសរុស្ស៊ីប្រកាសថ្កោលទោសទង្វើរបស់អាមេរិក និងអ៊ីស្រាអែលដែលរុស្ស៊ីចាត់ទុកថាជាអ្នកកេះកៃមុន។ រុស្ស៊ីចោទប្រកាន់ថាប្រទេសទាំង២ប្រព្រឹត្តអំពើឈ្លានពានប្រដាប់អាវុធដោយមានផែនការគិតទុកជាមុន និងដោយឥតមូលហេតុប្រឆាំងនឹងរដ្ឋជាសមាជិករបស់អង្គការសហប្រជាជាតិដែលមានអធិបតេយ្យភាព និងឯករាជ្យភាពពេញលេញ។
ហេតុនេះ រុស្ស៊ីទាមទារឱ្យអាមេរិក និងអ៊ីស្រាអែលបញ្ឈប់ប្រតិបត្តិការសឹកជាបន្ទាន់ និងវិលទៅរកការដោះស្រាយបញ្ហាតាមមធ្យោបាយការទូត។ តាមរយៈសេចក្ដីប្រកាសដែលផ្សព្វផ្សាយនៅលើតេឡេក្រាម ក្រសួងការបរទេសរុស្ស៊ីចោទប្រកាន់ថាអាមេរិក និងអ៊ីស្រាអែលមានរបៀបវារៈសម្ងាត់នៅពីក្រោយការបង្ហាញកង្វល់អំពីកម្មវិធីនុយក្លេអ៊ែរអ៊ីរ៉ង់។ រុស្ស៊ីចង់មានន័យថាគោលដៅធំរបស់ប្រទេសទាំង២គឺផ្ដួលរំលំរបបដឹកនាំនៅអ៊ីរ៉ង់សព្វថ្ងៃនេះ។ ប៉ុន្តែពួកគេធ្វើជាខ្វាយខ្វល់អំពីបញ្ហានុយក្លេអ៊ែរ។
រុស្ស៊ីប្រមើលឃើញថាការវាយប្រហារនេះអាចនឹងនាំឱ្យមានវិបត្តិធ្ងន់ធ្ងរផ្នែកមនុស្សធម៌, សេដ្ឋកិច្ច ហើ់យអាចនឹងធ្វើឱ្យរីកសាយភាយសារធាតុវិទ្យុសកម្មថែមទៀតផងនៅក្នុងតំបន់មជ្ឈិមបូព៌ា។ រុស្ស៊ីនៅតែដាក់កំហុសគ្រប់យ៉ាងទៅលើអាមេរិក និងអ៊ីស្រាអែលជានិច្ច។ រុស្ស៊ីចោទប្រកាន់ថាប្រទេសទាំង២បានរុញច្រានតំបន់មជ្ឈិមបូព៌ាទៅរកជ្រោះមរណៈ។ ពោលគឺជាស្ថានការណ៍ឡើងកម្ដៅខ្លាំងដល់ដំណាក់កាលគ្រប់គ្រងលែងបាន។
រុស្ស៊ីថាការវាយប្រហារទៅលើទីតាំងនុយក្លេអ៊ែររបស់អ៊ីរ៉ង់ដែលស្ថិតក្រោមការការពាររបស់ទីភ្នាក់ងារអាតូមិចអន្តរជាតិ (IAEA) ជាករណីមិនអាចទទួលយកបានទេ។ រុស្ស៊ីថាខ្លួនត្រៀមខ្លួនធ្វើជាអ្នកសម្របសម្រួលដោះស្រាយបញ្ហាដោយសន្តិវិធី។ នៅក្នុងព្រឹត្តិការណ៍មួយទៀត ក្រសួងដឹកជញ្ជូនរុស្ស៊ីថ្លែងថាក្រុមហ៊ុនអាកាសចរណ៍រុស្ស៊ីសម្រេចចិត្តផ្អាកការហោះហើរទៅប្រទេសអ៊ីរ៉ង់ និងអ៊ីស្រាអែល។
ក្រសួងដដែលនេះថ្លែងបន្តទៀតថាដោយយោងទៅលើស្ថានការណ៍បច្ចុប្បន្នដែលដែនអាកាសអ៊ីរ៉ង់ និងអ៊ីស្រាអែលត្រូវបានបិទជិតឈឹង ក្រុមហ៊ុនអាកាសចរណ៍រុស្ស៊ី សហការជាមួយក្រសួងដឹកជញ្ជូន និងអាជ្ញាធរអាកាសចរណ៍ស៊ីវិលរុស្ស៊ីកំពុងសម្លឹងមើលផ្លូវហោះហើរដទៃទៀតដើម្បីជំនួសផ្លូវបច្ចុប្បន្ន។ វិធានការនេះធ្វើឡើងដើម្បីធានាសុវត្ថិភាពក្នុងការហោះហើរទៅកាន់ប្រទេសទាំង២។ រយៈពេលធ្វើដំណើរនឹងវែងជាងមុនដោយសារយន្តហោះត្រូវហោះវាង។
ការសម្រេចបើកផ្លូវវាងនេះបន្ទាប់ពីប្រទេសមួយចំនួននៅមជ្ឈិមបូព៌ាដូចជាបារ៉េន, អ៊ីរ៉ាក់, កាតា និងគុយវែតជាដើមបានប្រកាសបិទដែនអាកាសរបស់ខ្លួន ខណៈដែលអារ៉ាប់រួមក៏ដាក់កំហិតលើការហោះហើរចេញ-ចូលដែនអាកាសរបស់ខ្លួនផងដែរ។ អាជ្ញាធររុស្ស៊ីថ្លែងថាក្រុមហ៊ុនអាកាសចរណ៍បានទទួលការណែនាំឱ្យជ្រើសរើសផ្លូវផ្សេងនៅពេលត្រូវហោះចូលប្រទេសទាំង២ (អ៊ីរ៉ង់ និងអ៊ីស្រាអែល)៕ ប្រភព៖ រ៉យទ័រ (Reuters), អេភី (AP) និងប្រភពដទៃទៀត
ចែករំលែកព័តមាននេះ