ខេត្តមណ្ឌលគិរី ៖ ផ្លូវកៅស៊ូ និងផ្លូវបេតុងថ្មីដ៏រលោងស្រិលតភ្ជាប់ពីឃុំស្រែអំពូម ឆ្លងកាត់ឃុំក្រង់តេះ ឆ្ពោះទៅឃុំពូជ្រៃ ក្នុងភូមិសាស្ត្រស្រុកពេជ្រាដា មានប្រវែង១០គីឡូម៉ែត្រ ត្រូវបានសាងសង់ឡើង នាដើមឆ្នាំ២០២៦នេះ…
ខេត្តមណ្ឌលគិរី ៖ ផ្លូវកៅស៊ូ និងផ្លូវបេតុងថ្មីដ៏រលោងស្រិលតភ្ជាប់ពីឃុំស្រែអំពូម ឆ្លងកាត់ឃុំក្រង់តេះ ឆ្ពោះទៅឃុំពូជ្រៃ ក្នុងភូមិសាស្ត្រស្រុកពេជ្រាដា មានប្រវែង១០គីឡូម៉ែត្រ ត្រូវបានសាងសង់ឡើង នាដើមឆ្នាំ២០២៦នេះ ដើម្បីសម្រួលការដឹកជញ្ជូនរាល់កសិផលរបស់ប្រជាពលរដ្ឋ ខណៈដែលមូលដ្ឋានឃុំទាំងបី ជាតំបន់ពោពេញទៅដោយដំណាំកសិកម្ម និងកសិឧស្សាហកម្មយ៉ាងសម្បូរបែប ។
លោក ធន់ សារី ប្រធានមន្ទីរអភិវឌ្ឍន៍ជនបទខេត្តមណ្ឌលគិរីបានឲ្យដឹងថា ក្រោយទទួលបានគម្រោងធ្វើពិពិធកម្មកសិកម្មកម្ពុជា (ហិរញ្ញប្បទាន ធនាគារពិភពលោក ) ជួសជុលកែលម្អផ្លូវក្រាលកៅស៊ូពីរជាន់ និងផ្លូវបេតុងប្រវែង១០គីឡូម៉ែត្រទទឹង៦ម៉ែត្រ ដែលអនុវត្តចាប់ពីខែកញ្ញា ឆ្នាំ២០២៥ ដល់ខែមិថុនា ឆ្នាំ២០២៦ ដើម្បីលើកកម្ពស់ជីវភាពប្រជាពលរដ្ឋ និងជំរុញកំណើនសេដ្ឋកិច្ចជាតិ។
លោកថា កន្លងទៅ ផ្លូវអន្តរឃុំនេះ គឺពិបាកធ្វើដំណើរណាស់ នៅរដូវវស្សាមានសភាពរអិលខ្លាំង ដែលនាំបញ្ហាជាច្រើនដល់បងប្អូនប្រជាពលរដ្ឋ ទាំងការដឹកជញ្ជូនកសិផល ការធ្វើដំណើរទៅរកសេវាសុខាភិបាល ជាពិសេស សិស្សានុសិស្សទៅរៀនសូត្រជាដើម ។ លោកប្រធានមន្ទីរបានមានប្រសាសន៍ថា សកម្មភាពរបស់មន្ទីរបាននិងកំពុងដើរស្របទៅតាមគន្លឹះអាទិភាពនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧ ដែលផ្តោតលើមនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ។
លោកបញ្ជាក់ថា មន្ទីរបានបន្តវេនពីអាណត្តិមុនៗក្នុងការប្រែក្លាយផ្លូវដីស ឱ្យទៅជាផ្លូវក្រាលកៅស៊ូពីរជាន់ (DBST) និងផ្លូវបេតុងកាន់តែច្រើនខ្សែឡើង ដើម្បីឱ្យជនបទមានសមាហរណកម្មជិតស្និទ្ធជាមួយទីប្រជុំជន ។ លោក ធន់ សារី បានរំលេចពីលទ្ធផលការងារ ដែលសម្រេចបានក្នុងឆ្នាំ២០២៥ កន្លងទៅថា ក្រសួងអភិវឌ្ឍន៍ជនបទបានផ្តល់គម្រោងថែទាំ និងជួសជុលផ្លូវសំខាន់ៗជាច្រើន រួមមាន ផ្លូវក្រាលល្បាយក្រួស៖ ចំនួន១៣ខ្សែ ដែលមានប្រវែងសរុប១១៦គីឡូម៉ែត្រ ។ ផ្លូវក្រាលកៅស៊ូ៖ ចំនួន១ខ្សែ ប្រវែង៣.៥គីឡូម៉ែត្រ ។
លោកបានបន្ថែមថា សមិទ្ធផលទាំងនេះ បានផ្តល់ផលប្រយោជន៍ផ្ទាល់ដល់ប្រជាពលរដ្ឋ ដូចជាភាពងាយស្រួលក្នុងការធ្វើដំណើរចំណេញពេលវេលា និងកាត់បន្ថយថ្លៃដើមក្នុងការដឹកជញ្ជូនកសិផលទៅកាន់ទីផ្សារ ៕
ចែករំលែកព័តមាននេះ