ទីក្រុងប៉េកាំង៖ បន្ទាប់ពីអាមេរិកជូនដំណឹងឱ្យបុគ្គលិកស្ថានទូតរបស់ខ្លួនប្រញាប់ចាកចេញពីប្រទេសអ៊ីស្រាអែល ឥឡូវនេះដល់វេនចិន និងអង់គ្លេសក៏ចាប់ផ្ដើមព្រួយបារម្ភអំពីករណីផ្ទុះសង្គ្រាមនៅអ៊ីរ៉ង់ផងដែរ។ ថ្មីៗនេះ ប្រទេសចិនជំរុញឱ្យប្រជាជនរបស់ខ្លួនកុំធ្វើដំណើរទៅប្រទេសអ៊ីរ៉ង់សម្រាប់ពេលនេះ។ ចំណែកប្រជាជនចិនដែលកំពុងស្ថិតប្រទេសអ៊ីរ៉ង់ស្រាប់ទៅហើយនោះសូមប្រញាប់ចាកចេញជាបន្ទាន់កាន់តែឆាប់តាមដែលអាចធ្វើទៅបាន។
ប្រទេសចិនចេញសេចក្ដីអំពាវនាវដូច្នេះដោយយោងទៅលើអ្វីដែលខ្លួនហៅថា «ហានិភ័យផ្នែកសន្តិសុខកម្រិតខ្ពស់» ស្របពេលដែលគេបារម្ភកាន់តែខ្លាំងឡើងៗថាអាមេរិកទំនងជាមិនទុកយូរទេ ទំនងជាត្រៀមវាយអ៊ីរ៉ង់មែនទែនហើយបន្ទាប់ពីប្រទេសទាំង២បិទបញ្ចប់ការចរចាគ្នាលើកទីបីដោយគ្មានទទួលបានលទ្ធផលអ្វីទាំងអស់។ មូលហេតុដែលគេបារម្ភយ៉ាងដូច្នេះព្រោះលោកត្រាំទុកពេលឱ្យអ៊ីរ៉ង់១០-១៥ថ្ងៃត្រូវតែចរចាឱ្យមានកិច្ចព្រមព្រៀង។ ឥឡូវនេះ ចាប់តាំងពីលោកនិយាយរហូតដល់ពេលនេះជិតផុតឱសានវាទទៅហើយ។
នៅក្នុងសេចក្ដីជូនដំណឹងដែលចេញផ្សាយដោយស្ថានទូតចិនប្រចាំទីក្រុងតេអេរ៉ង់ មន្ត្រីរដ្ឋាភិបាលចិនសរសេររៀបរាប់ថាជនជាតិចិន (នៅអ៊ីរ៉ង់) គួរតែចាប់អារម្មណ៍បញ្ហានេះឱ្យបានខ្លាំង ហើយគួរតែត្រៀមខ្លួនចាកចេញតាមជើងយន្តហោះដឹកអ្នកដំណើរ ឬតាមជើងគោកក៏បានដែរដោយមានជំនួយពីស្ថានកុងស៊ុលចិនប្រចាំប្រទេសអ៊ីរ៉ង់ និងប្រទេសនានាដែលនៅជិតខាងអ៊ីរ៉ង់ និងដែលស្ម័គ្រចិត្តជួយសម្របសម្រួលនៅក្នុងរឿងនេះ។
ប្រទេសចិនចេញសេចក្ដីជូនដំណឹងឱ្យពលរដ្ឋខ្លួនប្រុងប្រយ័ត្នទោះបីប្រទេសនេះមានទំនាក់ទំនងជិតស្និទជាមួយអ៊ីរ៉ង់ដល់កម្រិតភាពជាដៃគូយុទ្ធសាស្ត្រយ៉ាងណាក្ដី។ នៅពេលដែលអ៊ីរ៉ង់បន្តជាប់ទណ្ឌកម្មសេដ្ឋកិច្ចដូចសព្វថ្ងៃនេះ ប្រទេសចិនក្លាយជាអ្នកទិញប្រេងឆៅអ៊ីរ៉ង់ច្រើនជាងគេ។ ម៉្យាងទៀត ចិនក៏តែងតែប្រឆាំងជំទាស់ជាដាច់ខាតចំពោះការគំរាមប្រើ ឬការប្រើកម្លាំងយោធា។ ចិនអំពាវនាវឱ្យដោះស្រាយបញ្ហានុយក្លេអ៊ែរអ៊ីរ៉ង់តាមមធ្យោបាយការទូត។
នៅអ៊ីរ៉ង់សព្វថ្ងៃនេះក៏មានអាវុធយុទ្ធភ័ណ្ឌរបស់ចិនមិនតិចនោះទេ។ ប្រទេសចិនបានផ្គត់ផ្គង់គ្រឿងសព្វាវុធទៅឱ្យអ៊ីរ៉ង់យ៉ាងច្រើនសន្ធឹកសន្ធាប់ រួមទាំងផ្គត់ផ្គង់បច្ចេកវិទ្យាឈ្លបយកការណ៍ទៀតផង។ ប៉ុន្តែមិនខុសពីសង្គ្រាមមួយចម្អិនកំពិសរវាងអ៊ីរ៉ង់ទល់នឹងអាមេរិក និងអ៊ីស្រាអែលកាលពីខែមិថុនា ឆ្នាំ២០២៥នោះទេ អ្នកវិភាគយល់ថាប្រទេសចិនប្រហែលជាមិនចូលខ្លួនពាក់ព័ន្ធដោយផ្ទាល់នៅក្នុងសង្គ្រាមនេះទេ (បើសិនអាមេរិកពិតជាវាយប្រហារអ៊ីរ៉ង់ម្ដងទៀត)។
ងាកទៅមើលអង់គ្លេសឯណោះវិញ ចក្រភពអង់គ្លេសក៏បានប្រកាសដកបុគ្គលិកស្ថានទូតរបស់ខ្លួនចេញពីប្រទេសអ៊ីរ៉ង់ជាបណ្ដោះអាសន្នផងដែរដោយយោងទៅលើស្ថានការណ៍សន្តិសុខដែលចុះដុនដាបកាន់តែខ្លាំង។ នៅក្នុងសេចក្ដីជូនដំណឹងរបស់ខ្លួន អង់គ្លេសសរសេររៀបរាប់ថាដោយសារបញ្ហាប្រឈមផ្នែកសន្តិសុខ រាល់បុគ្គលិកបម្រើការនៅក្នុងស្ថានទូតអង់គ្លេសត្រូវចាកចេញពីប្រទេសអ៊ីរ៉ង់ជាបណ្ដោះអាសន្ន។ ស្ថានទូតអង់គ្លេសនៅរដ្ឋធានីតេអេរ៉ង់នឹងបើកដំណើរការពីចម្ងាយព្រោះស្ថានការណ៍នៅអ៊ីរ៉ង់ស្ថិតនៅក្នុងភាពមិននឹងន៕ ប្រភព៖ ញូស្វីក និងប្រភពដទៃទៀត
ចែករំលែកព័តមាននេះ