រាជធានី​ភ្នំពេញ ៖ ឯកអគ្គរាជទូត​កម្ពុជា​ ប្រចាំ​នៅ​សាធារណរដ្ឋ​កូរ៉េ នឹង​នាំ​យក​សម្លៀក​បំពាក់​ប្រពៃណី​កម្ពុជា​ ទៅ​បង្ហាញ​នៅ​ក្នុង​កម្មវិធី​ការ​បង្ហាញ​ម៉ូ​ដ​សំលៀក​បំពាក់​ពិភព​លោក​នៅ​កូរ៉េ នៅ​ពេល​ខាង​មុខ​នេះ​ ។

ការ​លើក​ឡើង​បែប​នេះ​ កាលពីរសៀល​ថ្ងៃ​ទី២៣ ខែកុម្ភៈ ឆ្នាំ​២០២៦ ឯកឧត្តម ឃួ​ន ផុ​ន​រតនៈ ឯកអគ្គរាជទូត​កម្ពុជា​ ប្រចាំ​សាធារណរដ្ឋ​កូរ៉េ បាន​ទទួល​ជួប​សម្តែង​ការ​គួរសម និង​សំណេះសំណាល​ការងារ​ជាមួយ​លោកស្រី Jin Hyang-Ja ប្រធាន​ក្រុមប្រឹក្សាភិបាល​ នៃ​សមាគម​ហាន់​ប៊ុ​ក​កូរ៉េ (Korea Hanbok Association) នៅ​ស្ថានទូត​កម្ពុជា ​ក្នុង​ទីក្រុង​សេ​អ៊ូ​ល ​។

យោង​តាម​បណ្តាញ​សង្គម​របស់​ស្ថាន​ឯកអគ្គរាជទូត​កម្ពុជា ​ប្រចាំ​នៅ​កូរ៉េ បាន​ឲ្យ​ដឹង​ថា​ នៅ​ក្នុង​ជំនួប​លោកស្រី Jin Hyang-Ja បាន​ជម្រាប​ជូន ឯកឧត្តម ឯកអគ្គរាជទូត ថា ​សម្លៀក​បំពាក់​ប្រពៃណី​កូរ៉េ រឺ​ហាន់​ប៊ុ​ក មាន​ប្រមាណ ៨​ពាន់​ប្រភេទ ដែល​ប្រជាជន​កូរ៉េ​ យក​មក​ស្លៀកពាក់​ទៅ​តាម​ជំនាន់ រឺ បិ​រប​ទ ​នៃ​កម្មវិធី​នីមួយ​ៗ ។

លោកស្រី Jin Hyang-Ja បាន​ប្រគល់​សម្លៀក​បំពាក់​ប្រពៃណី​កូរ៉េ​ហាន់​ប៊ុ​ក ជូន​ឯកឧត្តម និង​លោក​ជំទាវ សម្រាប់​ស្លៀក​ ក្នុង​ពិធី​ផ្លូវការ​នានា​របស់​កូរ៉េ​។ ក្នុង​ឱកាស​នោះ​ផង​ដែរ លោកស្រី Jin Hyang-Ja ក៏​បាន​អញ្ជើញ​ឯកឧត្តម ឯកអគ្គរាជទូត ចូលរួម​កម្មវិធី​បង្ហាញ​ម៉ូ​ដ​សំលៀក​បំពាក់​ពិភពលោក World Costume Fashion Show ដែល​នឹង​ប្រព្រឹត្ត​ទៅ​នៅ​ខែមិថុនា ខាង​មុខ​នេះ​ ។

ឯកឧត្តម ឯកអគ្គរាជទូត បាន​ថ្លែងអំណរគុណ​ចំពោះ​សមាគម​ ដែល​បាន​ច្នៃ​សំលៀក​បំពាក់​ប្រពៃណី​កូរ៉េ​ដ៏​ស្រស់​ស្អាត​ជូន ឯកឧត្តម និង​លោក​ជំទាវ និង​ស្វាគមន៍​ចំពោះ​ការ​អញ្ជើញ​ស្ថានទូត​ចូលរួម​ក្នុង​កម្មវិធី​បង្ហាញ​ម៉ូ​ដ​សម្លៀក​បំពាក់​ពិភពលោក​ ដែល​វា​នឹង​ក្លាយជា​ឱកាស​ដ៏​ល្អ​មួយ​សម្រាប់​បង្ហាញ​សម្លៀក​បំពាក់​ប្រពៃណី​កម្ពុជា ​លើ​ឆាក​អន្តរជាតិ ​៕